【海潮】溫碧霞開騷靠揀歌訴心聲　用歌詞表達自己：想大家了解我

香港歌迷久別多時的「海潮」溫碧霞（irene），今年6月將舉行同名演唱會。「海潮」兩個字，對香港九十年代的電視迷來說，絕不陌生，是一代人的回憶，而對Irene本人來說更是一個影響一生的名字。

「我係自尊心好強嘅女仔」

來自92年TVB大熱電視劇《火玫瑰》的角色「海潮」，令溫碧霞在本地娛樂圈一炮而紅，一頭長捲髮配上露膊衫早已成為性感女神icon。不過，當年Irene之所以接拍這角色，原因並非她預視會因此角爆紅，而是，這個角色跟她有著相同的叛逆靈魂，「當時接到呢個角色，我覺得自己同佢好似，海潮係嗰種敢作敢為，對感情好執著嘅人，而且佢係一個好任性又好自我嘅女仔。」Irene坦言自己自小便很任性，「我試過俾阿媽打咗一巴就離家出走，我係一個自尊心好強嘅女仔，所以我演海潮時，有幾幕戲我都覺得好似演番自己咁。」

海潮熱

Irene一邊憶述當時的拍攝趣事，一邊笑言當年曾經出現的「海潮風」，「當時有人係鍾意到學我化妝、髮型同埋穿著風格，因為我當年著跌膊衫，對當時嘅人嚟講都幾大膽，好似係我帶起呢股熱潮咁。」不過時光起飛逝，海潮雖然是她人生中的最大轉捩點，但Irene坦言，現在這些都成了的美好回憶。15歲出道的她，在歌壇上最為人所知的就是當年為《火玫瑰》演唱的主題曲《海潮》，今年她回歸香港開演唱會，當然會將這份屬於香港人的情意結再一次重現，「演唱會會重現我15歲出道以來至今，每個唔同階段嘅造型，會將我由細到大唔同成長時段嘅經歷都會擺喺演唱會度，連《靚妹仔》年代嘅短髮造型都會有。」她指，由於今次是以「海潮」為主題，所以整個舞台和服裝設計都會以《火玫瑰》為主題，「因為『火玫瑰』係一種花，所以會用好多花嚟裝飾，同埋會用好多海同大自然感覺去做背景，整個演唱會都會好飄逸，好有海潮feel。」

相信熟悉Irene的人都知道，她1991年已推出個人首張唱片《溫碧霞 IRENE》，但對於《海潮》演唱會的選歌部分，她似乎沒有打算精選經典之作，反而以個人為本，希望用歌曲回應大眾過去對她的種種誤解，「其實今次揀歌，每一隻對我自己都好有意思，全部都係我自己嘅心聲，想唱俾大家聽。」她坦言這次演唱會是她一個很好的澄清機會，我係好想大家可以真正了解我，借歌曲去道出道多年的心聲。

係純情玉女定三級片女星？

新一代人對於溫碧霞的認識，大概只停留於「性感海潮」，但她的名氣及至中港台，成名作當然不止於此；對於老一輩觀眾來說，溫碧霞是一名三級片女星，曾經拍攝《驚變》等三級片，但她坦言此舉不為成名，而是因為「太反叛」，很多傳聞指Irene拍攝《停不了的愛》後大感不滿，而原因是她的床戲對象是吳孟達，而非主角劉德華，「當年係因為我真係太細個，因為爸爸係國民黨軍官出身，所以管我管得好嚴，好反對我拍戲，而我天生又任性，愈唔俾我做咩？我愈要做。」拍攝《停不了的愛》後，Irene在96年拍攝了更性感的《驚變》，「當年我一早就知有超性感裸露鏡頭，嗰陣我接呢部戲，其實係因為我好鍾意個劇本，好想香港都有一部拍得好靚嘅三級電影，覺得係為藝術而犧牲，但依家諗番，真係覺得自己好傻……」她坦言許多人都對她存在誤解，今次再度回歸開騷，的確是用「澄清」的最好之法。

唔係告別演唱會

早在數月前，在Irene公布即將開演唱會時，網上盛傳這將是她的告別演唱會，但Irene卻笑言：「我係俾人整蠱咋！因為4月1號愚人節，內地有個新聞話我會退出娛樂圈，於是我微博就有好多fans問發生咩事。其實我一路都冇諗過要放棄演藝事業，更何況我啱啱先成立電影工作室，呢個係我人生入面最大理想，啱啱起步，而且我今年又出寫真，又開演唱會，又籌備第二部電影，我點會呢個時候放棄？」

場地：富薈上環酒店
髮型：Ken Ng@Queens Private i
化妝：Khaki Yan