曾尋死的人演出過去　單親、欺凌、失戀傾訴無門：社工話好小事

Suey說，那是「立立亂」的一年：「中三嗰年發生好多嘢，我同當時嘅男朋友係嘈得好緊要，加上我喺班入面俾人蝦，諗過自殺。」事過境遷，Suey現在已經大學一年級，多年來已無提起這段往事，直至成為《鈴蘭》這套話劇的演員，才重新面對埋藏於心底裏的傷口。
這天晚上正為星期六演出的話劇排練，她與另外6位演員穿上全白色的戲服，重演她中三那年面對的困境。她說：「這是個風水輪流轉的故事。」
攝影：鄭子峰

欺凌他人結怨被報復：有種俾人除晒啲衫審犯嘅感覺 

小學時，Suey的朋友屈指可數。升中後，她結識了4個經常到處「蝦蝦霸霸」的朋友。為了「埋堆」，她模仿她們「火爆」的說話和做事方式，群起到處欺凌別人。她曾經將同學的書包丟出走廊，撕爛別人的功課，在操場脫下同學的褲；為了懲罰向老師告發的同學，Suey一巴掌打在對方的臉上；每隔兩、三個月就被記一次缺點。她還覺得當時「好威」：「覺得好玩，想令人覺得尷尬、不知所措，好鍾意睇佢哋咁樣嘅反應。」 誰也沒想到，昔日欺負人的Suey後來失勢。 

中二起，Suey的壞同伴逐一退學，只剩下一個同伴，勢力大不如前，曾被欺凌的同學對Suey「報復」，連唯一的朋友也選擇離她而去：「我唔知（點解），可能佢唔想俾人Bull（欺凌）囉。」到了中三，她的世界陷入一片黑暗。

Suey每天上學回到班房，就得面對半班以上同學的欺凌：「我喺學校我真係好唔開心，我會由放學返屋企喊到返屋企。」有同學恥笑她肥，弱小的心靈很在乎，她刻意讓自己「變靚」。
總之都係唔想佢哋再講我任何嘢。」 曾有一次，幾位同學無故搶去她的外套，指著外套上的污漬不斷恥笑：「咁臭㗎。」半班同學圍觀着，他們將外套拋在地上踐踏，踏碎Suey的自尊：「有種俾人除晒啲衫審犯嘅感覺，真係無地自容。」為了逃避，Suey曠課，兩個月沒有上學。 

缺乏家人關心傾訴無門　社工：呢啲好小事

那時單親家庭長大，早就習慣獨自承受一切，也沒有固定的家：「我成日俾人當波踢來踢去，搬咗好多次。」有時跟着姑媽或表姐同住，家裏的「大人」也不時常關心自己：「寒喧幾句實有嘅，深入嘅真係唔多，好少同佢哋講心事。細個都唔敢同佢哋講，成日覺得佢哋好惡。」「好惡」全因為他們動不動就「爆粗」。Suey曾以為駐校社工是唯一可以分享感受的對象。

有次社工邀請Suey到社工室，她說出被欺凌的事件和感受，但感覺完全沒有任何幫助：「佢淨係成日問我最近ok嗎，我唔ok，同你講完有用咩？」欺凌的情況不斷，Suey還記得社工曾經向她說：「唔使擔心，呢啲好小事㗎咋，你忍多陣啦。」Suey只覺無奈：「哦，我可以畀咩反應佢？」她也不再寄望社工的拯救。

被男友背叛　引發尋死念頭

每天飽受欺凌，同時還要面對男友的辱罵：「用粗口鬧我，話我公廁，好難聽嘅說話，係接受唔到。又周圍講我，但係我乜都冇做過，其實真係好hurt（傷心）。」苦無傾訴對象，堆積負面情緒。一切也在瀕臨爆發的邊緣時，Suey發現男友有第三者。

「係好多個結扣晒埋一齊，解唔開。」Suey決定.....

如果你是Suey，你會怎樣做？《鈴蘭》劇場特別之處在於觀眾的參與，故事發展到一半，演員會邀請現場觀眾建議解決辦法。 

重生、改變

後來的Suey如何呢？

分手以後，Suey打算從家裏的窗口一躍而下，結束一切。

那時嫲嫲及時哭着阻止：「做咩自殺啊，嗰啲男仔唔要罷就啦。」Suey回頭凝望嫲嫲擔心的樣子才醒覺：「嫲嫲係一手一腳湊大我，所以我好錫嫲嫲。佢拉返我返嚟，我就覺得唔可以再令佢傷心。自己諗返起都覺得有啲心痛，做咩要搞到咁， 因為嫲嫲我就冇選擇自殺。」 

Suey鼓起勇氣重返校園。因之前曠課，起初Suey被學校停課，兩個月的時光都在圖書館渡過：「嗰段日子，喺圖書館裏面咩書都睇過。隨機抽咗本書，其中一句說話就係，其實你唔需要理人哋點樣睇，係你點樣睇自己。嗰吓就開竅喇。」Suey學會將別人惡意的批評不放在心上。

重讀中三，新同學不清楚她的過去，Suey也一改舊日「火爆」的脾氣，注意自己的言行。

演出自身故事：畀個機會自己面對返

Suey升上大學，鮮有重提往事，有朋友向她介紹《鈴蘭》生命教育劇場，讓參與者要分享曾面對過的難關，將它化成故事演出，藉此勉勵正受困的青少年，同時讓人關注青少年的問題：「嗰陣細個，依家想用返21歲角度去睇吓，同埋畀個機會自己面對返，因為都收埋咗好耐下。」 

排練過程中，雖然Suey說有種傷痕被挖開的感覺，但也能解開心結。故事發展到一半，演員會邀請現場觀眾建議解決辦法：「有一次我就揀咗同中一畀我蝦嘅人道歉，嗰一刻真係淚崩，好似做咗一樣一直想做嘅嘢。依家當然冇機會去做，因為我已經搵唔番佢。」 因為演了出來，才知過去了，疤痕未有平服。

負責計劃的基督教香港信義會青年才藝學院助理經理（劇場及培訓）鍾俊彥說，《鈴蘭》代表希望和幸福，也有「零難度」的意思：「每個問題總有佢解決嘅方法，有時可能我哋鑽牛角尖，或者我哋唔知點面對、點解決，唔識開口問。我哋開口同人講、求助嘅時候，其實解決方法總會有，仲有好多選擇。呢個就係成個劇場最重要嘅訊息。」 

生命教育劇場社區演出＠觀塘 VESSEL 03
日期：2018年4月7日（星期六）
時間：下午二時至四時
地點：觀塘 VESSEL 03 （觀塘海濱道86號）
費用：全免
查詢電話：21533940（香港青年才藝學院）