只懂送禮食飯不是愛！真正愛媽媽 學識唔講「不孝子女口頭禪」？
今年嘅5月13日，係我初為人母後第一個過嘅母親節，從來都無對呢個節日有咁深刻感受，唔係因為今年我有份做主角收禮物，而係我終於真真正正明白，為人父母係幾偉大。
作者：詩寧
我不孝，過往母親節都係循例食飯、送禮物，表面嘢做足，但問心，從無認真思考過「母愛」係咩一回事，更加無喺節日後持續關心媽媽，食完餐飯，影完相，完了。節日過後繼續係努力返工、拍拖、約朋友去玩，然後返屋企問阿媽煮好飯未、比一堆衫阿媽洗……除咗呢啲，仲有對阿媽講「不孝子女口頭禪」，你又有冇講過？
「你好煩！」
我做阿媽的年資暫時只係兩個月，已經感受到「養兒一百歲，長憂九十九」呢句說話唔老套亦無誇張。記得第一次失戀係20歲左右，當時的男朋友在外國留學，（我以為）好恩愛，後生無懼時差，24小時都傾電話，寫情信、寄禮物製造驚喜……仲話大學畢業之後就返香港結婚。最後點？理所當然地有第三者，四、五年感情，只收到一句：「我們到此為止吧。」訊息作結，然後即刻打去，個電話已經唔通，我連喊兩聲比佢聽嘅機會都無。
一夜之間所有天真幻想破滅晒，覺得被全世界遺棄，日日逃學去café呆坐，望住café外面嘅花草樹木喺度喊，夜晚返到屋企食唔落飯，返入房繼續喊，阿媽見到我咁傷心，佢亦一樣食唔落飯，敲門搵我傾偈我唔肯開門，到我肯同人講嘢嘅時候，亦唔肯同佢講發生咩事（雖然佢大約估到），媽媽驚我會睇唔開做傻事，再三叮囑我有嘢唔好收喺心，可以搵佢傾，但我反應係叫佢：「唔好煩我」。
直到自己個仔出世，BB當然係咩都喊，原來親生骨肉一哭，媽媽個心真係會抽住痛，好似有人大力扭我心臟咁。明知佢只係肚餓，食飽就無事，做阿媽嘅都係會好多擔心：「哎呀，喊到咁大聲會喉嚨痛」、「喊住點食奶呀？會嗆鼻」……總之就唔想見到自己仔女流一滴眼淚。
媽媽嘅天性，就係一見到仔女唔開心，立即想盡力幫佢解決困難、保護佢，當然我知道咁係唔理性，但我幾肯定講呢個世界大部份阿媽都係無理性可言的，如果佢理性，佢一早就掉咗你呢個衰仔／衰女出街，理性分析過的話，一定唔會為咗你搞到自己身材走樣、唔會使晒啲錢喺你身上、更加唔會比機會你駁咀。
如果他日我個仔同我講：「唔好煩我」，對媽媽嚟講絕對係無助，因為呢句說話背後個意思就係：「媽，你已經幫唔到我解決問題」，要我睇住最愛嘅人喊，但自己咩都做唔到，諗到都傷心。
「講咗你都唔識㗎啦！」
呢句不孝口頭禪可以有多個版本如「你乜都唔識」、「點解咁簡單都唔識㗎」之類，總之意思就係嫌棄，嫌阿媽老土、跟唔上時代步伐、同你有代溝……
人年紀愈來愈大，跟唔到時代步伐係必然。有啲人40歲跟甩、有啲人60歲先跟甩，後浪推前浪會發生喺你我他身上，李嘉誠同李家誠都會有退休嘅一日，個分別只係遲定早。
但仔女總係無耐性，無耐性解釋比媽媽聽公司嘅人事鬥爭幾複雜、無耐性教佢善用智能電話、無耐性陪佢行路行慢啲……
相反，我生完仔先明，「媽媽」呢份工係全世界最需要耐性嘅工作，由細心換片到教導BB牙牙學語，全部都係重複性工作，需要無限耐性同愛心，將一個人由咩都唔識，教到識行識走識溝女，然後有一日我問佢嘢，佢答：「阿媽，講咗你都唔識㗎啦！」阿媽除咗無奈仲可以點？
第一年用母親角度睇母親節，最想收嘅禮物係：希望仔女永遠記得我係點錫佢，然後佢每一次同我講嘢，都會企喺我角度諗咗先。我今年，亦會送呢份禮物比媽媽。