被要求半天內送100個LV到菲律賓　禮賓服務公司職員：富豪有修養

Edwin在專為上流社會提供「禮賓服務」的國際精英會(Quintessentially)工作。所謂禮賓服務，說穿了就係只要你每年交40000至10多萬不等的會費，你想做乜都有人幫你願望成真。上集提過幫人在埃及金字塔辦婚禮，為客人的卧病在床的女朋友煮一碗難食的粥，都是有錢未必辦到，但無錢一定辦不到的事。為有錢人疲於奔命多年，Edwin如何理解他工作的意義和錢的價值？

無數個一小時極限挑戰  

「我覺得我哋的價值之一，就係快。」如要求一小時跟某名人見面；一小時準備50個蛋糕送往不同公司；有客人想替同事慶祝30歲生日，要求一小時準備一千個氣球，塞滿整個辦公室，Edwin這位業務發展經理都要幫手吹。又有客人曾要求一小時內準備30個國家的銀幣，同事在公司內部廣發電郵，全公司即進入玩「收買佬」的氣氛，將身上所有硬幣拿出來。

上集：「禮賓服務」收天價會費為富豪解難 「沒有不可能的任務」

似特種部隊  不能取代的成功感

「有個客喺某個地方，見住個夕陽好浪漫，突然想求婚，就揾我哋幫手。」夕陽下山快過燒香，同事放下話筒，即大叫：「佢要求婚！」「成班同事好似幫兄弟咁，立即買戒指運過去，訂餐廳。難在你同客溝通機會少，靠你平時對客的了解。」又有一次，客人晚上七時要求明天清早要有100個LV袋運過去菲律賓：「你知啦，就算你買個銀包，最後都有好大個盒，客人又要揀吓款，十幾位同事即刻落舖買，最早班機運過去，客人一朝早瞓醒就見到。」Edwin：「有時候覺得好似係禮賓服務界嘅的特種部隊。壓力係有，但每次成功之後，嗰種成功感係冇嘢可以取代。」

有錢人好有修養不難服侍

說到底，他們做的就是客戶服務，潛移默化地認為「客人永遠是對的」，經他們口中出來的字，都變得漂漂亮亮。如Edwin說香港客戶與內地客的不同，在於前者重視細節，後者重視「presentation」。所謂的細節，就是香港人會要求酒店提供羽毛枕頭；內地人重視presentation的意思是「入到酒店的時候有人出嚟歡迎你」，其實就是「門面工夫」。即使客人要求將酒店房間換成自己喜歡的顏色，公司員工就厚著臉皮替客人跟酒店磋商。

在他們眼中，更沒有濫用服務，又或是奢侈這回事。記者問Edwin，可曾覺得那個要求100個LV袋的客人好荒謬、窮奢極侈，真否是為客人提升生活品味？在他及同事眼中，他們看不到荒謬，卻把客人的要度都當成挑戰，著眼於同事們危機處理的能力。即使有錢人的要求千奇百趣，「但唔好覺得有錢人一定好囂張，好難服侍，佢哋好多都好有修養，不但好有禮貌，會稱呼我們的名字，會收到他們的感謝信，有會員甚至會在聖誕節送迪士尼門票畀同事一家。」縱然有少部份客人打來為求吹水，「唔代表有錢人一定係寂寞，咁咪建議佢睇吓咩話劇囉！」

客人要求不荒謬  卻能突顯同事「解決問題能力」

我無法判斷Edwin是因為孭住公司的牌頭的緣故，或是被洗腦，或是真心認同，他只是說：「我哋經常遇到好多突發嘢，同埋同事好有創意同思想開放，所以唔會大驚小怪。我哋第一個想法唔係荒謬，係點樣解決到件事。就呢件嚟講，係突顯我哋危機處理的能力，多於客人提升生活品味。」

「如果你唔係一個 解決問題的人，你冇可能做到呢份工。」更準確而言，仇富更沒可能做這份工。

「我哋會諗好多新嘅嘢inspire啲客。」一如既往，「inspire」一字很漂亮。這些啟發，包括在芬蘭雪地地開林寶堅尼；在科學家陪同下坐潛艇進入鐵達尼號；駕坦克車感受發炮的感覺。有錢人的資金成為他們發揮想像的資本。「呢份工有冇影響你對金錢的看法？」記者問。Edwin如是說：「食幾多，住幾多係整定。只係按自己入息去衡量。我只係覺得佢哋享用嗰筆錢應有的價值。金錢應該用得其所，呢個就係我對金錢概念上的改變。」他們從不著眼與客人之間的距離，同事們都摸索出與有錢人相處的一套模式，「自己尊重自己，看重自己價值，人哋會信任你。」