【專訪】親證Boy’z正式解散 關智斌：只不過無正式對外公佈
歌手關智斌（Kenny）2003年與張智恆（Steven）以組合Boy’z出道。當年他們初出道已得到不少的關注，而且也曾推出多首k房大熱的合唱歌曲。近年兩位成員已單飛發展，成員關智斌（Kenny）更靠自己雙手開拓內地市場。他坦言：「Boy’z已經解散，只不過無正式對外公佈。」
攝影：黃永俊
場地：Vesper Bar
Make up: Elaw Wong assisted by Crystal@thelook-studio.com
Hair: Keith Wong & Alan Chan @Orient4
Wardrobe: 5 cm
「我以前出道嘅時候曾經做過好多唔成熟嘅事，自己當時緊係唔覺啦。後來大個回望以前自己先知道。好似上年有次上Do姐（鄭裕玲）節目做訪問，Do姐都有同我講話我哋Boy’z好囂張，以前喺TVB見到人都唔識打招呼。其實我哋點敢囂張，只不過以前細個唔識主動同人打招呼，無呢個習慣。我又唔識去感激身邊嘅人。依家回望以前嘅自己我真係可以用『得啖笑』嚟形容。其實Boy’z一出道比起同期歌手，真係幾順利，所以真係唔會學到做人道理。我當時唔會知道其他人喺背後幫咗自己幾多，自己開口埋口講嘅努力，比起其他人真係差好遠。我有時會諗，如果以前嘅Boy’z一早明白呢啲道理嘅話可能已經好唔同。以前我哋有真係會『是但啦』嘅態度得過且過。」Kenny坦言。
提到之前有報導指Boy’z未能一直合作，是因為Steven的工作態度未能配合，現在的Kenny卻不認同：「以前我哋都太自我膨脹，而且身邊又無人會出聲，不過就算有我哋都唔會聽得入耳。我當時覺得自己唔需要出力都已經會有工作機會，點解我要出力呢。當然依家緊係知道其實所有嘢都係公司嘅光環先有。所以每次我諗起呢個問題我都會覺得自己好蠢。如果當初Boy’z肯加入自己嘅想法，多一啲創意，多一啲個性，我覺得會好唔同。因為無人會鍾意一隊傀儡組合，何況我哋係男仔。我哋Boy’z算係一個無咩自己諗法嘅一個組合，咩都唔諗，你叫我做咩就做咩。而公司都做得無錯，佢哋見呢兩個後生仔咩都唔諗，自然佢哋就要幫我哋諗埋。而Steven方面，我覺得自己無盡到最大嘅努力同佢溝通，我認為自己應該可以喺呢件事上再做好啲。」
Kenny自從到內地發展後工作重心都放在拍劇及電影上，除2016年曾推出新曲加精選《角色》之外，要再數上一張音樂專輯已經是2008年的時候，雖然他有在音樂上投放很多時間去宣傳，但依然有一班死忠粉絲希望Kenny可以在廣東樂壇重新出法，畢竟現年36歲的他曾是80後的童年回憶：「哈哈，其實我都有見過啲留言『原來Kenny仲未死』、『以為Kenny唔再唱歌』。其實我一直都好鍾意音樂，所以有機會我一定會做。2016年嘅時候公司同我講話我好耐無出歌，所以就幫我出一張新曲加精選《角色》，其實我都好鍾意，收錄3首國語新歌《次要角色》、《塑造角色》、《終生角色》都係我自己填詞，入面主要想同大家分享我對以前、現在、將來嘅睇法。」
Kenny雖然在今年未有推出新專輯的打算，但先後推出與電影及劇集主題曲《習慣說謊》、《江湖就這樣》，雖然有新的國語歌，但依然有不少樂迷希望Kenny可再唱廣東歌，畢竟他在香港單飛出歌時，的確有不少熱門作品如《眼紅館》、《再見·美惠》、《預言書》、《雪女》等：我好開心咁多年都仲會記得，我一直有留意大家嘅留言，大家叫我再唱廣東歌。我一直有好認真去考慮呢件事。我發覺唔單止係香港歌迷，有時我去內地或者台灣工作原來佢哋都好留意我嘅廣東歌。佢哋會掉轉問我，點解唔唱廣東歌，其實佢哋就算唔識廣東話都好鍾意聽廣東歌。而我係有打算去做一張EP，我心入面已經有一個主題，而歌已經錄咗兩首，不過我想時間再充裕啲先推出，因為一入劇組就做唔到其他宣傳，而我今年嘅工作已經排到年底。」