【專訪】本土EDM幾時先發到圍？　組合Fabel：10年冇金曲都唔放棄

香港音樂市場個Trend真係好難捉摸，早兩年就「潮流興Band」，依家就「潮流興玩EDM」，好似Gin Lee新碟、吳雨霏的《Come With Me》、側田featuring Dough-Boy的《Heads Up Phone Down》等等都充滿EDM元素。雖然電子音樂開始「打入主流」，不過堅持創作電子音樂的樂隊Fabel卻似乎並沒因此受惠。是因為聽眾耳界太狹窄，還是Fabel這隊「開荒牛」仍需努力？即使面對各方面壓力，主音LoLo仍然樂觀：「行落去吖！電子音樂係有得做㗎！」

樂隊定位尷尬？

樂隊Fabel出道4年由主音LoLo與鍵琴手Jimmy組成，二人一直堅持創作電子音樂，對香港主流聽眾而言，電子音樂仍然屬於小眾，但即使走到音樂節規模的演出，Fabel也不是常客，連Jimmy也直言：「因為我哋兩邊不是人。」Jimmy續說：「初初好迷惘，因為我哋得兩個人，去商場騷又會俾人嫌太嘈；去音樂節我哋budget又唔多，要請樂手又好麻煩，人哋又會覺唔夠Rock，兩邊不是人。」

除了演出搞手覺得Fabel兩邊不是人，就連行內表演者亦如是，Jimmy表示：「雖然落Club夜場會有人打碟，有人玩電子音樂，我都認識一啲玩電子音樂嘅artist，不過佢哋係鍾意做Beat多，而且會覺得我哋唱廣東話太Pop；到商業角度睇又會覺得我哋太小眾。」幸而Fabel不是「變色龍」，不會為了接job而改變自己的風格，開始有商場會接受他們的作品，演出機會亦隨之增加。

香港聽眾行得太慢，接程度太低？

每當談到香港音樂風氣太封閉，流行曲風格太單調等問題，總會有人指「香港人耳界太窄」，不過Fabel卻認為：「其實香港唔係冇人聽好嘢，只係鍾意聽外國音樂多啲。」Jimmy用紫薯、抹茶、拉絲芝士等等食物去形容香港音樂市場的風氣：「香港好多嘢都係潮流，都係一窩蜂，就好似紫薯、抹茶、拉絲芝士呢啲嘢食咁Boom一聲好hit，又可以一下冇晒影，其實電子音樂都係，爭在係幾時hit到我哋。」

Jimmy又講到：「其實我哋對香港聽眾唔失望，但係傳媒同部份人有斷層，導致香港嘅音樂接觸唔到嗰班人肯聽新嘢嘅人。而嗰班人多數都係上YouTube自己搵歌聽，加上互聯網會因應你睇開咩俾番類似嘅嘢你，所以難度在於要撈番嗰班聽眾。」LoLo又提到在商場表演Fabel的作品是有反應：「早排我哋喺商場出騷，玩《安多酚》呢隻歌係有反應，有人會停低聽，佢哋嘅反應就已經俾咗答案我哋！」

氣餒=月經？

要爆紅當然要睇彩數，幸好Fabel二人都樂觀，堅持不改變自己的音樂風格，但音樂人都係人，總會有氣餒嘅時候。Jimmy話：「其實氣餒呢樣嘢就好似月經咁，每個月總有幾日喺到諗『X，不如唔好做啦！』但問題係你唔做真係冇人做。」

既然EDM是全球風潮，那Fabel有否想過離開香港發展？Jimmy卻表示：「我都有諗過離開香港發展，但始於香港係自己地方，你連自己地方都未做好，去到人哋地方邊有人會show你！」LoLo亦補充：「雖然我哋依家未算好流行，但至少問心無愧，我哋相信咁多種音樂風格喺香港可以共存。」

「行落去係有得做㗎！」

雖然電子音樂在香港未算好流行，但Fabel仍然堅持創作，主音LoLo話：「行落去吖，電子音樂係有得做㗎！」因為Fabel相信自己一路堅持是值得的，即使做足10年沒有金曲也不會放棄，Jimmy話：「其實有人會勸我，不如到30歲做唔掂就唔好做，轉做政府工啦，但係我覺得即使十年後Fabel仍然未有一首金曲，都唔想放棄個定位，唔想放棄個小小嘅fan base。」'

Jimmy續說：「香港生存好易俾人影響，質疑自己先係最慘嘅事。」

Fabel一直堅持做電子音樂，到今日終於越嚟越多人接受。(黃國立攝)

香港人要《叫》？

Fabel早前推出新歌《叫》，MV畫面見到一班人在茶餐廳內爭執，見到食物後狼吞虎嚥面露歡顏，此情此景迫到Jimmy與LoLo衝出茶餐廳跑到人來人往的街道大叫，到底《叫》背後隱藏甚麼意思？

LoLo解釋：「其實《叫》係綜合香港人嘅壓力，地少人多每人空間都好狹窄，好多磨擦，就連望上個天都覺得好狹窄，因為太多高樓大廈。所以每個人壓力好大，好需要一個渠道去渲洩，就要《叫》出嚟。」LoLo續說：「至於MV入面嘅人點解見到食物就咁開心，就係因為一句『搵食啫』，就由憤怒變得好enjoy，但係呢份enjoy又未必係真心，只係為咗做個樣出嚟俾人睇我好enjoy。」

Jimmy補充：「其實《叫》同《上傳狂》係有關聯，因為香港好多人都搵唔到一個合適嘅發洩渠道，而且好多年青人面對社會上嘅問題又無法改變，轉而喺網上公審，踐踏他人去發洩。」

面對社會上人人壓力大，周圍充斥住批判的聲音，LoLo也無奈地說：「只要大家open minded一啲，心胸闊一啲，就唔使《叫》喇！哈哈！」