【職場女生最易犯的錯】別過份卑躬屈膝！可以禮讓，但絕不忍讓！

唔知邊個祖宗傳落嚟，教啲打工仔做嘢要事事忍讓，只要你唔係高層，就出少句聲，有咩死貓黑鑊都要硬食。我同意「受人錢財替人消災」，部份人打工成日呱呱嘈咩都投訴真係好煩，但有時遇到嘅事太過份或者老闆嘅要求已經超出工作範圍，仲係咪要忍？

撰文：詩寧

無論你做咩工作，其實返工都係簡單分成兩樣嘢：「做事」同「做人」，做事就睇你學歷、經驗、能力，無咩好爭議，但做人就難好多了，當你想哄人開心，好易俾人話你係擦鞋仔／女；相反你想忠於自己，就比人話係黑面神。往往令你唉聲嘆氣地放工嘅原因，就係個崗位或者件工作令你「唔知點做人」。

可以「禮讓」，但不要「忍讓」

咁究竟，喺職場上遇到不公、委屈嘅時候應唔應該出聲？首先要分清楚「禮讓」同「忍讓」。做人有禮貌係正常，我教仔都會教佢講「多謝」、「唔該」，萬一做錯事要向人道歉，工作上亦一樣，大家一齊做嘢要互相尊重。但如果，個「尊重」並唔係「互相」，而一直只係得你去讓人，而對方步步進逼，咁仲係咪忍落去？我就唔會教個仔做縮頭龜喇。

做過N份工，遇過亂發脾氣、善變的老闆，或者係縮骨、不負責任的同事，初出茅廬嗰時唔敢反抗，結果係點？自己收埋唔開心、走入廁所喊、失眠、日日都唔想返工，工作表現亦跟心情一齊差落去。所以死忍爛忍，唔止對件事無幫助，對身體同精神都係傷害。

打工要識剛柔並重

明明，根本就無需要卑躬屈膝地打工，公司同僱員之間係各取所需，公司並唔係送錢比你使，而係買你才能和時間，所以個關係係平等的。要硬淨，先無人敢塞死貓俾你；但同時要圓滑，先有人比機會你。而唔係一味自己谷住度氣，長此落去乜嘢補品護膚品都救你唔到。

職場上要做到知所進退，說易行難，你自己用心做都總有小人出嚟阻住你上，咁究竟幾時進攻幾時防守？首先要問下自己底線喺邊，例如：「我可以容忍同事偷懶，我做埋佢嗰份。」、「我可以接受老闆唔講道理搵人出氣。」…….「但我接受唔到人哋搶我功勞」、「我不能同懶醒嘅豬隊友工作。」

返工係......一啖砂糖一百啖屎​！

返工可能係一啖砂糖一百啖屎，簡單啲講，食屎係無可避免的，所以要清楚自己有咩屎係放得入口然後放工當無事發生開心生活，又有咩屎係一定食唔落？咁就要企硬，無論咩人迫你都唔好接受！同時要記得點樣先食得到嗰一啖砂糖？對你嚟講乜嘢先係砂糖？出糧？二十日年假？追求理想定興趣？

有時返工唔開心，係因為比太多屎堆住，堆到忘記咗自己係為「砂糖」而入呢間公司，亦為咗處理啲屎而忘記咗行去更多「砂糖」嗰邊。所以保持清醒好重要，不妨將自己入公司嘅初衷寫低，貼喺個位度，唔想太多八卦同事見到嘅話，可以貼喺櫃入面或者鍵盤邊。七、八月無乜紅日，又係打工仔負能量上升嘅高峰期，快啲搵返條底線出嚟，唔好任人魚肉呀！