小心變成職場犯眾憎：成日呻想辭職，但又唔敢辭職原因是......

經常收到讀者Inbox向我講述佢哋公司情況，然後問：「辭唔辭職好？」其實問得呢條問題嘅人，都已經係想辭職。人人返工都辛苦，有啲人一話辭職就即刻好灑脫交信，又有啲人講咗幾年「我想辭職」都仲係得個「想」字，明明做得唔開心都繼續留低，究竟係唔敢走？唔想走？定無能力走？

作者：詩寧

成日呻辭職同事，你我身邊總有一個？

身邊總有啲同事開口埋口都係：「唉，辭職啦，仲留喺度做咩呀？」、「我考慮緊遞信架喇，搞埋呢個Project就攤牌，好頭好尾啦。」、「走喇，我拎埋份Bonus就走。」，結果，阿同事拎咗五年Bonus都仲未辭職，仲喺公司咦咦哦哦緊。我好鄙視呢類唔敢離開但又要嘈嘅同事，特別係年輕、無家庭負擔嗰批。

曾經返過一份工，某上司Christy出名變態，好鐘意鬧班下屬，無論下屬做咩都鬧，誇張到個下屬咁啱喺Christy心情唔好時經過佢房門口都被鬧。而且Christy好鐘意擦佢老闆鞋，成日都應承老闆一啲不可能任務，然後逼班下屬一齊硬食，例如，兩條team同老闆開會；

老闆問：「個藝術展嘅宣傳費用要幾多？幾耐可以完成？」

隔離Team答：「二十萬宣傳費，大約一個月搞掂。」

Christy諗都唔諗純粹為咗贏：「我好有信心，我哋Team用十五萬，三星期就夠。」

老闆聽到當然好高興咁決定將個task交俾Christy Team，但Christy班下屬就怨聲載道。做得好，領功的是上司；做得唔好，被插的是自己。

因此，Christy Team流失率好高，唯獨有一個後生女Jennifer日復日，年復年，日怨夜怨都仲未辭職。

我問過Jennifer點解唔走，頭一年佢話自己經驗未夠，驚出去無公司請，又唔想整花CV，想做夠一年學多啲嘢先。聽落都幾有道理，所以我間中都會借隻耳仔比佢呻下。

一年後，Jennifer口頭禪繼續係：「好想走呀，個Christy痴線架……」

但當我問：「咁點解你唔走呀？」

Jennifer：「走得去邊吖，出面咪又係衰，度度都唔好架啦。」搞笑，未出過去就已經覺得周圍都係咁？到佢再呻，我已經唔想理佢，又要留低，但又唔諗辦法解決面對緊嘅問題，得個呻字有咩用？

唔係話一有小小唔開心就要辭職，但唔敢走、唔敢反抗就唔好呻，廿歲唔敢變，呻呻下好快四十歲，然後就變成你好憎嗰個Old seafood。

我鄙視，想走又「唔敢走」的人......

我鄙視的「唔敢走」同事，係針對無經濟負擔嗰種。人大咗，開始見到好多密密硬食，忍辱負重嘅父母級同事，佢哋遇到死貓吞咗就算，即使比公司明恰明剝削，都唔會呻半句，因為佢哋知道自己生命個重心係家庭，亦清楚自己為咩而捱，這是值得尊重的。

所以，「辭唔辭職」唔係一個問題，問題係你知唔知自己為咩返工？點先會開心？