【社區人．訪】點解九龍塘變豪宅區？因為愛德華王子一句話！

「千里之行，始於足下」，掌故王鄭寶鴻的歷史知識，也始於足下。70年代時「貪得意」去考的士牌，結果因師傅的一句話，他徒步行遍港九認路，而他走的每一步，沿路也拾遺了一片片香港歷史的碎片。
攝影：李澤彤

為了一個對他來說可有可無的的士牌，鄭寶鴻用工餘時間，花了兩個月在城市中游走。走過平路、上斜、下坡，踏遍港九每一吋，光是想想也覺累，但聽他細數着每個街名、每個角落，卻像在探險。問鄭寶鴻認路的過程中，有否發現更多香港故事，他想都沒想，立馬回道：「好多啦！成個九龍塘你唔行，根本唔知係咩。」

太子道曾有太子來訪

「聽到有條街叫述德街，英文叫Short，就去睇下佢點Short法、點短法。」鄭寶鴻笑道，憶述起這趟看似漫無目的的旅程。一邊認路，一邊探索、考究，走着走着就到了太子道，他便研究起路的起源。

「話說當時有個儲君1922年嚟香港，佢經過新開闢、由旺角去九龍城嗰條路。當時（殖民地政府）為咗紀念佢，就將條路叫做Prince Edward Road。」鄭寶鴻口中的儲君，就是愛德華王子。

英文叫作Prince Edward Road，但中文名早期卻不叫「太子」，而是喚作英王子道。這位「太子」後來的確繼承了皇位，成了英皇，亦即愛德華八世：「但嗰位王子後來做過一年皇帝就冇做啦！」當年愛德華八世不愛江山愛美女，因為戀上離婚女人而放棄王位，最後由皇帝變成溫莎公爵。

當年的英國式小鎮

愛德華王子訪港帶來的改變，點止一條街名，九龍塘之所以成為豪宅區，都是因為他。「佢當時話如果喺度起個英國式小鎮就好喇，因為當時成個九龍塘填平咗，咁你做殖民地官員，都要聽佢話啦，咪開個英式小鎮喺度囉。」鄭寶鴻說着，開始細數九龍塘每條以英文名命名的街道。

森麻實道、多實街、根德街、雅息士道、牛津道、劍橋道，社區中的小巷全以英文名命名，再以發音譯成中文，唯獨一條何東道在這英式小社區中別樹一格。「因為有發展商喺嗰度起別墅，起起下死咗，啲別墅爛咗尾。加上當時省港大罷工，冇人買樓，要搵何東爵士執手尾。」自此，別墅一間接一間興建，建構出現時的豪宅區。談到這裏，鄭寶鴻也不禁笑道：「依家嗰啲別墅就值錢啦，九龍塘貴到離晒譜！」