【旺角之亂】娛樂多籮蘿 最愛蒲信和 居民：混亂但畀到安全感
旺角是許多電影的題材，因為在街角及巷弄之間，蘊藏了多姿多彩的生活故事。在城市學的角度，這稱作「多樣」。旺角從1910年代起，發展出各式各樣的商業及娛樂，更蘊釀出獨有的文化。由滿足勞動階層的需要，到轉營至中檔次消費場所，每個階段猶如大自然的更替。然而，政府與發展商的摻和如同擾亂了旺角的生態，旺角獨有的街道又剩下了多少？
回到問題的基本，在追逐潮流及數字時，城內人的故事，我們又知道多少？
攝影：余俊亮
我們對旺角的印象，恍似總離不開「亂」——行李箱、易拉架、垃圾桶旁的紙箱及竹簽。不過，對郭斯恆而言，這裡則充滿回憶。他曾居住在旺角花園街20多年，最喜歡旺角的密集和多變。「旺角就係唔統一，有人覺得呢度好岩巉、好混亂，但呢個係旺角精彩嘅地方。」
相約郭斯恆在旺角訪問，腦海正搜尋附近的咖啡店時，在旺角長大的他提議到金華冰廳一聚。與鮮奶咖啡相比，奶茶菠蘿油的確更「貼地」。茶餐廳裡嘈雜聲不絕，食客擠擁在一枱，侍應姨姨亦不時上錯食物。然而，如此雜亂無章的地方，更教郭斯恆覺得自在。他咬了一口菠蘿包，緩緩地說：「你鐘意旺角，係因為佢嘅雜亂，佢嘅混亂，但同時會畀到你安全感。」
【旺角之亂】鍾情旺中、Lolita 旺角女生：呢度嘅定位就係Cheap
1960年代，郭斯恆的父母在花園街做小販維生；自此，他的生活與旺角街頭密不可分。年約40歲的他於去年出版的《我是街道觀察員——花園街的文化地景》寫道：「花園街對當時讀中學的我並沒有產生甚麼好感，這是因為街道總給人一種污穢、落伍及基層的印象。」他坦言，當時小販的社會地位低微，覺得自己的家庭背景不甚光彩。「當時唔敢同人講自己屋企做小販，幫手睇檔果陣，好驚俾同學見到。離遠見到有同學，我就會走咗去。」他笑說。
郭斯恆小時候抗拒留在花園街看檔，便往旺角不同角落裡鑽。然而，旺角密集的街道，猶如一絲絲神經互相交織，他從小就摸清不同街道的特性。「上海街、新填地街賣材料、做維修，我哋唔會去；砵蘭街又是紅燈區，都唔啱我哋。所以會去彌敦道、洗衣街附近，嗰度多地鋪、商場，自然多嘢睇。」他頓了一頓，指著餐廳門外說：「還有弼街以前滿街都係熟食小販，我成日都篤串魚蛋先返屋企。你想像下出面日日都好似深水埗桂林夜市咁熱鬧。」
旺角的「旺」源於位處交通樞紐，1960至70年代聚集了小販、運輸工人、小巴司機等勞動階層，因而衍生各種娛樂事業及黑社會活動。郭斯恆當時身處其中，是否看過「曬馬」、「劈友」等情境？他吃吃笑說：「係電影令到成件事誇張咗。」雖然沒有見過「大場面」，但他說收保護費、「接放學」倒是見怪不怪。「中學嗰陣俾幾個𡃁仔問攞錢，但我話『冇錢啊』，跟住俾人打咗幾鎚。」郭斯恆一邊呷著奶茶一邊說，語調輕鬆得像是分享家常事。難道當時不會害怕嗎？他瞪大雙眼說：「佢哋都驚㗎，大家鬥驚。因為班𡃁仔同我差唔多，都係13、4歲，可能仲係住附近。」
生活在花園街，屋苑保安、商場平台一概從缺；旁人或許覺得失去安全感，郭斯恆卻認為，這才最貼近街道的面貌。「街道個感覺係好真實。有時凌晨兩、三點，會聽到條街有人大叫『打劫』，有時叫『非禮』，我唔敢望出窗，但成條街都知道發生咩事。」他形容，入夜後街道烏燈黑火，的確令街外人擔驚受怕。「熟路嘅，就知埞；唔熟嘅，就一定驚。」然而，郭斯恆從小在街頭附近生活，早已學懂自我保護。「我都會驚。每次出門，屋企人都會提我哋要小心生保人。同埋知道機舖、波樓呢啲地方會雜，咪少啲去。每到入夜，我都會返屋企。」
居住在旺角，縱然擔心治安，但另一方面卻教人羨慕不已。從前交通不便，城外的人不惜每星期花個多小時車程，也要到旺角逛逛，深怕錯過時下最熱門的小食或衣飾；但郭斯恆每天都在這花花世界穿插，他流露著滿足的眼神，笑說：「以前得閒，就會想落街睇嘢。呢度可以睇金魚，下條街係賣衫，再下一條就賣電腦、波鞋，每一條街都好獨特。細個已經有意識，就係一落街就多嘢睇，唔駛搭轉小巴先至有娛樂。」
信和永恆 通往外國文化的窗口
我們離開了餐廳，站在弼街及通菜街交界。他指往太子方向說：「旺角可以用區域來分別我的活動範圍。近花墟有撻大草地，成日就去踢波；右邊（即西洋菜南街一帶）就會去千里達模型，跟住再行前就係信和。」
提起信和（即信和中心），郭斯恆頓時雙眼發光，他興奮地說：「你知道信和係永恆㗎嘛，以前行信和，就可以沾到啲日本文化。」信和自1980、90年代起為漫畫、明星照片及唱片等潮流集中地，當時更創有「信和指數」——單看明星相片於信和的銷量，便知道誰是當時的人氣明星。
當年互聯網尚未發達，信和彷彿是郭斯恆接觸外國文化的窗口。他說中學時代，特別鐘情於日本潮流文化。「以前有本《新時代雜誌》，頭幾頁就係日本明星嘅相或者訪問，睇完就會去信和留意吓。」記者好奇，郭斯恆視哪個明星為「女神」呢？他露出了靦腆的笑容，緩緩答道：「很多吧...…松田聖子、友坂理惠、酒井法子、松隆子，哈哈，其實我都係買模型比較多呢。」
在郭斯恆眼中，信和是永遠的潮流指標；但時代不停流轉，酒井法子、友坂理惠的海報早已換上一張張韓國面孔，唱片店亦變成售賣精品的地方。然而，郭斯恆並沒有因而感到可惜。他在櫥窗兩旁不停張望，像是小孩走到玩具店一樣。當我們看到幾個中學生在走廊嬉鬧，郭斯恆回個神來說：「賣嘅嘢係唔同咗，但氣氛仍然都係咁，以前就像他們一樣，放學就會嚟行下，唔買嘢都覺得好enjoy （享受）。」
被花花世界「寵壞」 住屋邨覺得乏味
郭斯恆曾經覺得，他永遠也不會離開這個樂園，但業主於1997年決定收回花園街的單位，他們一家自此搬到典型的工廠住宅區——葵涌。他對「新家」第一個反應是：「悶囉。公屋到處都係一式一樣，賣嘅係日用品，唔會再有日本嘢睇。以前走落街就可以食糖水，喺屋邨邊度有糖水鋪？」生活在旺角多年，郭斯恆猶如被寵壞的小孩。他說以往從樓梯跑下來，便可鑽進不同的街道；但屋邨要經過保安，附近只有球場、公園，生活十分乏味。「搬走之後一樣會去旺角行街、睇戲，但始終與生活是兩回事。」
郭斯恆一家早已紮根在花園街，與其他小販檔主成為了好友。「因為大家都是街坊。以前媽媽收檔會跟他們打牌，又會一齊飲茶。」無論工作，還是生活都離不開這條街道。「那時候全家人都不開心，好唔捨得。因為以前家人工作累了，就可立刻上樓休息，或是叫我們去頂替；但搬了之後就麻煩了許多。」他無奈地道。
與住宅區相比，旺角商店密集，人口多，街角亦堆滿易拉架及貨品；可是，郭斯恆認為這是旺角獨有的風景。「旺角就係唔統一，當然有人覺得呢度岩巉、好混亂，但呢個係旺角精彩嘅地方。每日都好energetic （活力），好似有好多嘢彈緊出嚟。」
【旺角之亂】鍾情旺中、Lolita 旺角女生：呢度嘅定位就係Cheap
當旺角也變得枯燥
葵涌的刻板讓郭斯恆感到納悶。然而，旺角在這十多年來，陸續有商場遭連鎖品牌收購，成為單一的大型商店，而波鞋街（即洗衣街）亦即將重建成住宅及商場。昔日多姿多彩的地方，彷似逐漸變成枯燥的城市。 郭斯恆搬離20多年，現時偶爾才到旺角閒逛。這天他在訪問前一小時來到旺角，重遊以前常常經過的舖頭。他笑說，小時候踢波「拗柴」時，家人會叫他到胡文彪鐵打館。但每次經過，他都會很害怕。「因為鐵打館門外貼了很多『拗柴』嘅相，還有X 光片，覺得好核突。」話音剛落，他突然收起了笑容，淡淡地道：「雖然那時候很害怕，但現在望返轉頭。你知道這些東西不會在商場找到，因為商場一定包裝得好靚、好乾淨。」
1997年，政府與私人發展商合作，將雀仔街清拆變成了朗豪坊；十年過去，如今他看到波鞋街面臨相似的情況，無不感到唏噓。「頭先行（波鞋街）覺得好錯愕，竟然會變成靚住宅。旺角係一種好草根同大眾嘅文化，但如今逐漸成為中產人士消費嘅地方。雖然唔係罪，但變相趕走細商舖。」
我們最後回到故事的起點——花園街，看見兩邊牌檔依舊熱鬧，會否擔心連僅有的回憶也會被奪去？郭斯恆淡淡地說：「我覺得永遠都有生存空間。旺角好代表到香港其中一個特性，就係能屈能伸，點都有狹縫可以生存，但咁樣係咪就值得自豪呢？我就覺得好可悲。」