女上司善變、易妒忌？打工仔女有共鳴：「驚青」最令人無所適從！

上司有好多種，衰上司更加可以細分多種唔同衰法，例如：見高拜見低踩、塞死貓比下屬、用人唯親、搶功勞……種類之多夠講三日三夜，但今篇我想講下，有啲「職場毛病」係特別容易出現喺女性身上。
作者：詩寧

討論之前，我必須重申，並唔係話男上司比較好，只係男同女嘅衰嘢不相同而已。如果你係上司，停一停諗一諗，自己有冇唔小心犯緊以下乞人憎毛病？如果你係下屬，提醒自己，他日成為上司之後，千祈唔好變成咁樣。　

第一類：驚青　　

呢類上司處理日常工作安安穩穩無咩大問題，佢亦會希望下屬處理Project都係跟日常程序，唔好尋求突破、唔需要製造挑戰性。一旦出現突發事例如大老闆失驚無神將Project A嘅Deadline改早咗，驚青上司就會嚇到成個彈起、六神無主，衝去同班下屬講要做快啲，甚至打亂下屬手頭上工作，叫佢哋立即開會／立即開Project A個File出嚟睇下進度……總之手上處理緊乜都好，都要放低而優先處理Project A。

但若是一個好上司，收到大老闆Order之後，最基本嘅處理方法係先冷靜消化個Order，再諗諗每位下屬手上處理緊乜，邊個嘅能力、時間比較適合優先處理Project A？其他同事可以點配合？重點係，唔應該等到突發先叫同事開個File出嚟睇，而理應係一直都知個Project進度。　

第二類：妒忌

所謂棒打出頭鳥，職場上忌才好常見，大老闆睇好你咩？大把人眼紅，想盡辦法比陷阱你踩，阻止你升職。若妒忌係建基於「公事」，都有得防而且都合理，但有啲妒忌係更加無聊和無得避，就係純粹私人上睇你唔順眼，例如你上司覺得你靚過佢、後生過佢、好多男同事鐘意幫你……

曾經有個剛畢業的女同事Jennifer，比較鐘意著背心返工，皮膚白白而且幾受男同事歡迎，當時的女上司Christy經常問Jennifer：「乜你唔凍咩？」、「你屋企件件都係背心？」呢個係上司而並唔係你阿媽，無緣無故咁「關心」你冷暖，又點會無弦外之音吖，唔少同事都聽得出亦睇得見Christy眼神中的不滿，偏偏初出矛盧的Jennifer完全感覺唔到。

直到有一次，Jennifer喺一個Event當日請咗Sick Leave，令到件事有少少甩漏，Christy喺事後的檢討會議中「教導」Jennifer，並爆出一句：

「都叫咗你唔好成日著背心返工啦！公司有冷氣，點解你唔加返件外套？搞到冷親要請病假，少咗個人就容易出錯，其他同事要補你個崗位好辛苦㗎……XXXXXXXXXX我唔係想針對Jennifer，為咗成條Team著想，各位女同事配合下，以後喺office唔准著背心，必須要著有袖嘅衫而下身最好著褲，除非當日有特別Event要著裙。」

大家呆一呆互望，真係估唔到上司會將一件事嘅錯漏歸究於同事的背心上衣，而唔係檢討下人手安排之類。

相關文章：
女上司總是「生人勿近」？細數Boss Lady的「三宗罪」……

第三類：善變

「女性是善變的」，呢句說話你應該有聽過有遇過或者自己有做過吧？遇著一個善變的上司真係好痛苦，我舊上司Christy，佢嘅善變指數登峰造極，交一份唔重要嘅文件比佢，佢都會逐粒字同你睇、同你改，例如係自己Team內的會議紀錄（只係用嚟寫低ABC同事今星期要負責乜嘢），一句簡單句子如：

「Peter將於下周一前把Project A完成並交予Christy 簽署。」

佢會叫你試下改成：

「Peter將於下周一前Project A完成並交給Christy 簽署。」

好啦改俾佢，然後佢叫你試下再改：

「Peter將於下周一前完成Project A並交俾Christy 簽署。」

其實份會議紀錄又唔需要俾街外人睇，改來改去同一個意思，純粹為咗滿足上司Christy的善變心情，改來改去無咗大半日，當然係做唔完其他工作而要OT，令人十分沮喪。

每個人都有唔同性格，最緊要係做到「公私分明」，唔好將私人情緒或無聊喜惡帶到工作，咁已經可以減低自己變成「乞人憎上司」嘅機會。