【專訪】無視網上「負皮」進軍樂壇 顏卓靈：總之就係做自己！
相信大家對顏卓靈這個名字都不會陌生，由《狂舞派》再到不同幕前演出，大家都習慣了她演員的身份。今年她跳出框框進軍樂壇做新人，卻引來不少網民留負評。面對種種聲音，顏卓靈依然忠於自己，希望成為歌手多過成為明星：「我唔想做假囉！好辛苦，我唔得㗎！總之就係要做自己！」到底何事令顏卓靈如此執着？
攝影：江智騫
以實力反擊「負皮」
由演員轉變成歌手，總要面對不同聲音，例如「唱功一般」、「聲線似某某歌手」等等，面對種種抨擊顏卓靈態度樂觀，打趣道：「其實初初出道總會俾人話似邊個邊個，我啱啱做演員嗰陣都俾人話似薛凱琪、湯唯，話我似靚女梗係正啦！依家話我似一啲勁嘅歌手仲正啦！哈哈！」
雖然顏卓靈樂觀面對，但面對網上「負皮」，甚至一些未曾聽過她歌曲的人無理留言，可有想過要反擊？顏卓靈表示：「反擊就梗係用作品去反擊啦！要努力唱多啲好歌！冇理由因為一啲未聽慣我把聲，或者一啲唔鍾意呢種聲線嘅人，而阻止自己嘗試，因為所有創作都係會面對好多意見，由爭議去開始。」她續道：「加上我見有好多成功，而且聲線獨特嘅歌手初初都係面對好多抨擊，一諗到呢樣就即刻打咗支強心針！我不是孤單的！哈哈！」
想做歌手多過做明星？
顏卓靈今年推出了三首歌曲，都算是「多產新人」，而且每首歌的聲線控制各有不同，雖說可塑性高，但會否擔心太可塑缺乏了個人特質？她卻不着急要「搵自己把聲」：「我唔會心急，因為仲年輕有好多空間會去試，同埋如果好急去到嗰個位，我驚件事就唔夠特別。」她續道：「如果唱每首歌都係同一把聲……睇下你想做歌手定係想做明星？我就唔perfer後者。」
到底何事令顏卓靈對「做明星」抗拒？因為她希望保留自己真摰的一面：「第一我想多啲私人空間，第二係唔想做假囉！好辛苦，我唔得㗎！唔知點解，個性格就係咁。」原來歌曲《惡女》就是在訴說她的心聲：「《惡女》就係講呢樣嘢，我有好多面，唔係每個時候都嘻嘻哈哈，韓國式微笑打招呼㗎嘛。做嘢時咪會囉！哈哈！平時就……如果我唔保有呢個可能性，就做唔到表演藝術。」
「我唔想去做好單一、好表面嘅嘢，同埋好多人都做緊就唔使多一個人去做。」
忽然變成大熱新人？
入行5年再做「新人」自然引起大家關注，又有傳媒形容顏卓靈為大熱新人，對此她也變成「黑人問號」：「點解嘅？好神奇！可能係大家加俾我嘅期望，都開心嘅，即係大家都有留意。」既然外界呼聲高，那顏卓靈對年尾頒獎禮有何期望？她卻覺得似去party：「其實我冇諗太多，反而能夠一次過見晒今年咁多位新人覺得好開心，好熱血，感覺好似去O Camp咁！完全冇敵人嘅感覺，最期待當晚大家都着靚衫自拍！」
雖然顏卓靈今年才做樂壇新人，但她《狂舞派》中阿花的形象深入民心，與她歌曲所走的文青風格大相逕庭，是否要刻意擺脫大家的既有印象？其實顏卓靈純粹想做自己：「冇話刻意去擺脫，因為阿花同顏卓靈根本就係兩個人，總之就係做自己！同埋好似唔係好多人認識顏卓靈，希望透過歌曲令更多人認識我。」
《Baby Stop》小故事
顏卓靈新歌《Baby Stop》以Acoustic風格為主再帶點Dream Pop的元素，予人一種竊竊私語，與自己內心讀白的感覺，原來緣自一個忽發奇想的故事。
顏卓靈話：「首歌係講一對年紀相約嘅男女喺異國相遇，大家都為咗逃避令自己迷失嘅事情離開家鄉。雖然身處異地可以搵到自由釋放嘅感覺，但無人可以分享。佢哋各自喺家鄉都鍾意深夜到街上跑步，一次偶遇發現原來對方都係咁，之後佢哋一齊喺馬路中間無視所有事情去跑。佢哋唔係戀人關係，呢次相遇大家都好似有啲得着，但又冇resolve到任何嘢。」
聽完顏卓靈解釋，會唔會令你更代入到《Baby Stop》之中呢？