【上山下海】FB號召去小島執垃圾　退休山友：執咗4日先見返沙灘

近年行山郊遊的風氣熾熱，不少遊人到訪同時亦製造大量垃圾。去年漁護署將郊野公園山徑內553個垃圾桶全部移除，宣揚「自己垃圾自己帶走」。但除了做到「山野不留痕」，不少有心人已經行多一步，自發執走前人留下的垃圾。鍾情戶外活動的貓哥也是其中一員，自今年4月退休後他「上山」走遍大東山、雞公山、港島徑；「下海」到過鹽田梓、白沙洲、綠蛋島。執垃圾執上癮，他更表示：「執完之後個心特別快樂！」

「見到租開艇玩嘅檔口被摧毀得好恐佈，成個檔口打到爛晒，啲垃圾就淹沒晒成個沙灘同海面，所以落波嗰日，同幾個有心嘅山友去咗幫手清理。」今年55歲的貓哥表示，過去行山、露營時見到垃圾時都會清理，到了去年8月，10號風球「天鴿」肆虐，開始聯同其他有心人一同行動，「每日出動6至10人，連續執咗4日，先可以見返個沙灘……其實我哋都只係普通人，只不過一齊鍾意戶外活動、鍾意自然環境。」

今年4月貓哥退休後，與一眾山友成立了Facebook群組「上山下海執垃圾」，現時成員已有300多人，不定期組織執垃圾活動。貓哥指，要「上山下海」，是因為山野垃圾和海洋垃圾問題同樣嚴重，「租艇出海玩時，睇見唔同嘅小島都佈滿垃圾、膠袋、鬼網，所以有一個強烈嘅念頭湧現：好想為自己玩嘅地方出一分力，幫佢執返靚靚！」自此之後，他每次到郊外遊玩都會帶定5至10個垃圾袋，與友人一同清理沿途所見的垃圾，「慢慢我哋發覺執完之後，個心特別快樂，比起齋玩，係多咗一種莫名滿足感。」

成立數月以來，「上山下海」的成員到過無數地方：大東山、雞公山、港島徑、西貢內海的沙下、洋洲、枕頭洲、小鏟洲、橋咀島、鹽田梓、白沙洲、綠蛋島蕉坑、麻藍芴、海下海岸保護區等……在剛過去的星期六(8月11日)，雖然懸掛了1號風球，他們亦在時晴時雨之下去到大嶼山大澳一帶清理海岸垃圾，一共整理了12大袋，當中不乏塑膠製品。近年人人提倡「走塑」，貓哥亦希望呼籲山友減少使用即棄塑膠用品，「塑膠本來係為人類帶嚟極大方便，但用後處理不當，唔單止影響郊野外觀，落到海被魚類海產誤食吸收，最終都係人類食返。」他形容自己的執垃圾行動微不足道，惟有人人都合力減廢，才可真正保護環境，「每人願意慢慢減少塑料成為野外垃圾，咁地球先得到保護，生命先得到循環。」