【破地獄】10個打工仔　注定9個窮忙1個上岸？搵機會反守為攻啦！

出來社會幾年，相信好多人有呢種感概：讀書時覺得自己將來會非常了不起：讀Social Science就相信將來會從政，仕途一帆風順，考AO然後40歲前升做常秘；讀BBA就相信將來會入Bank或做生意，有一日會發達，買法拉利住貝沙灣。然後，20歲到25歲，基本上就係一連串挫敗。

初敗：大學 Year 3—4 到 Fresh Grad 的覺醒

初敗：大學 Year 3—4 到 Fresh Grad 的覺醒

大學三年級可能係分水嶺：Despite最初Year 1時的豪言壯語，最後發現自己已經冇可能同Dean’s list或First Hon沾得上邊；幾次不順利的Internship後，與AO及投行一一緣盡；幻想中畢業後立即$40,000起跳，但現實的現實，卻只係得$15,000。其實，十個人裏面，可能九個人都經歷一樣的處境，只有一個真正達到目標。

出來社會 際遇的煎熬

到出來做嘢後，月入雖然只得$15,000卻一樣要受氣與OT，工作厭惡之餘可能壓力其實同樣巨大。而且，可能因為老闆廢（或公司廢），自覺學唔到嘢，歲月蹉跎之餘，還有不斷被上司與客戶的責罵及 Deadline 的追趕，生活基本上喘不過氣來。

同時間，眼見Top 10%的那些同學，無論在FB所見或朋友間傳聞，據說已經4至5萬一個月，一年又post幾次去旅行相，仲要唔貴唔去：春天去日本廣島賞櫻，夏天去馬爾代夫，秋天去日本東北睇楓葉，冬天飛去倫敦過白色聖誕兼現場睇英超。無他的，大家可能都係朝9晚9，但人地一個月的收入，等於你三個月，做一年就等於你做三年。而你卻只能繼續高唱：

明明我已晝夜無間踏盡面前路 / 夢想中的彼岸為何還未到

你的工作，可能永遠介乎於「掙扎求存」與「無驚無險又到三點」之間，從辦公室政治到海量的工作，到老闆與客戶漠視Working Hours的追魂Call，大部分人其實完全冇任何精力與時間尋求更進一步的機會。更可怕的，係人會變得Complacent，即係會慢慢變得安於現狀，接受了自己永遠不會成功的現實，接受了自己「輸在起跑線」，所以難得工作壓力較低時，也只會「無驚無險又到三點」。

人生除咗每年去下旅行，已經冇其他嘢可以令自己興奮及期待。呢種旅行，其實又只係另一種逃避， 所以香港所有書局，最暢銷的永遠係旅行書 （據說，閃令令系列旅行書的出版商，一直逆市年賺過千萬）。

對大部分人而言，一生人永遠都在呢個階段，除非你不停地找尋「反守為攻」的機會。

「反守為攻」： Stop Running and Start Hunting

有套電影，Tom Cruise主演，叫做《Never Go Back》，香港翻譯做 《誓不回頭》。Tom Cruise身為軍隊中的一個傳奇人物，非常打得，有智有謀。退役後發現了美國軍方高層的貪污秘密，結果被軍方高層下令追殺，Tom Cruise只好帶同女主角與女兒馬不停蹄逃命。

直到有一個機會，Tom Cruise打敗了其中幾個殺手，得到喘息的空間，便立即決定要反守為攻，調查並追擊這個貪污集團，他說了這樣一句：

It’s time to stop running and start hunting.

人生其實也就要找這些反守為攻的機會。假如得到珍貴的喘息空間，你卻只浪費在蘭桂坊與盲無目的地瘋狂去旅行，其實錯過了這些珍貴的反守為攻機會。

人的一生有幾多個「反守為攻」的機會？可以有好多，但大概分為3種：

1．在職場站穩陣腳　升職加薪

正如上述，人在職場，身不由己之餘，仲好可能不停挨打。 在地上挨打的人，雖然可以雙手抱頭減低傷害，但如果冇一個戰略係幾時企返起身，則只能永遠挨打，久守必失。

SJ冇打過爛仔交，但有好多朋友打過自由搏擊。他們都說，挨打之際，只要好好把握對手一個失誤，給了你一秒鐘的空檔，則隨時可以扭轉局勢。

職場如是，面對海量的厭惡工作，要盡最大努力去挽狂瀾，起碼停止挨打，或者起碼得到老闆基本認知你的能力。 繼而以正當渠道去爭取升職加薪，從$15,000升到$25,000，唔升就找機會跳槽。但要記住，加人工充其量只係一個Morale Boost，千萬不要以為兩、三萬人工就好巴閉，而要認清呢個只係新的起跑線。

2．找到自己的Niche　自己的USP

每個人都有自己擅長的地方，當命運際遇驅使，大部分人都做不到自己擅長的事，更唔清楚自己究竟有咩過人之處。有的人可能係分析能力強，有的人可能係寫嘢寫得好睇又有條理，有的人把口非常了不起，也有的人語言能力或數學能力高超，甚至有人雖然做Corp Fi，但發現自己其實對整嘢食最有passion。

3．產業升級：創業或晉升管理層

找到自己的USP——Unique Selling Point，其實都只係第一步；更進一步，就係要Use it to your advantage。

如果你整嘢食整得好食，Do it！放工時間及週末，不停瘋狂整蛋糕，然後請身邊所有家人朋友試食，唔一定要放上 IG 賣（有法律問題），但起碼要得到身邊人誠實的意見與口碑。如果大家都覺得好好食，再延伸到返公司請同事試食，睇下反應如何。As crazy as it sounds，據說創造過億元營業額的珍妮曲奇，都係咁樣走過來。

另一邊廂，其實都並非全部人一定要創業。即使繼續打工，長遠目標一定係晉升到可以獨當一面的職位，繼而晉升管理層。重點係運用自己的Niche，係公司裏面找到適合自己，如魚得水的職位。長遠來看，為公司與客戶創造到價值，以及堅持下來，自然就會慢慢晉升上去。

SJ結語

當然，以上講咁多，固然係Easier said than done。就如馬雲成日講，大部分人係「晚上想想千條路，早上起來走原路」。人生更大的敵人，往往並非殘酷及困難的現實，反而係自己的惰性、貪婪與恐懼。例如，當你星期一至五返工都做到隻狗咁，你還有足夠堅持係星期六日繼續工作去追求自己理想嗎？大部分人都唔會。

而星期六日，可能就係你反守為攻的機會，假如你能堅持3年的星期六、日，都用來追求你自己的理想，其實幾年過去，可能真係夢想成真。相反，3年來如常休息，閒時就一班人飲啤酒，怨天怨地覺得自己懷才不遇，則幾年過後，人生依然挨打。

你一直在挨打嗎？

人生，是時候反守為攻了。

Try real, real hard.

（原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。）