慌死執輸　人人都想創業做老闆？　好．打工仔往往先係識時務者…

2018呢個年頭，係人都做緊／「準備做」Startup，街口的Co-working Space與Incubator就來比7-11多，樓下個賣魚佬據說都開始做Angel Investor正在物色有趣的項目，希望以紅衫魚價錢投中下一個Snapchat。

無他的，在樓市瘋狂+橫行，紅磡公屋都兩萬蚊呎，以及人工低下的年代，似乎「不創業，便成仁」。

然而，一如所有其他市場，「就業市場」都係講供求定律。在大家一窩蜂去做某一件事時，好可能呢件事已經到水尾，開到荼糜，就如2000至2005年左右的Audit，2008至2012年左右的法律與投行，亢奮過後，少不免泡沫爆破，發現原來機會冇想像中咁多。相反，當大家都遺忘的一些小事，反而可能先係真正的Game Changer，起碼對你自己人生而言。

當然，「創業」係好空泛的說法，開餐廳同搞IT都兩個世界的事，而即使「搞IT」都有Blockchain、VR、AR、Big Data、SoLoMo等最「流行」的高端創業者，以及「接Job」同「拍條片／寫鱔稿」呢類唔Glamourous而低端創業者，雖然對賺錢能力未必有任何Indication。

走在中環，無論係金融界定專業人士，假如你自己冇「買Bitcoin賺咗兩百萬」或者「最近開始研究Blockchain技術」，無容置疑係有點Out。但唔緊要，正如之前的AR Big Data之類，參與者眾，評論家更多，但真正從中獲利的其實極少，起碼肯定輪唔到你，除非你本身在矽谷／深圳／北京科技園，而且件事未Hit已經研究從事多年。

點都好，講返呢個「就業市場」，其實在人人爭做老闆的世代，做個「得力員工」其實更值錢。

「想做老闆」係最容易有的念頭，大概同人類「Eat」同「Sex」一樣來得自然，係一種inherent need。月入15k定50k，都不約而同覺得老闆剝削自己太多，明明自己幫公司賺薪金五倍以上金錢。呢種躁動，通常漠視咗好多因素，例如逗份糧的安穩（雖然有時候係False sense of security），避開了做老闆的風險以及跑數的不安感，甚至係創業時期每日食屎食足五年先有起色等等。

所以香港有個好奇怪現象，就係雖然香港咁多人，又9間U又海外生，但公司同Team Heads們永遠都「請唔到人」。叻人都忙着去「大幹一票」，趕住做IG紅人賺大錢然後賣化妝品同限量版波鞋發達，就算留低打工，基本上都在準備狀態中，人在心不在，唔炒Bitcoin都起碼炒期指。

剩下的，除咗係「真．冗員」，仲有絕無僅有的「滄海遺珠」︰真正做到嘢、勤力負責、上心的員工，解決到工作問題，而且非常重要的是：唔會成日喉住你個位，朝思暮想自己點樣可以取代你或者搶晒你的生意自己創業。

呢種好員工，其實係非常值錢。香港No.1典範肯定係長實霍建寧。跟咗李嘉誠幾十年，要人脈有人脈，要資本有（頗足夠）資本，點解唔自己出來起樓賺大錢，甘願幫李嘉誠做牛做（頭）馬？騰訊都有個香港人劉熾平，都邁向呢個方向。

或者，呢個係性格問題，但做到呢個位，真係會唔Ambitious咩？更可能，係計過條數，計埋潛在回報同機會率，都唔及自己繼續跟住誠哥的待遇。呢一方面，就係「千里馬」與「伯樂」的老生常談。

你幾好打，但腦細廢，始終都限制了你的高度同收入。相反，跟住個「上升軌道」的老闆與公司，自己都無時無刻要保持巔峰狀態，因為身邊環境都增長得好快，永遠介乎你差不多但還沒有Outgrow你公司的環境與層次，咁就值得繼續做個「好．打工仔」。

所以，假如有幸身處在呢種上升環境的話，倒不如疊埋心水，做個「得力員工」其實更值錢。起碼，你人工翻幾倍時，盲目創業的朋友可能仲在苦海浮沉，走去搵賣魚佬乞十萬港幣投資都被人踢走，好行唔送。

SJ結語

但係，一個好大的Caveat係，香港好多公司同老闆都……

咁呢個時候，無論自己做定轉工都好，千萬千萬唔好撬公司客，其一犯法唔值得，其二冇Class，如果唔本事自己從零開始，咁不如都係學多幾年嘢先。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】