日日嘔血、經常要全組人陪佢補鑊？一招K.O.應對「縮骨豬上司」！
從來，返工之所以痛苦並唔係因為要做嘢，而係因為要對住「某啲人」，「某啲人」可能係朝令夕改嘅老闆、蠻不講理嘅客戶、做咩都甩漏嘅同事，重覆又重覆咁同佢哋衝突與磨合真係令人好疲憊，但原來咁都未係最慘，更無奈係遇到本身已經唔醒都仲要「縮骨」嘅上司，真係日日嘔十九幾兩血。
Christy出社會做事已經十幾年，個人唔係咁醒目、成日做錯事，日日都比上司鬧：
「你做咗幾多年嘢呀，點解你仲可以犯低級錯誤，A客戶嘅資料Send錯比B客戶？」
「我今朝已經同你講咗三次話個背景要用紅色，點解你仲係比個藍色背景我？」
無論件事係幾簡單、幾基本，Christy都會做錯，而且經常要全組人陪佢一齊補鑊，甚至好多時要剛畢業嘅新同事教返佢轉頭。但係，Christy有個「優點」，就係勝在無膽，唔敢駁咀、唔敢改變、唔敢辭職，雖然佢成日比人鬧，但喺公司坐咗好多年，坐坐吓終於輪到佢做Manager，從此，佢對條Team嘅破壞力就更強。
一升職就露底 唯有縮骨博甩身
雖知道，職位低嘅時候，只要聽話就可以安穩，乖乖地跟從上司指示，有咩事就講一句：「係經理叫我咁做嘅」，然後就可以將責任甩開，繼續返埋位工作。但升職之後，除咗人工加啲啲之外，責任同工作量都會海量地增加，如果一個人升職前係無用腦嘅習慣，升職之後個腦係唔會突然轉快咗嘅。
如果一個人升職前係無用腦嘅習慣，升職之後個腦係唔會突然轉快咗嘅。
面對突如其來的海量Workload，Christy連安排自己啲工作嘅先後次序都搞唔掂，莫論要佢同時應付下屬們嘅詢問，一時間樣樣嘢要Christy落決定，決定一旦落錯了，小則成Team白做，浪費人力物力；大則得失客戶令公司蝕錢，或造成其他無法補救嘅傷害。
Christy錯完又錯，既俾上司鬧，又俾下屬怨，一個能力不足嘅人可以點樣喺短時間內解決困難？就係將困難視而不見，咩都話唔知又或者亂點下屬叫佢哋自己搞掂，出咗事就賴落去「牙力」比自己細嘅人身上，呢種處事手法，簡稱「縮骨」。
當部門有個縮骨經理，下場係點？最快見效就係離職潮，走得快未必好世界，但走得慢就日日踩屎食死貓，縮骨經理叫你行左，你明知左邊有屎，問佢可唔可以行右，佢話唔得，你唯有跟指示行左，結果真係踩屎，問返經理：「點算呀？對鞋污糟咗。」經理縮一縮答：「我唔知喎，對鞋係你嘅，你自己抹返乾淨囉。如果你一早行右邊就無事啦。」呢個時候你就只能含淚抹屎鞋。
跟著呢類上司，點樣可以安全？除咗辭職之外，就係遇到咩事都唔好問佢意見，你自己決定，但當然你要有信心，確保自己唔會犯不可原諒嘅錯誤，咁就可以完全跳過佢，當佢無到。
你會問：「真係可以跳過佢？佢係上司喎！」可以，因為上文提過，呢類上司唯一「優點」係無膽，佢唔敢辭職而純粹因年資而升上去，同樣，佢都唔敢亂炒人，因為佢內心知道，自己無能力教新人，縮骨豬上司絕對需要留住舊人以確保有人幫佢補鑊，加上舊人識自動波，知道每日要做啲乜，你叫佢教新人？佢自己都唔知自己每日做緊乜，點教呀？