【隱世夠未】網民開「鳩假期」諷《新假期》：不應鼓勵呃like文化
行山人士塞滿山野，不少網民認為網上消閒媒體就是元兇。想行山，在Facebook可找到「文青呃like新手」行山路線；要美食推介，則有「韓式抹茶拉絲」小店。近年在社交媒體風行的本地玩樂雜誌上建立了一套修辭學及美學，大受歡迎，但也有部分網民已生厭。
諷刺《新假期》的「鳩假期」 Facebook專頁，介紹屋邨水渠為「隱藏級瀑布」、核突公園為「文青野餐勝地」，挾着萬幾likes人氣急升。但在專頁搞手眼中，媒體不應只為呃like生存；有網中人回應身陷網媒泥沼中是身不由己；也有記者認為香港文化本來就愛食玩買，為何媒體要負最大責任？掰開表層，看見網媒即食生態與香港人假期消費慾望，相生滋長，皮肉相連。
媒體塑造假象：乜都平靚正，最緊要係食玩買
「鳩假期」 Facebook成立的第二天，就出現一對男女在吊手岩迷路求救、消防員隊目在營救期間喪生的意外事故。有網民找來《新假期》網站一篇介紹馬鞍山昂坪為「另一個適合各類型人士的地方……可以輕鬆路線也可以選擇難度較高的吊手岩起點出發」的文章，然後罵聲四起，指摘其寫法令人低估路線難度。
「鳩假期」不久前post了介紹「隱世港版天空之鏡」第一帖（抄足《新假期》格式把地盤泥沼介紹成打卡熱點），意外發生後「鳩假期」隨即發post：「其實一直好X睇唔過眼依（呢）啲濕鳩page，日日強姦完坐（座）山就強姦啲食物，乜柒地方都話冷門隱世又靚又易去。喂大佬真心有興趣嘅神（晨）早去左（咗）啦，X洗（使）你介紹咩。搞到成座山唔係人就係垃圾，去行山見到人仲多過草，我真係恭喜你啊。」
這個以惡搞《新假期》為榮的「鳩假期」由Kelvin和Tony創辦，相約在港鐵站見面，手長腳長、架着眼鏡的Kelvin微笑打招呼，一點不像想像中的那種憤青。記者笑說，為何要如此針對媒體？網媒未來好慘淡呀。「好呀好呀你話畀我知多啲傳媒背景。」
Kelvin原來不是惡搞老手或活躍高登友，開「鳩假期」純粹因看不過眼。「我一向鍾意探索香港。但記得三、四年前，大東山同龍脊被傳媒用浮誇造作嘅方式捧到好紅，市民好受落，一放假就衝晒過去，令到本身想享受果個環境嘅人享受唔到。仲會造成破壞環境、滋擾居民、亂抛垃圾等等問題，不過呢個冇必然關係。」 在瘋狂介紹抵食拉絲抹茶流心食品或易去秘境世外桃源的同時Kelvin認為此等雜誌在塑造假象——乜都平靚正，最緊要係食玩買。「佢介紹嗰啲好膚淺冇深度，如果真係有興趣，Google已搵到好多，點解要佢介紹？」
Kelvin記得有次去大帽山，幫幾個女生召的士，閒談之間她們問：「你哋係咪都係睇咗嗰個page所以過嚟？」他才切實明白原來這些媒體的影響力有多廣。「我最唔鍾意係佢哋擺明車馬，鼓勵大家呃like打卡。我都唔知叫做咩主義？為咗滿足自己，喺社交媒體拎到認同感而去做。」其實Kelvin自己也曾經歷呃like的成長階段。他笑說，曾post很chok的相片，有人讚會感到成功，甚至有人因此會inbox認識他。 「慢慢我發現嗰種感覺未必咁真實，如果成日為咗人哋而胡亂塑造自己，遲早你會覺得好空，好唔真實。」 Kelvin說。
港式假期：跟風、填滿食買玩節目？
「鳩假期」 照辦煮碗，跟足《新假期》的修辭學，如介紹「首爾過江視覺系餐廳」及有免費孟婆湯飲的著名電影拍攝場地「隱秘奈河橋」，留言及分享者眾——Kelvin看着各posts的派帖量可高達十幾萬，更覺荒謬。「我唔需要付出金錢、好多時間，就可以reach到咁多人。雖然唔可以話帶嚟影響，但都叫有comment有互動。」若網媒世界運作邏輯是鼓動情緒、投眾所好，大家從追捧《新假期》變成like 「鳩假期」 ，會否只為跟風趁熱鬧？他亦有反思：「理性話我知social media係唔好。嗰種散播力量唔健康，人容易被洗腦而唔知。」
但沒有渴望邪惡拉絲及隱秘瀑布的群眾， 哪來這些教人呃like打卡的媒體？在今天PV（page view）高於內容的網媒年代，內容生產者與消費者在同心圓裏團團轉，互為因果。有網民在討論區發文，指如果「獅子山精神」代表上一代人，「新假期精神」更適合形容今天的香港人：「跟風，呃like，圍威喂，周圍飲飲食食，大愛左膠見小店就執走去幫襯扮同情，懶係陽光去行山。」 Kelvin亦批評香港人懶，不喜歡付出，坐享其成。「多人做先做，少人做就唔敢做。鍾意人介紹，好似以前師奶鍾意話：『阿邊個邊個介紹嘅……』」
不過，對他來說傳媒是商業機構，所負的責任更大，不應「食住」港人被動心態。大家依循着消閒雜誌，一點點把自己的假期填滿食玩買節目，Kelvin認為也是社會環境造成——香港人過不了真正可hea的假期：「香港住屋環境已經差，我只想喺街搵一個冇design同function嘅空間，你都要整啲圍欄喺度。Hea又唔得，想搵嘢做又冇嘢做，𠵱家連行山都咁多人。香港冇個地方係荒蕪，密質質，每一度都望到有嘢。」
網上消閒雜誌記者：我也很無奈
同時間，正在某網上消閒雜誌工作的記者為了追趕瀏覽量，也苦不堪言。Kenneth（化名）早前負責旅遊及本地玩樂「炒稿」（即是不用採訪，在網上查找資料寫成的文章），指忙的時候一天炒三至四篇文章。「要用拉絲嗰啲字眼我都好討厭，無奈阿頭對眼跟住人哋走，覺得work就咁做。」上司亦愛記者們無限翻抄「數數目」內容農場題目，如「去京都十個必吃抹茶甜品」、「台灣十個必買手信」——「講真你都係網上翻查出嚟，可能得五個你親身試過，其餘嘅為咗湊夠數。」他指網上讀者愈來愈年輕，曾有調查指最大的受眾僅15至19歲：「佢哋慣咗煮到埋嚟就食，唔想用腦。」
李立峯：憑乜嘢禁止人哋報道？
中大新聞與傳播學院教授李立峯認為，其實大眾很難阻止消閒雜誌去報道某些景點。「就算主流傳媒唔咁做，網民自己行完座山去影相，發吓發吓都有咁嘅效果。再講，你憑乜嘢去禁止佢哋去報道，呢點難講得通。」他說。 他又指香港人從來都受傳媒影響下一窩蜂做某事，但今天傳媒在社交媒體的傳播力可觸及上百萬人，比起以往報章雜誌好賣極也只接觸十多二十萬人不同。至於對網民所批評那種跟風去食玩買的「新假期精神」，他說：「喺個人層次，佢鍾意跟風，你好難形容係件壞事，因為每個人都有其選擇。但整體嚟講，個社會就可能欠缺多元性，少咗獨立思考。」
「鳩假期」 創辦人自己的假期又怎過？ Kelvin過的是宅假期——在家裏吃零食看Netflix，隨心就好。我問，那你們取笑惡搞一輪後，然後呢？會否把力量轉移支持有質素的媒體，讓自己在Facebook Feed讀到更多好內容？「係，反對之後，大家其實願唔願意為反對而付出？除咗平靚正、食玩買，香港好多嘢可以關心，如唔同社群同埋民生問題。」
更多周報文章︰【01周報專頁】
郊野的一浪浪遊人到底還引起甚麼問題？欲知更多詳情，請留意刊載於５月２日出版第5８期《香港01》周報，各大書報攤及便利店有售，敬請讀者留意。你亦可按此訂閱周報，閱讀更多深度報導。