【Intern】炮轟煙腸唔懂事　有冇諗番舊陣時？　大家為咗Offer…

夏天到了，很多有上進心的大學生，急不及待投身Intern行列，着住G2000的西裝套裝，在中環金鐘一帶的玻璃門聯群結隊出出入入。

而每逢7、8月，香港的各大人力資源顧問，以及好多已上位（或起碼已坐暖個位）的高級打工仔，亦會在唔同渠道炮轟身邊的「煙腸」：咩「一代不如一代」，「90後溝通能力差、缺乏責任感」等等的報紙標題、FB Status以及Happy Hour的茶餘飯後話題，可謂不絕於耳。當然，好多Intern確實又真係幾唔嗅米氣。

的確，當你已經最少升到AM級甚至M級，自己及圍繞身邊的朋友亦係個個月入幾萬，個個（with some help from parents）都開始買車買樓，而且似乎在自己的範疇獨當一面時，很容易對呢啲小朋友Interns過度評頭品足，甚至容易睇唔順眼。

其實，在不久的之前，你都係咁樣的Intern小朋友。上位後，你還記得當初做Intern的苦澀嗎？

將Supervisor講的事全部抄低。（《未生》劇照）

那些年的你……

那一年，你仲係大學Year 2，正如大部分上進的同學仔一樣，放暑假2個半月就做足2份Internship，實際上只係放10日假。在Internship的第一日，往往有一日半日Induction session，由HR姐姐出來開個PowerPoint同大家講講公司簡介。一大班「同一個Batch」的Interns，來自各大院校，其中不乏英美大學學生，坐晒係一個房，尷尷尬尬你眼望我眼，然後等HR姐姐分配大家入邊個Department，跟邊個Supervisor同「Buddy」。

入得呢個Internship的，基本上都做足功課，已經有心儀的Department，通常都係個名講出來好似好勁，例如咩Business Development、Merger & Acquisitions、Corporate Finance等等，而通常後勤部門例如Operations、Finance等就無人問津。

然後你被分配到一個比上不足，比下有餘的Department，被安排坐係部門的一個角落，個位同部電腦明顯預留比Intern用，因為裏面乜都無。你戰戰競競地向坐在你附近的 Buddy——一位畢業後做左2至3年的仁兄打招呼自我介紹，然後他帶你去與部門Supervisor報到。你更加如履薄冰地，拿着一本簿，抄低Supervisor同你講的所有嘢，哪怕係雞毛蒜皮的芝麻綠豆事；例如Supervisor講佢個仔叫John，而家在Island School讀緊Year 9，準備升英國讀書，你雖然年紀輕輕，但都好似香港高官見習總一樣，彎低腰很Diligent地全部抄低晒佢。

到第一日傍晚6點幾，其實你根本無咩好做（全日工作可能就係影印幾份文件，或較Advanced的話：將文件排序好並釘裝），你依然在你的位不停Double check，生怕連咁簡單的事都搞錯就大檸樂。結果，你7點幾先走，搭地鐵返屋企。

意想不到的忙碌

然後幾日，你開始與其他Interns混熟，大家相約Lunch去邊度食，星期五晚就去LKF邊度Shisha。但做Internship往往係一場困獸鬥：一個Batch裏面15人，只有2至3個有可能得到Graduate Offer。Interns之間存在一種無色無臭的競爭張力，表面上大家守望相助，互相解答各自Supervisor工作上的疑難，很優雅地互動與Social，暗地裏其實個個都唔多唔少希望自己做得好過其他人，亦暗地裏盤算各人能力以及自己的形勢。

尤其在大公司的Internship，一個月裏面往往有很多Assessments：

1）月底的重頭戲——個人Presentation；
2）接近月底由HR主導的Aptitude Tests ；
3）小組討論Group discussion；以及
4）最後見Board ——Panel Interview

更加唔使講有自己Supervisor及Buddy給自己的評分，會一併直接交給HR去審核。所以，成個Internship裏面，一般來說係會好忙。除了做日常上頭交給你的執頭執尾或豬頭骨工作以外，仲有大量Assessments，仲有各種Team Lunch、Drinks，週末的CSR義工活動，以及Interns之間自發搞的各類飲飲食食聚會。其中，對於一個20歲的Local School出身的學生，其實大部分都會令你身處頗為不熟悉的環境。

成個Internship如是者，一個月容易變得好漫長，有沒完沒了的工作，Assessments、Presentations以及Social。而且，即使你本身在大學學系裏面算係成績幾好幾Smart，來到呢個Internship，周圍的Interns看似個個都叻過你：無論係語文能力、工作能力甚至人際技巧及家底等。

對於一個大學生，做大公司Internship可能就係第一次exposed to一個比以前大10倍的舞台，第一次周圍都係名校精英。而自己亦好似係唯一一個Struggle緊的Intern，雖然表面上你都扮到從容自若。

做大公司Internship就係跳去一個比以前大10倍舞台的機會。（資料圖片）

一個月終於過去，在準備無數PowerPoint以及最後一個星期中，面對幾十個老闆級人馬，一班Intern似懂非懂，輪流獨白的Presentation之間，還有異常殘酷的英文／普通話Group Discussion：平時同個個都好Friend好Social又好Aggressive個DG女，一如所料在Group Discussion爆Seed，但始料不及的是，佢零舍係咁打斷你的發言。畢竟，可能你本身就係呢個Group最弱一個。事實上，HR事後給你的評價，亦係「極大改善空間」，簡單講就係：你係垃圾，唔使考慮本公司。

如是者，呢個Internship終於告一段落。到最後買散水餅，你買了東海堂的西餅，但那些外國返來英文「Lak lak聲」（據說父母仲係公司高層的客戶或朋友）的Interns就在IFC連卡佛買了某法國名牌甜品，而且還在各Buddies之間引來一陣哄動。

Needless to say，你當然沒有得到Return offer。那位DG女亦理所當然得到Return Offer，但據說她還Turn down了，而轉投另外一間更頂尖的公司展開她的康莊大道。

那一年的暑假異常地炎熱而乾旱，日日都烈日當空陽光普照。你在呢份Internship結束後Down左幾日，回到藍田的家中，難得從忙到爆炸突然變得極度清閒，開住冷氣煲劇虛度光陰，或寄情做運動日日落泳池游幾十個塘。躺在泳池旁邊的沙灘椅，望住個天，回想過去一個月的Awkward經歷，你亦一度懷疑自己的能力：可能自己真係無想像中咁叻，可能自己確實只係池中物，你永遠不會成功。

你一度懷疑自己的能力，可能自己永遠不會成功。（《半澤直樹》劇照）

然後幾年過去，幾經奔波勞碌，走了極多冤枉路，亦多得自身的拼搏及際遇，你終於算係搵到自己定位，「搵兩餐」係你的understatement，實際上你的事業已經走上成功的Fast track。

你在公司已經坐暖個位，甚至在行業裏快速上位中，暑假時公司安排左個Intern跟你，係一個本地大學男生，談吐頗為靦腆，講英文則Grammar總係亂七八糟，而且行路個款誠惶誠恐。

你同一班年資相約的同事在Happy Hour談論今年的Interns，焦點落在牛津劍橋畢業生，本地名校或國際學校校友，然後從邊個靚女，到邊個似係最醒目最Presentable。興之所至，大家幾乎要開盤打賭邊個會得到Return offer。

好事的同事K問你：「你個Intern好似好靜。」然後眾人和應，「係囉，你個Intern家下賠率1賠90。」

當你準備附和大家講一些奚落說話，你突然想起當年自己做Intern表現更唔突出（直頭唔知想點），但當年那位「Buddy」在你Presentation的慘敗後私底下給你唔少Advice同鼓勵：從叫你參加Toastmaster練public speaking到加入某某學會擴闊社交圈子等等，某程度將你從低谷拉返起身。於是猛然醒覺，其實自己本身都係一樣：冇人脈、冇家底、冇天資，始終都努力爬返上來。

你默然沒有回話，將手中的啤酒一飲而盡，淡然地說：「其實佢都唔差，不過係幾緊張。」

說罷，你立刻Whatsapp你的Intern：「Don’t let the bastards grind you down. 聽日早30分鐘到公司，我幫你睇睇份Presentation準備成點。」

你內心好激動，想起自己幾年一路走來，確實唔容易有今日，好感激當日提攜激勵自己的Buddy，亦為自己而家傳承呢種扶持晚輩精神，可能會深遠地改寫一個年輕人的前途路向，而覺得自己好有歷史使命，簡直係中環金融界的Superman。

Whatsapp裏面看到Intern電話的兩個藍剔，但幾個鐘都無回覆。

於是你興致勃勃打電話去，準備直接向對方教路。

豈料接通電話後，對方第一句就話：「XX哥，我放咗工就唔會再跟公司嘢。份Contract寫明9至6㗎嘛，有咩聽日公司先講啦。拜拜！」然後直接Cut線。

你立即爆粗：「_！真係一代不如一代！垃圾Intern！」然後打比那位好事的同事K齊齊笑今年的Intern。

或者，這才是Business as usual。

SJ結語

你還記得當初做Intern的苦澀嗎？回想大學時成日要做Intern，其實都真係幾煩。

（原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。）

【實習】Intern何價？　5個奮鬥10年都未必賺到咁多的超級實習位