51歲溫碧霞破羅霖紀錄　六月出寫真開個唱騷勁騷Quali

呢個世界真係有啲人唔識老，而今年51歲嘅美魔女溫碧霞（Irene）就係一個好好嘅例子。為咗等世人可以景仰到呢種不老美貌，Irene真係好有佛心，準備喺今年六月推出《海潮》寫真集，之前仲去到塞班島影落好多三點式泳裝照，又有齋著底褲用被單遮身嘅火辣相，想透過呢件事畀自己一個好好嘅回憶之餘，仲想話畀大家知唔好放棄自己嘅夢想，成件事真係幾令人期待。諗返起之前羅霖喺50歲時都出過寫真集，今次Irene真係以1歲之齡輕輕咁贏咗佢一個馬鼻。

當大家以為淨係得本寫真嘅時候，Irene就話畀大家聽好戲陸續有嚟，今日佢就喺自己微博度宣佈快將舉行巡迴演唱會，而首站更加定喺香港，而呢個名為《溫碧霞海潮演唱會2018》嘅騷，就會喺6月19日於旺角麥花臣場館舉行，票價分$480同$680兩種，佢去到五月時就會專心籌備。

除咗寫真集同演唱會，Irene今年仲會開拍自傳式嘅新戲《我們的十八歲》，講述自己由幾歲到十幾歲嘅成長經歷，同老公何祖光開餐廳同花藝店不特止，亦打算推出自家品牌嘅紅酒。另外，佢接受傳媒訪問時亦透露，同老公分居一段時間後，兩人嘅感情比以前更好，又指知道養子Xavier想喺美國升學，所以自己都打算過埋美國，陪仔仔讀中學，而自己就會讀Art，試下過簡單生活咁。