【專訪】J.Arie新歌係黃偉文《女神》延續 重新認識呢位潛力歌姬
2013年，香港樂壇出現兩位極具潛力的女新人，一位叫Aga，另一位叫J.Arie。一位賣創作，一位賣唱功，當年樂壇可說是二人的天下。不過做歌手，怎樣也講究一些運氣。際遇、歌運，等等因素也直接影響一個歌手的發展。正當另一位對手找到自己的代表作，在樂壇佔一席位的同時，J.Arie其實亦默默地尋找自己的路向，很多時侯為電影主題曲擔當主唱，如《每一次都是你》、《不想再見》等，雖然迴響不俗，可惜在樂迷心目中還是欠缺獨立自主性，變成為他人作嫁衣裳。襯著年尾，J.Arie亦推出一首真正屬於自己的主打作品《無神論》，不禁令人驚覺，其實除了大家口中常說的Aga、衛蘭、Gin Lee、JW，J.Arie也絕對有條件向樂壇天后的地位邁進。
攝影：黃國立
Hair : Bowie Lo@ Fifth Salon
今次推出新歌《無神論》，未聽人聲，先聽歌曲前奏已有一種Gospel味，與歌名相當貼題。但原來這首歌得來不易，監製藝深表示：「某程度上有啲嘢真係要逼出嚟，J.Arie寫呢首歌嘅Demo足足比我逼佢改咗十幾次先出到嚟，寫到我覺得好值得去believe先開始著手錄音，所以我對佢嘅要求係好高，我唔敢講佢係咪好唱得，不過佢絕對擁有一把感動到人嘅聲音。」J.Arie笑言：「一開始咁樣比監製『摔』，其實係有啲洩氣，尤其自己亂嚟、橫衝直撞，會比佢改得好厲害，但經過咁多次經驗，其實今次已經改少咗。」歌曲當中，J.Arie在Music Break部分更有一人扮演「20人五聲部合唱團」的和聲，監製藝深大爆：「佢唱完呢一Part真係喊咗出嚟。不過budget所限所以無辦法啦！」
不過一首歌曲要大熱，除了作曲及主唱外，填詞也佔著相當重要的一席位。今次《無神論》由詞神黃偉文執筆譜詞，細心留意下，其實與去年他為鄭欣宜寫下的作品《女神》有所關連。去年奪得「叱咤樂壇我最喜愛的歌曲大獎」的《女神》，固然就如歌名一樣，是以女士心目中的「女神」為主題而譜上歌詞。而今次J.Arie的《無神論》，則環繞著女生心中的「男神」。更重要的是，兩首歌不謀而合也是向樂迷循循善誘，讓大家學懂要愛自己。就如大眾所知，黃偉文一向喜愛打造系列式作品，就如「病態三部曲」、「垃圾五部曲」等，難道今次正是「人神」系列的開端？J.Arie笑言：「其實Wyman係聽咗我好多愛情經歷之後，將一啲我自己比較得意嘅愛情觀抽出嚟，就成為咗《無神論》。不過同Wyman去傾嘅時候，佢又無特別去提呢首歌係唔係《女神》嘅續集，反而我覺得呢樣係Wyman寫詞上嘅執著，因為佢真係好鐘意寫一啲關連性嘅作品，話唔定佢寫多幾首之後，自己就會開估。」
在大眾眼中，J.Arie的歌路也是集中在《道別說愛你》這類型的作品，卻忽略了她極高的可塑性，就如《天平先生》這類快歌，以至《你死我活》的Acoustic Version，先天的聲音讓她輕易駕馭各類型風格，在J.Arie自己眼中，比起音樂風格，她更著重自己聲音上的表達：「綜合嚟講，我比較喜歡聲音發揮空間好大嘅歌曲。有位日本天后我自己特別鐘意，就係MISIA，佢一樣有好多唔同類型嘅歌，慢歌當然最經典，但係中板歌、快歌一樣有。甚至Carpenters、Stevie Wonder，再到近年嘅Bruno Mars我都好鐘意。所以對我嚟講，廣東歌唔係得一種可能性，唔係得Ballad先可以叫做流行曲。」
臨近年尾，音樂人少不免會想到有關樂壇頒獎禮的事情，J.Arie亦直言：「老實講，今年呢首《無神論》由Demo而製成品，成件事落咗好多心機去做，我自己好喜歡之餘，亦覺得呢首歌其實幾有希望，所以好想佢成為我新一首代表作。因為今次我嘅參與度好高，所以已經當咗佢係心肝寶貝。」
而監製藝深也坦言：「今次呢首歌，我真係要用大型製作去形容，全部用真樂器，用最好嘅Engineer。但對於獎項，我嘅睇法係，得到認同係好事，藝人得獎亦好重要。不過現今樂壇正正就係缺乏一個有代表性嘅頒獎典禮，一個藝人做咗全年嘅音樂，以往嘅頒獎典禮係可以令歌手一整年嘅工作有所提升，令更多人廣泛地認知呢個人。可惜去到今時今日，香港嘅頒獎典禮已經淪為一啲小圈子嘅遊戲，最慘係坊間嘅人唔覺得樂壇頒咗呢個獎係真，我曾經見過有啲頒獎禮完咗，網民會笑。我就諗，點解一個歌手攞咗獎，反而要比人笑？所以呢樣正正係大家要諗，一個點樣嘅頒獎禮先可以真正幫到歌手。其實香港好需要一個類似《金曲獎》咁高透明度，制度有認受性嘅頒獎禮，給予歌手一個應有嘅位置。」