【專訪】殯儀、獸醫助護都玩Metal？　樂隊逆流睇透生死創作音樂

重型音樂在香港總是被貼上「地下」、「非主流」的標籤，很多人會覺得與「Metal友」有很大距離，總是認為他們黑衫黑褲、凶神惡剎。除了音樂口味不同外，Metal友與你我無異。音樂人同樣要打工搵食，可以係獸醫護士，亦可以冷門如殯儀行業，一樣有人玩Metal，樂隊逆流就是這樣構成。
所以話，總有一個Metal友喺你左近。
攝影：陳順禎

逆流的歌詞帶一點文學味道，一時似是經文，一時提到花開花落、緣起緣滅，像是在訴說一些道理要聽眾自行參透。以上元素與主音傑佬從事殯儀行業有莫大關係，他表示：「其實係我屋企家族生意，我係做最前線嗰班，要接觸遺體，幫先人潔淨軀體、化妝、搬運、入儉；亦要學識不同禮數、儀式，最後運送到火葬場或者山頭。呢個職業影響咗我對生死嘅睇法。」

經常面對生離死別並不代表從此麻木，畢竟人始終有情緒，而非冷冰冰的機器，傑佬說：「工作時抱住一個尊敬嘅心去對待，以為自己會係一個麻木嘅狀態，但將遺體推出靈堂，見到先人家屬嘅表情、情縮，都會心悒 ，都係會有鼻酸嘅感覺。」他續說：「每個人生前死後嘅故事我哋唔會知，但係佢哋留低咩嘢俾後世嘅人，會令佢哋有咁大反應，應該係一個壯闊嘅故事。」傑佬亦透露逆流的歌詞與喃嘸師傅唸誦的經文有關：「『散花』係其中一個段落，所以《六呎之下》有一句『散花若能解結，願如花散』。」

除了先人的故事，現實逼人同樣令傑佬試過崩潰：「有大半年時間我朝早6點起身，夜晚教學生，返到屋企都11點幾。有一晚返到屋企樓下，崩潰到喺靈車入面喊，喺到諗點解要折磨自己，亦因為咁而寫咗《毋忘我》嘅歌詞。提醒大家唔好忘記『我』喺邊到。」

工作要面對生死的不止傑佬，Bass手阿Ken現職獸醫護士同樣對生命有很深體會，他表示：「同傑佬相比，我同樣要面對死亡。不過我見住小動物仲在生時嚟求診，但有啲case係比較絕望，即使用盡方法去幫佢，但有啲嘢真係唔到你話事，嗰一下就會發現有時人嘅能力都幾渺小。」

即使現實令你無力，也要拼盡，這是阿Ken從工作得到的體會：「即使你知道你未必控制到，現實好殘酷，但係你唔可以咁易氣餒，唔可以俾唔愉快嘅事擊敗自己。做音樂亦一樣，就算好多人同你講做嚟冇意思，但係你堅信自己做緊嘅嘢有意義，總會令身邊嘅人明白。」

逆流的歌曲用上破音結他、密集擊鼓、嘶哮唱腔，但並非單純的情緒渲洩，而是言之有物，同樣使人為之動容。證明重型音樂可以有不同面向，一樣能發人深省，是時候撕下那些負面標籤。

近年樂隊文化再始抬頭，不同音樂風格都受到傳媒關注，甚至登上頒獎禮舞台，那逆流對重型音樂現時的發展有何看法？傑佬對此感到悲觀，因為演出場地實在不足：「係有啲悲觀嘅，演出場地真係太少，我哋用咗7年時間，由樂人地帶再去到麥花臣。任何樂隊都必須由細場地行出第一步，俾你明白到咩叫一場演出，但係依家冇，希望有關當局會盡快正視。」

鼓手阿燊話：「雖然重型音樂喺香港未算好普及，因為始終大家唔理解，但依家樂隊們唔係坐喺到話其他人唔識欣賞，大家真係問心無愧咁用行動去推動呢件事。我個人係比較正面，希望可以喺我在世嘅時候會睇得到，香港頒獎禮好似外國咁會有Best Metal Performance！」