【回歸20年】目送雙非、賣淫、水貨客　入境處職員：我們難以把關

「有冇報名考入境處啊？」不論畢業於哪學系，親戚總是喜歡問這道問題。無他，入境事務主任薪金由$32370起跳。應是香港少有可以長嘆冷氣、不用入火場而人工高的鐵飯碗。80後的阿熙（假名），於2010年後入職入境事務處，畢業時他說過：「呢個世界上有兩種工，一種係揾到錢但冇興趣，一種係有興趣但揾唔到錢。」他，心無雜念，選擇了前者。
香港回歸20載，深圳口岸出入境人數從1997年的6,100萬餘人次，增至2016年的2.39億餘人次，增長近3倍。密密麻麻的內地旅客如洪流，入境職員如石頭般站穩洪水中，打撈碎石－－水貨客、賣淫、假結婚、雙非等等心懷鬼胎來港的人，一不留神從他們手中漏掉的魚，足以影響香港的命運，但阿熙說：「我們其實起不了把關的作用。」

水貨客隨時代而變遷

現時每月內地訪港旅客約300多萬（2017年4月共352多萬內地訪港旅客）。每年入境關口「淪陷」的日子，除了10.1黃金周（2016年10.1黃金周內地訪港旅客錄得5.89億人次）、今年5.1小黃金周逾49萬內地客訪港，落馬洲及羅湖管制站分別承受12萬旅客人次。「除此以外，還有工展會、一田、Sogo大減價，一田就最犀利，全世界大肚婆擁去一田買BB嘢。」阿熙說。幾億人蜂擁而至，「閉路電視的畫面係見唔到地板」。同期入職的同僚起初還會拍下如此盛世，幾年後已麻木。

每天被截查的內地旅客，9成都是水貨客。阿熙說他入行時，水貨客有樣睇，拖着一篋篋，「有時猖狂起嚟佢哋係推板車，兩個紙皮箱都係貨。」今時今日的水貨客變得收斂，沒有紙皮箱的囂張，換成一式一樣的膠袋，「𠵱家佢哋係兩手揈揈去香港，走嘅時候拎兩袋嘢，入面裝滿唔同嘅嘢，扮晒嚟旅遊樣樣買啲返上去。」

從「一簽多行」到「探親證」

阿熙說：「我們見證住時代的變遷。」2015年，政府為減水貨客，將深圳戶籍居民的「一簽多行」改成「一周一行」。雖然收緊政策，「但是大陸對水貨需求冇改變過，香港水貨係供應全國13億人口，道高一尺，魔高一丈，佢哋就用探親證。」所謂探親證，即要求內地人的伴侶或有直系親屬居港，他們就能中港兩地不斷穿梭，利用探親證走水貨。「佢哋好『孝順』㗎，日日落嚟照顧外父。出奇在嗰女永遠唔落嚟。」又或是「阿蛇，我落香港幫阿囡打掃。」「你又去幫阿囡打掃？」除了回一句反問顯示自己的機智，入境處職員根本沒有理由不放行。「你今次唔放佢走，佢同一日已經帶嗰老人家嚟證明，你又要放行。」那種無奈是，「明知佢好快又翻生。」

幾年後的暴躁與枯燥

阿熙說做了幾年的同僚都變得洩氣。大家會呻？「𠵱家唔會，都知道玩法係咁。」脾氣暴躁？「普遍一係就躁，一係就枯燥，因為日日都係做routine（例行）嘅嘢。」管制站口一般做法是，關口櫃枱入境處職員懷疑旅客入境者目的，便會截查他們「入房」進一步檢測，「佢哋（櫃枱職員）每日截查幾百隻個案，唔比佢入只係幾十隻，起唔到把關作用，為做而做，交數，枯燥囉！」

水貨客的演技 VS 阿蛇的作風

入職前的特訓就只是熟讀入境條例，教授面對旅客的言談舉止、工作程序、打鬥技巧（但用不上）、步操，還有要減肥。至於面對內地人各種「出奇制勝」的謾罵技巧，「冇教㗎喎！都係自己浸出嚟。只會講見面時大概從咩角度了解佢哋入境目的。」因此，阿熙說作為入境處職員，先要摸索出自己的路線。一種是硬朗型，聲如洪鐘，與水貨客鬥惡，總之「我就是權威」，「我叫你坐低啊，嘈咩嘈」就是這種劇情的場面。「通常力竭聲嘶時，雙方就心口貼心口，不過唔會打交，除非對方郁手。呢個時候通常其他同僚就會蜂擁而上圍住佢，震攝佢啫。」其餘等候中的水貨客就食花生睇好戲；阿熙卻走文風，以理服人，「我只想解決問題，希望大家好嚟好去，令佢哋含笑而去。」

面對風格不一的入境職員，一般水貨客都做好兩手準備，兩套演技。「有啲不斷鬧鬧鬧，『國家證比我入，你做乜唔比我入啊？』然後坐喺度扮暈或者無端端發羊吊（羊癇症），喺地下典吓典吓，都幾似㗎！」入境處職員不是醫護人員，不敢妄斷，將其送至醫院，「即係入咗境㗎喇。」有些婆嬸說起家中境況，「死『lur』，比次機會吖，比次機會吖，屋企有老人家要照顧啊。」，又或是「仔囡都係香港，有孫，冇辦法啊，兩個都要出去做嘢，得我照顧，我都唔想落嚟，」更使出《我是歌手》觀眾一貫作風，聲淚俱下，「當然，當中有真有假。」

教化走水貨的青年人

管制站入境處職員每更8小時，接收4至50個真真假假的故事，就算面前放着一桶眼淚，阿熙多了理解，卻不寄予同情，始終掙扎求存還有合法的辦法。曾有年青的水貨客進來，他還試着「點醒」對方：「你走水貨賺到幾多錢？你𠵱家幾多歲？你諗住走水貨走到幾多年？有冇讀書？佢哋話冇讀。咁你諗住點，好似出面阿叔咁，走水貨走到幾十歲？你有冇諗過自己想點？」年輕人如夢初醒。現時走水貨的人，7至8成都是香港人，「但佢哋都未住夠七年。」

跨境害蟲？

「一班老屎忽成日叫跨境學童做跨境害蟲。」眼看內地父母經常利用孩子書包走水貨，「一疊疊錢塞落書包」，阿熙一番感概。水貨客早已分析好內地海關哪時段哪關卡鬆緊的節奏，他們就在微訊群組通風報訊，「有啲媽咪帶住細路喺關口等適當時機，細路就踎喺地下做功課，或者幫手執貨，佢哋細個要幫手揾食，冇得專心讀書，然而他們就是香港未來的一群。」

最難搞的假結婚案

水貨客最易處理，最難搞的是假結婚、賣淫個案。「講真，點證明兩個人假結婚。」假結婚的男女當然夾好口供，通常自稱相識不久，朋友介紹，「老公興趣係乜，平時邊個煮飯啊？」這些問題他們都對答如流。「是有一次，查看男女出入境紀錄，相處時間只得一日，就話大咗肚，生理上係有可能，但一擊即中呢啲嘢......」每一秒都是一個掙扎。

內地人行E道的禍患   難截賣淫個案

香港為求快，2012年起，內地旅客只要第一次在櫃枱過關後，往後就能經E道出入，變相更難查截來港賣淫的女人。如何辨認出來賣淫的女人，「有的明顯是濃妝豔抹，低俗的性感，有一些外表稍見樸實，但只要翻開行李，原來內有乾坤。她們總會有一對高跟鞋、化妝品、燙髮器，還有消炎藥。」，「無親無故成日落嚟香港，嚟香港咁多次都係去元朗、旺角，冇去過任何景點，就知唔妥。」守在櫃枱的職員就要眼明手快，20秒內感受那股邪氣，決定截查與否。「推行E道難截查，＿唔可以吓吓打開人哋行李，惟靠在入境後掃黃執法。」

不再憎恨內地人

對內地人而言，香港是罐舔不盡的蜜糖；香港人眼中的內地人是拔不掉的毒針。入職前的阿熙很討厭內地人，數年間接觸幾萬位內地人，體會到不能一概而論。「對佢哋嚟講走水貨只係幫朋友攞啲嘢上去順便賺少少錢，唔算走私，你要教佢哋。」好些內地人見面幾次，阿熙看到他們態度的改變，「唔再起䚗發癲。」但只要換來一位硬朗派同事，他們又故態復萌。他們會跟阿熙說：「頭先嗰個同事都唔係咁嘅，佢應該好似你咁吖馬...要講道理先得。」這時阿熙會回應：「無計啦，同事做咗成日做到躁啫！」

 阿熙喜歡這種以理服人的感覺，說：「孺子可教囉！」