【專訪】收林敏驄歌詞險中招 何超儀：佢第二句就寫粗口畀我！
何超儀這名字，早在90年代的演藝圈已是響噹噹，不論在電影界還是音樂圈，她也是一位奇葩。奇葩，是因為她從不隨波逐流，沒有因身處的圈子而變得圓滑，相反，一個藝術家多多少少也是需要一些棱角。1996年，四大天王橫行，廣東歌仿佛只有情歌的年代，何超儀的《何家淑女》卻在玩迷幻，當然就如預期中沒有大熱，但也找到其定位及聽眾。再到2013年開始，何超組成Josie & the Uni Boys，走向更Hard Rock一點的道路。早前推出《何飄移》，在何超自己口中，她形容為是「精神分裂啲、黐線啲」的作品。
攝影：黃國立
到底《何飄移》有多「黐線」？何超表示由班底開始，已經是一個「黐線」的故事：「拍《全力扣殺》嘅時候識咗大師林敏驄，但我又好掛住Wyman，兩個都係才子。於是我就同Wyman講大師應承咗我填詞，點知Wyman反而同返我講『不如兩個一齊填啦！佢未試過咁樣Crossover，幾得喎！』咁我諗住呢兩位大師一齊合作都夠黐線啦，點知Wyman仲畀返意見我『其實我都覺得你幾變態，除咗做演員，又要做行政、推廣、拓展市場，你會唔會覺得你個人有啲精神分裂呢？』跟住佢哋就諗咗一個有極端精神分裂嘅女仔出嚟，寫咗呢首《何飄移》畀我。」
聽着何超的解釋，可能大家會發現歌中描述的女生，多多少少也有她的影子在其中：「一個人格就係有錢、把口唔收嘅八婆，不過佢個心就好軟。而另一個呢，就係一個好內斂嘅女仔，神經質到踢到舊石都會向自己問一千個問題。而佢哋都係失敗在愛情手上。歌詞入面有一句我好深刻嘅，因為兩位大師填詞嘅時候就一人一段，林敏驄填第一段，第二句佢就寫咗句粗口畀我。」原來歌曲中的一句「心肺 齊凝固似蠔」有着相當深奧的隱喻在當中，何超解釋：「我收到份詞嘅時候都唔知頭唔知路，好彩錄音之前Wyman叫我問一問。大師就話『即係你受情傷，心肺自然絞作一團，好似女性嘅生殖器官咁，個蠔字就係解做陰部啦！』幸好我問一問，否則唱了也不知什麼一回事。大師邀請我去佢個人作品展唱呢首歌嘅時候，仲叫我將歌詞入面一句『枯萎的根部』改做『枯萎的X毛』，佢話『我原來心入面係諗住咁填，不過驚你頂唔順我先改做枯萎的根部。』，如果佢原本真係咁填落去，我作為一個女仔都覺得有啲難唱出口。」話雖如此，但何超亦對今次兩位大師的合作相當滿意：「兩位大師級嘅人幫你寫詞，呢份詞要我等4年都等。」
何超一邊把歌曲的故事娓娓道來，享受着音樂人的幻想空間，另一邊亦不忘自己在商業上的身份：「跳返去老闆嘅身份，我又要好理性話畀人聽隻歌要點宣傳，當然我真正嚮往就係演戲唱歌啦。不過現實講我哋做呢類獨立製作，就係唔想畀人局限只可以進軍某一啲地區。打個比喻可能我喺馬來西亞識咗個朋友，佢叫我哋去唱，咁分分鐘我哋就可能會打入嗰邊個市場。就算我係香港人，好想Promote自己嘅嘢畀香港，但香港唔受嘅話，咁我都要諗辦法，因為我隊Band都要搵食。所以好老實講，地球任何一個地方邀請我哋去出騷，我都一定會飛去。」說到這裏，何超也不自覺地商家上身，大談生意經：「而家全亞洲嘅新興市場，第一個一定係泰國，跟住係新加坡，而呢個地方其實一早就追過咗香港。點解呢？因為新加坡、馬來西亞、印尼、菲律賓、越南，全部已經接軌，去到呢啲地方，只要你識唱英文，就可以打入市場。就算唱廣東話，除咗香港，去到馬來西亞都一樣有得表演，咁點解我哋個眼光淨係識得望住中港台？」
流行音樂即使如何理念崇高也好，總不得不考慮商業因素，今次何超出碟只出黑膠，原來是見過鬼怕黑：「我上一張碟《搖滾妹子》其實有出CD，亦有出黑膠。結果反應係黑膠賣斷市要補貨，嗱我講明唔係我去做個市，我自己都只係得20張，所以個反應唔錯。但係CD就大把貨，賣唔到，所以我哋得返嚟嘅教訓就係唔好出CD啦，反正啲人都係Download，就算係Fans都係上網買數位版。所以黑膠就係留畀真係喜歡我哋嘅Fans，而佢哋係有心去收藏我哋啲碟嘅，所以我哋盡量將隻黑膠碟做到最靚，做7吋碟，錄完攞去日本畀一間專幫Metallica做Mastering嘅公司去做，等啲真係儲碟嘅Fans會覺得物有所值。」