【實測】領展有冷氣街市達29度　裝冷氣翻新加租近十倍：寧願唔裝

全港76個濕貨公眾街市，現時只有19個街市有安裝冷氣，向食環署爭取安裝冷氣的街市商戶，苦等數年食白果。日日困在室温32至34度的街市，大圍街市雞檔阿姨啜核回應：「你幫我爭取到有冷氣，我就接受你訪問。如果唔係，你唔好問我，你問啲雞。」對比私營街市，無論雞與檔主，命運不盡相同，嘆住冷氣卻有苦自己知。

已裝冷氣的街市

啟田街市　實測室温29度  冷氣裝咗等於冇裝

記者統計領展及其外判街市承辦商下80多間街市，有49間街市經已安裝冷氣，速度比食環署快得多。安裝冷氣後街市又如何？近日有報導指位於藍田的啟田街市，冷氣壞了兩個月仍未修理，有檔主向鏡頭舉高雙臂，展示腋下的汗癬。記者致電啟田商場保安閒聊：「我想問啟田街市有冇冷氣？」保安叔叔好老實：「冷氣係有，不過好勉強。」記者：「點為之勉強？食嘢會唔會流汗？」保安：「食嘢一定會流汗，不過你過嚟試吓啦，𠵱度有檔車仔麵好好食，流汗都抵。」

記者逐前往查探，冷氣系統正常運作，不過攞個温度計出嚟度一度。嘩！29度喎！行近熟食檔，更有30度。問及豬肉檔、牛肉檔及生果檔檔主：「請問之前𠵱度係咪壞冷氣？」他們竟然不約而同地回應：「吓？壞咗咩？不過，𠵱度有冷氣同冇冷氣，其實都冇乜分別。你塊面都出晒汗啦妹。」啟田街市現由宏安承辦管理，指就啟田街市空調系統作出多方面改善，包括啟用後備冷水系統、優化空調設施、冷風機。對於報導指街市冷氣壞了兩個月仍未修理，及冷氣不足的原因，公司一概給予Siri式的回覆：「街市空調系統運作正常。」

同樣是領展旗下的天水圍天澤街市翻新後，兩層街市縮水至一層，近150個商戶中86戶「冇得留低」，續約商戶亦被加租約兩至四成。當中原本月租3萬的小食檔，承包商向檔主提出以7.5萬元租用面積略大的新舖，卻要付5萬元入場費。私營管理公司加租後，租戶仍需每月付5000元冷氣費。但天水圍街市涼茶舖檔主則說安裝冷氣後依然悶熱，「條氣唔順。」

準備翻新的街市

大窩口街市　菜檔阿姨：「如果有得揀，我寧願冇冷氣」

領展旗下，現由光亮實業承辦的大窩口街市，已超過30年歷史，極為殘舊，吊扇老殘以龜速轉動。承辦商將替街市翻新安裝冷氣，預計年底重開。光亮實業負責人林先生指認為大窩口街市亦是葵涌邨街坊必經之地，而且將有新居屋落成，認為街市有發展潛力才願意花八百萬元翻新街市，「將工程費、電費、維修費等成本攤分六年計，商販share返條數，就係每月嘅冷氣費。」至於各檔口冷氣費比例及多少，未有定案。

大窩口街市以改衣為生的吳伯伯，早前接受《01社區》訪問時指承辦商藉加租趕走不少租戶，自己去向未定。林先生卻大叫申冤，強調加租計算方法好科學，「我哋絕對唔係獅子開大口。」更重要他期望原有租戶願意留下，更指吳伯伯將於其他檔合租，但吳伯伯否認：「我原本三千蚊租，加到一萬蚊，之後嗰舖幾大又唔知，點夾？」

林先生指不同類型檔口，付租能力不一，加租幅度不同。魚檔向來付租能力最低，「對於魚檔，我哋反而好平租，比優惠佢哋，求佢哋留低幫吓手。我哋明白原有檔主最明白𠵱度街坊需要乜，街市最緊要有人情味。」他指現時7成商販會續租，3成檔口仍未招租。

不過，當記者問及街市內唯一一檔淡水魚檔，老闆和老闆娘動怒：「佢呃你咋。我哋原本幾千蚊租，之前佢話招租投標，要我哋一定要填5.5萬元，唔可以填低於或填高於𠵱個價，結果嗰檔租咗畀外人，我喺𠵱度幾十年喇。之後係點，完全冇同我哋傾過。」光亮指街市翻新後，一般魚檔收取2萬元租金，但已包冷氣及管理費，「原本佢哋都萬幾蚊租。」但有魚檔指光亮指的3萬元只是工程進行期間臨時街市的租金。

林先生又指豬肉檔是街市中最賺錢的檔口，豬肉檔檔租大約每月7至8萬元，「其他街市要10萬蚊㗎。」記者直指曾在街市向四位豬肉檔商販查問，檔主們指街市內所有原有檔主「冇得留低」。林先生卻要申冤：「哎呀，有一個係佢自己話要退休。有一個係佢喺出面交開貨，有其他生意話唔租。」其中一檔豬肉檔檔主反駁：「佢都痴線嘅，根本冇同過我哋傾。行內人全部都知，承辦商自己做返豬肉檔，改唔同檔名扮唔係壟斷。」他還指：「如果係7、8萬蚊我都租啦，佢都冇問過我，我被逼退休咋。」林先生仍強調：「嗰嗰人都隱惡揚善㗎啦!你頂唔順咪走囉！你認為貴咪唔好租。」

至於其他檔口如凍肉舖，檔主稱去向如何仍未有定案：「原本我哋兩萬蚊租，佢哋一口價加到七萬。唔知會點，睇吓佢哋會唔會減價。大佬，七萬蚊，我自己連人工都冇。」一位菜檔老闆娘指已跟公司洽談，將來會在街市續租，舖位大一倍，租金由3000元加至約5萬元。「冇冷氣同加租有冷氣，你點揀？」老闆娘：「梗係冇冷氣啦！」

未安裝冷氣的街市

禾輋街市　原本好通風　但領展封死通風位

領展期下的沙田禾輋街市現外判「好眼光」承包管理，現時未有安裝冷氣，室温接近34度，有檔主甚至7把風扇強攻。整個街市的豪華位，非雞檔莫屬。管理公司為雞檔提供一個座地式水霧風扇，以及一部通風機，其他檔主「恨都恨唔到。」全因活雞檔是街市的靈魂。然而，雞檔檔主何生概嘆：「我喺𠵱度30年。你知唔知，𠵱個位原本對正外面花園，好通風，夏天都唔使風扇。可惜領展接手後加道牆封死通風位，而且加密街市檔口更加悶侷。」他還投訴街市管理不善，致衛生「離譜」，晚上成千上萬的老鼠大開派對。