【海洋垃圾】由怕水到愛上潛水　藝術女生為環保製鬼網裝置

被漁民遺留於海底的漁網，俗稱「鬼網」，在本港海洋垃圾之中排名第8，年中有不少海洋生物被鬼網纏繞至死。現時大部份清理鬼網的工作，都由潛水愛好者自發進行，去年8月才學懂潛水的Karsin，也是其中一份子。修讀美術的她，近日在灣仔舉行畢業展覽，展出由十多個鬼網製成的藝術裝置，希望引起更多人關注環保問題。

「一潛落水，除左覺得自己同海洋連埋一齊，同時都發現，原來海洋垃圾真係一個好大問題！」Karsin指，過去一向怕水，但鼓起勇氣潛入水底後，沒多久就被海底世界瞬息萬變的景象深深吸引。不過，映入眼中的還有各式各樣的海洋垃圾，「之後有次去海灘，見到有位義工定期會去清鬼網，於是我就跟咗佢去……第二次去清嗰時，因為仲係新手，遇到意外差啲死，不過依家技巧已經好咗好多，所以都會繼續執！」

今次展出的藝術裝置，由10多個鬼網製成，是Karsin在4月1日與40名義工在深灣拾到的，「雖然當日係愚人節，但當我哋見到咁多垃圾同鬼網、諗到上岸生蛋嘅海龜媽媽，就一啲都唔好笑啦。」因此，正在修讀藝術的她，一改過往的創作路線，不顧老師反對，也要藉着畢業展覽向公眾傳達保護環境的訊息，打破「垃圾是污糟、藝術是高尚」的迷思，「老師話，環保呢啲嘢唔使artist去做……但係藝術創作源自生活，我想借呢個平台比多啲平時唔會留意嘅人知道，迫佢哋正視問題。」

展覽場地: 灣仔香港藝術中心4樓包氏畫廊

展出時間: 2018年7月6日至7月22日, 上午10時至晚上8時