音樂圈打滾多年有話兒　卡式帶樂團：點解追糧仲好似自己唔啱

卡式帶樂團Cassette對你或許有點陌生，但當中兩位成員卻是熟悉的面孔，Aeolus是樂隊Peri M的主音，Jonny是樂隊Closer的Bass手。雖然兩人同樣Rock友出身，但Cassette擦出的火花並非只單純得搖滾，而是想像空間較大的電子音樂。既然「少林功夫都可以加唱歌跳舞」，電子加搖滾又有何不可？
攝影：梁碧玲

Cassette組成的契機追溯到幾年前，Jonny離開原有樂隊後仍有一堆作品在手，當時還未想到要將作品賣掉或是留來自用。恰巧邀請到Aeolus幫忙唱Demo，大家都發覺電子音樂是一條「新血路」，所以一拍即合。

Rock友轉玩電子似BB學行路

電子音樂的元素與搖滾樂與別不同，雖說未至於180度相反，但也算是跳出自己的comfort zone，感覺像是初生嬰兒學行路。Aeolus說：「錄音嗰陣，監製要我掉開以往嘅唱腔，真係好辛苦，因為係自己唔想觸及嘅範圍。」Johnny亦表示，創作時「攞聲」花最多心思：「音樂上自己腦入面都已經有份譜，但淨係揀一個切合到首歌嘅鼓聲都好用時間，要一路不斷試。」他們希望可以像東京事變的Bass手龜田誠治一樣，找到屬於自己、最能代表自己的聲音。

玩電子嘢有辣有唔辣
心水清的讀者都會留意到，平時Cassette演出，Aeolus負責歌唱部份，Johnny彈Bass，背後豐富的編曲全靠事前編好的Programme。但Programme歸Programme不似真人一樣會「就吓你」，這正是難度所在，Johnny說：「出騷時聽Click要醒十二分精神，唯有逼自己練得再準啲，因為少少偏差都好覺。」不過Aeolus卻表示二人陣容更靈活：「其實做商演方便咗，因為容易控制聲浪；如果一隊Band做商場騷，一響鼓就已經會俾人投訴。」

點解追糧仲好似自己唔啱咁？

音樂人與其他自由工作者一樣，收入不穩定的主要原因莫過於被人拖糧，Aeolus與Johnny於音樂圈打滾多年，同樣也面過對這苦況。Johnny直言：「呢啲人唔守信用真係幾討厭，我唔明佢哋覺得做音樂係可以拖糧！當我諗住三個月後會收得番條數，可以夠生活，點知突然冇嗰下真係好徬徨。」他續說：「就連大公司都有呢個心態，我唔信佢哋冇錢囉；付出咗咁多心機時間，唔信我哋真係咁分文不值！」

除此以外，同行「做爛市」亦令他們感到非常頭痛，Aeolus說：「有時追糧仲好似自己唔啱咁；另外，做爛市本身已經係唔尊重自己，呢個係專業呢㗎嘛！你付出咗心機時間，但對方會覺得，唱歌只需要擘大個口，結他彈幾下就得。但其實嗰舊錢係值㗎，係需要俾㗎；如果你乜都求其搵人做，咁咪出事囉！」

橫又死掂又死，不如去盡啲啦！

雖然在香港玩音樂要面對的困難，有時比一般人多，但要找出路別無他法，只有堅持，Johnny笑言：「橫又死掂又死，不如去盡啲啦！」正因為這份動力，令他們除了營運樂隊以外，還得到不少幕身後工作的機會，例如Aeolus曾為盧巧音、何超儀、許靖韻等人擔任演唱會和音； Johnny亦有為不同音樂單位填詞。Aeolus說：「經過咁多年，要話俾自己聽，既然選擇咗玩音樂，就要努力搵方法令自己做得好啲之餘，令收入穩定啲，令屋企人放心。」