【眾志一周年】落區推動自決　黃之鋒：要先學識傳統政黨做嘅嘢

眾志一周年，這班20出頭的青年，從放下學生光環到踏入從政之路、再到香港仔埋頭做地區工作。一年的轉變，跨越了不少障礙與心理關口。香港眾志成員大部分人仍是學生，最年長那位僅是25歲。去年羅冠聰當選立法會最年輕議員，有了議席和資源，內部即隨決定開展地區工作。
「以前齋講大政治議題，而家就派單張講交通路線重組、巴士站變水舞間。」
「搞社運梗係出聲明啦，目標係迫政府公開對話。而家就出信約部門會面傾嘢，成套邏輯分別好大。」黃之鋒坐在香港仔地區辦事處說。從2011年成立學民思潮、經歷反國教、雨傘運動，再終結學民，成立香港眾志，由學生運動到創黨，黃之鋒曾經鋒芒盡露，現在漸漸學習退後，選址香港仔做社區工作。

前進就是克服自己最不擅長的工作

羅冠聰當選立法會議員後，香港眾志隨即商討如何分配議席資源。他們的參選文宣寫過，「自決」的前提是「自發」，其中一個參與方式是「由社區公民自主改進在地議題，實踐社區民主」。

「我哋講過，要發展地區，呢件事。一定要有人做。」黃之鋒務實，清楚有了議席，政黨要邁向全面化，必定要有人落區，於是走去做開荒牛。「好多人驚訝我決定將黨務分畀其他成員，自己主力落區。但作為秘書長，我有責任向社會證明，一個政黨唔止識得搞社會運動，而係能夠同人一齊關心最貼地嘅民生議題。我唔想幾年後，人哋仍然覺得，黃之鋒或眾志，嚟嚟去去都係得一味。」

他決定了的事，就會去做，但隨即面臨的質疑是「佢有冇呢個能耐？」、「同傳統泛民有乜分別？」。他如是說：「係時候走出conform zone，喺跌跌碰碰間磨練自己，前進就係要克服自己最唔擅長嘅嘢。前幾年密集式開會、冇乜時間聽人講嘢，而家行慢兩步，其實係幾享受。」

有全港知名度不代表居民認識你

有人形容黃之鋒為神話，彭定康勉勵他「我是過去，你是將來」、美國網絡串流電視Netflix購買他的紀錄片。但落到區，卻完全是另一回事。

他知道自己的局限。去年立法會選舉期間，當羅冠聰民調走勢仍浮沉於1至2％時，黃之鋒到南區拉票。他憶述當時站在對面的民主黨，手揚大聲公讀出歷屆的立法會和區議員名單，如楊森、李柱銘、黃震遐（等等），居民對這些人物耳熟能詳，黃之鋒頓時覺得「企咗喺到，落唔到地」。

「我識搞社會運動，但唔識分地政署同規劃署、唔知長生津同綜援嘅入息上限、白表同綠表有咩分別，就連出信比部門個條問題都唔識draft。開地辦之後，居民唔知你嚟咗、甚至唔識你。」

於是他將勤補拙，早上六點半起身準備街站、中午返學、回辦事處跟進個案、晚上繼續擺站、凌晨還在研究案件。情人節那晚，他收到漏水投訴，深夜埋頭出信，早上又落去派單張。一星期有四日在辦事處「落地打躉」、其餘時間則到外國做他打趣形容為「離地萬丈」的國際連結。

實踐四個月，他遇到的訴求，包括加快公屋輪候、幫居民填表、巴士站水浸、旅遊巴泊位不足、業主擔心樓價跌、屋村商場改建學校。要對應這些議題，他埋頭出信、與部門通電、準備文宣資料、發起居民會、落街派單張。

聽落，好像跟傳統服務式地區工作無異。

先紮實地區基礎　再以運動模式推進

同為自決派，朱凱廸在2015年曾撰文討論「社區營造」，提出香港地區事務或許能仿效西班牙左翼政黨Podemos以「地區圈子」（Circle）為基礎，發展出關注不同議題的「民主圈子」，以強調自發的互助模式出發，把握群眾的動能，以運動模式擴展社區力量。

黃之鋒抓抓頭髮道：「我哋都想做到社區自發運動，但始終未同居民建立到關係。我警剔自己，喺識做運動前，都要學識傳統政黨做嘅嘢。」他回想，「當時成員喺冷氣房吹到天花龍鳳，諗得太理想，團隊冇人有經驗，一坐到落去，好快就發現，完全冇根基之下，社區營造嘅theory好難apply落去。」

他以自己為例，「我每日早出晚歸，冇社區生活，唔夠歸屬感就好難有想像。海怡16幢劃一個選區，大家可以點對16幢嘅範圍有想像？可能真係冇喎，但如果成個鴨脷洲去睇，就有野玩喇，可以由規劃層面去諗點擴大居民能量。」

香港眾志面對最大的困難，是由零開始，「搞社運嗰時會鬧民主黨，但落到區，你真係唔夠人哋嚟，佢哋南區有幾個區議員、各自有基礎、有龐大居民data base，我哋最開初嘅時候，電話簿連一個人都冇。」

由香港前途問題、支持長毛還是曾俊華為特首人選，香港眾志與民主黨都存有很大差異，要在地區事務上向民主黨取經，學習區議會程序與政府部門的運作，黃之鋒形容為「精神分裂」，「呢頭向議員請教完，嗰頭大家就喺政治議題上各有立場，甚至會有罵戰。」但為了建立社區力量，他把政見放在一旁。

讓公民充權出現於社區運動

雨傘運動後的社會，翻天覆地。

社區固然多了自發組織，居民漸漸在區內累積政治能量，但政府的打壓亦甚囂麈上。香港眾志面對唯一的立法會議員羅冠聰或許會被DQ，失去議席、資源及議會話語權，黃之鋒有時會想：「每日做緊地區工作，但如果阿聰下個月就俾人DQ，件事可以持續到幾耐？我又到底做緊乜嘢？」

他時有質疑、但很少猶豫，總之就是要回到一個政黨必須全面化的基本步，「公民充權唔應該只喺充滿張力、政治矛盾嘅戰場上發生，要令到社區都能夠開展一場又一場運動，先會帶來真正嘅改變。」

下集再談香港眾志的地區工作與反思。