【見工必勝】不要做求職者，只做應徵者！被壓價應該企硬有原因？

當讀者透過面書問我見工問題，我多數都會盡快答，因為我知道好多人都好怕見工，覺得似考試。而其實你只要諗通一點，就唔會再驚見工——「你未入間公司就已經要做下靶，入咗去你仲有人生？」所以大家要學做「應徵者」，而唔好做「求職者」。

作者：詩寧

求職者同應徵者的分別

求職者：字面就已經輸咗，心態係「求」一個職位返嚟。

應徵者：公司「徵」人在先，你覺得自己係合適人選而去見面。

打一份工，你需要公司畀你嘅錢，公司同時需要你嘅才能同時間，屬等價交換，公司並唔係派錢畀你，佢係喺你身上買嘢，咁點解你要「求」佢畀個職位你？入到去仲要受苦、受氣、OT……點解要「求」人哋去虐待你？

你上得網睇我呢篇文，我假設你唔係窮到冇錢開飯仲要養一家十九口，咁即係有條件慢慢揀工；唔敢揀，除咗懶就係冇自信，懶就抵你怨天尤人，自信可以慢慢建立。

見工其實係睇下自己喺市場上有咩選擇，而唔係去受辱或者被人挑剔，所以唔單只唔使「求」佢請你，遇到令人躁底的要求，你可以反問返佢點解咁奇怪，甚至係拒絕。

常見的躁底要求包括：

１）同一職位，要應徵者分三、四次上去Interview

我都曾經做過HR，有次我提議HR Manager同請人個部門阿頭夾時間一齊見個應徵者，點知個部門阿頭話唔好，因為佢覺得個應徵者最少肯分兩次上嚟先叫有誠意，呢啲諗法真係自私又無聊，大家都係打工仔，明白請假見工有幾難，要人為咗你份工請完一日又一日，仲要未必聘請佢，純粹浪費雙方時間。而且，請人返嚟做嘢，又唔係揀女婿，講能力、經驗同態度就夠啦，講咩誠意啫？

２）約好見工時間，個面試官遲到超過三十分鐘而無合理解釋

有啲老闆未請人就已經扮上靶，覺得對方準時而自己遲到先叫有型有地位，其實係冇禮貌咋。如果覺得自己個職位咁多人搶，不如唔好約時間，玩派籌吖？你估有無人排隊？

３）要求你準備定一份Project Proposal/Presentation去見工

試過幾份工，HR send email嚟話要做定一份proposal（建議書）拎埋去見工，我一睇就覆佢唔去，未出糧就想人幫你公司做嘢，傻的嗎？買idea係要畀錢㗎。

４）明明喺CV寫清楚Expected Salary，Interview都係要壓你價

Send CV比HR嗰時明明寫清楚人工要兩萬定三萬，間公司理應睇咗覺得畀得起先叫人去見工。好啦，見完覺得個人適合，偏偏又話人工唔適合，唔適合你又叫我嚟？係都要將$25,000壓到$24,000先開心，除非我真係好好好好好鍾意間公司，否則我通常都企硬唔減。𠵱家係你想買，又唔係我想速銷，我做乜要減價？