【海潮】任性溫碧霞自細食煙飲酒：畀爸爸打一巴我就離家出走！

即將舉行《海潮》演唱會的溫碧霞（Irene），在大眾眼裡，或者許是個貪靚玉女，甚至是個靠性感成名的女星，但事實上，她的銀幕形象與其本人個性似乎有所出入。
攝影：黃國立

出身軍官之家

現已嫁為人妻的Irene正忙著籌備下月演唱會，頻頻出席活動為演唱會宣傳，雖然今年已經51歲，但仍不改來自《火玫瑰》的海潮跌膊look。自出道以來，她的演藝路歷經幾番波折，花瓶、艷星、賣肉……再難聽的說話，Irene坦言都「聽過晒」。這位出身自「軍官」之家的女孩，坦承自己從小便很任性，更笑言自己「不嬲都好前衛」。「我今次想借演唱會用歌向歌迷展示真正嘅自己，會公開部分童年相，因為細個時屋企好窮，所以冇乜影相，影咗都冇得留底，好珍貴。」Irene的父親是前國民黨軍官，從小被父親嚴厲管教，由於其父國民黨的身份，所以上世紀遷移香港後便居於「小台灣」調景嶺，「可能因為管得愈嚴就愈反叛，我爸爸當時係連聽到有男仔打俾我，會即刻cut線，又唔俾出夜街，所以愈管愈想要自由，而我又唔鍾意讀書，又唔聽爸爸媽媽話，又試過離家出走，仲食煙飲酒，夜晚走去disco玩，總之做過好多好浪費青春嘅事。」

父親離世 「一次過剪短晒把頭髮」

自小貪玩又任性的Irene，坦言是因為拍戲而改變了當年年少無知的她，「當時係個人先慢慢肯定落嚟專心做嘢，但我都係唔肯聽人講嘢，我要做一樣嘢冇人可以改變到我，即係就算所有人都話錯，都冇人可以改變到我，我諗呢種就係任性囉。」Irene憶述指，其父親早年去世，笑言又是一個超任性的例子，「我當時將自己把頭髮一次過剪短晒，仲短過《靚妹仔》時期，嗰下我係覺得Daddy離開我，好傷心，咩都冇諗，陷入一個好失落嘅狀態，當時係我幾方面都最好嘅時候，一下子剪晒頭髮，然後淨係同佢講我唔出唱片啦！」結果當時Irene便在高峰暫別娛圈。

「我冇諗過其他人感受」

「有冇後悔自己曾經咁任性？」我問。「其實依家諗番轉頭，只係覺得好傻，但都係成長嘅經歷嚟嘅，而且我最終選擇演戲，而冇揀唱歌，呢樣係我呢世都唔會後悔嘅事，我最鍾意演戲，想專心一致去做好呢件事。」她笑言現在回想當時，其實是一段人生經歷，「我細個真係冇諗過其他人感受，經理人為我做咗咁多事，而且仲幾成功，我一下唔做就唔做，浪費晒人哋心機。但我冇後悔，因為你唔經歷過，真係唔知有時真係要聽下人講。」不過話雖如此，但她笑言現在人都長大了，硬頸依舊，但本質不變，「我覺得我就係我，依家只係好咗少少，但如果我冇堅持，冇晒性格，呢個就唔係我。」

性感係天生

「我冇諗過自己會係行性感，我好細個已經俾人咁樣形容，但呢樣嘢唔係我刻意做出嚟，我諗……係天生。我相信每個女仔都有自己嘅特質，而我就係咁，我會接受囉。」性感兩字，一方面為Irene鋪排了很好的演藝路，但另一方面卻成為她演戲生涯的局限，「我諗係有影響嘅，但我又唔抗拒演性感角色。一路都好少人搵我演好平實嘅角色，好似海潮、妲己呢類，大部分係亦正亦邪嘅人物。」雖然Irene很喜歡自己演過的舊角色，但亦坦言，演員的身份從來很被動，「所以我先開自己嘅電影工作室！」

調景嶺的孩子

一直盛傳溫碧霞在下月舉行演唱會將告別娛樂圈，但其實一切都是傳言，而她亦正準備向電影圈發展，「嚟緊我會做一部叫《我們的18歲》嘅戲，係一部關於成長嘅戲，會有部分關於我成長嘅地方調景嶺。」如前文所言，Irene是一名成為於調景嶺的孩子，「因為我爸爸係前國民軍官，搬嚟香港之後咩都冇晒，所有嘢要重新建立，依家劇本寫落嚟其實好豐富，唔止係我自己嘅故事，仲有身邊好多人嘅故事。」

場地：富薈上環酒店

髮型：Ken Ng@Queens Private i

化妝：Khaki Yan