【驚變】露兩點但並非鹹片　溫碧霞叫大家唔好錯重點：係劇情片

將於6月份舉辦《海潮》演唱會的溫碧霞（Irene），相隔多年再在香港開演唱會，話題當然特別多。這位51歲仍然keep得非常好的性感女神，一直被港人視為「艷星」，而對於她早年演出的角色，如電視劇《火玫瑰》的海潮等都為她奠定性感地位；對於性感兩字，她似乎早已不以為然，但「三級片女星」這個稱號，卻對她影響極深。

香港過去曾經出現過不少經典電影，當中必然少不了色情電影，要數九十年代最出位的色情電影，由溫碧霞與任達華、黃子華、張堅庭等人主演的《驚變》當然是經典之一。這部電影，在當年掀起熱話，但話題聚焦的並不是故事有多奇情，而是當時在歌影視三方面多棲發展的Irene，為何會忽然有「露點」演出？「我當時接拍《驚變》只係覺得好型，我思想一直都好前衛，因為細個睇好多西片，成日諗，點解人哋可以將女性拍得咁藝術，但香港又冇呢？我當時覺得自己係為藝術而犧牲，但我依家諗番，真係覺得自己好傻同好任性。」

在拍攝《停不了的愛》之後，溫碧霞於1992年因為電視劇《火玫瑰》中海潮一角爆紅，當時紅透半邊天的她，突然於1996年演出「超性感」電影《驚變》，「我爸爸本身係國民黨軍官，佢好反對我拍戲，係因為我任性，係都要拍，當時我拍《靚妹仔》、《停不了的愛》係求我媽咪去幫我簽約。」Irene坦承自己是個非常反叛的孩子，「其實《驚變》好好睇，我覺得好多觀眾係接受唔到，點解一個玉女會走去拍一部大家以為係三級片，但其實唔係三級片嘅戲，係劇情片……但我諗番轉頭，其實要突破又好似唔使做到咁，就係因為我當時咁大膽就引起咁大話題，我唔會後悔拍過呢部戲，當然有為呢件事唔開心，「原因係點解大家唔可以將關注點放番喺部戲度，而係放喺我身體度？」

1982年的《靚妹仔》令溫碧霞獲提名當年的香港電影金像獎「最佳新演員」獎項，知名度大增，但當年的Irene只有16歲，風頭一時無兩；及至1984年，她與劉德華和吳孟達主演、《靚妹仔》續集的《停不了的愛》引起熱話，但傳媒報導焦點是「溫碧霞想同劉德華拍床戲，唔想同吳孟達拍」，但事實是又是哪回事……？「我拍《停不了的愛》時真係太細個啦，拍攝前我唔知原來有床戲，我亦都唔知會係咁樣拍，因為劇本冇，所以我拍嗰陣真係唔係好願意，因為我唔係好想拍啲咁嘅戲，咁拍完我唔係好開心。」Irene拍攝《停不了的愛》後，接下來兩年再沒拍攝電影，一直盛傳她對此事耿耿於懷，「其實床戲件事只係導火線，當時我真係太細個，一來唔係好想拍嗰啲戲，二來係，我當時初戀，掛住拍拖，所以連戲都唔拍，三來係，我當時覺得自己真係太細個就冇讀書，所以當時就返去讀英專，同埋……繼續拍拖。」