【職場殘酷真相】能者多勞「冇多得」！對工作愈認真，愈易辭職？
你上一次辭職嘅原因係乜嘢？離開一個工作崗位，人人都有不同故事。
如果簡單將辭職原因分兩種，就係「開心辭職」同「唔開心辭職」，前者包括：謀到高就、結婚生仔、中六合彩等等；
後者包括：同上司／同事唔夾、工作量同薪金不符、看不到前景之類，但其中一個「最唔抵」嘅辭職原因就係：太認真。
作者：詩寧
會因為「太認真」而辭職的人，通常都係為人勤力、上心，交個Project到佢手，佢就會盡善盡美，但個世界又邊有完美？要完成一件事，好多時都要同人合作，同供應商合作、同同事合作、仲要比上司同客戶審批，當中少不免遇到阻滯，愈認真，愈激心；愈激心；愈灰心，結果辭職。
愈認真，愈激心；愈激心；愈灰心，結果辭職。
一心為公司，反而激親自己
Jennifer係一個認真做事嘅員工，要幫公司籌辦一個大型步行籌款活動，呢啲活動通常都係「扣除成本以外全數撥捐乜乜乜」，即係成本愈低，捐款愈高，受惠人士亦愈多。Jennifer認真地希望件事唔係得個做字，想真係幫到多啲人，所以努力控制成本，例如搵人設計宣傳物品時，Jennifer會貨比三家，搵唔同供應商格價，仲整個表，列清楚每間供應商嘅優點同缺點。點知佢上司Christy一早已決定益自己朋友，內定搵一間貴啲又質素差啲嘅production house，Jennifer除咗嬲自己嘅心機被浪費之外，更加嬲Christy無為件事好、無認真降低成本。
認真做事，得唔到認同，仲要因為啲無聊原因，例如上司個人喜好而被推翻心機，長此下去自然愈來愈無灰心，無動力繼續做好，睇見自己愈來愈頹，慢慢就會辭職。
能者多勞，但多勞並無多得
無論公司派幾多工作比Jennifer做，佢都可以好有條理地將工作喺deadline前完成，相反，佢身邊啲同事就將啲工作一拖再拖，所以每次全team開會匯報工作進度，上司問：「大家講下手頭上做緊乜嘢？」同事們都可以講一堆未完成、跟進中的工作，而Jennifer呢？就數出一堆「已完成」的工作。
呢個世界無咁多精明同公平嘅上司，所以每次上司聽到Jennifer「無嘢做」，只會比更多新嘢佢做，結果同事一個月做五單project，Jennifer就一個月做十單。人心肉做，Jennifer內心當然不忿，雖然佢都知做慢啲著數啲，但作為一個「太認真」嘅人，要佢降低自己工作能力同速度唔係咁易，結果就只能屈埋屈埋自己激心。
作為一個「太認真」嘅人，要佢降低自己工作能力同速度唔係咁易，結果就只能屈埋屈埋自己激心。
好多人會話：「做好自己咪得囉，唔使同人比較。」講就易，又有幾多人做到？大家都出同一份糧、AL日數又一樣，但自己就比其他人做得多，人工唔加，上司亦唔會讚多一句，死做爛做，無回報亦見唔到改善空間，點會唔萌生去意丫。
有時做到好灰心，不妨提下自己，係咪自己太認真？放鬆啲，條路易行啲。