【獨自音樂】唱MK情歌夠貼地 Dear Jane：想做啲有共鳴作品
在香港這彈丸之地要夾band從來不容易，除了要面對「土地問題」、表演場地缺乏外，現今香港樂壇之路異常狹窄，要搵一把亮麗的「新聲音」更難上加難，遑論一班夾band的要成為主流樂隊。近年要數活躍於香港主流樂壇的樂隊並不多，樂隊Dear Jane更是當中每一年都有大熱歌曲的樂隊。話雖如此，但也有部分網民標籤Dear Jane的音樂為「MK情歌」，而且這些作品都是為「主流音樂」的受眾而服務。「話我哋唱MK情歌都幾好呀，夠貼地！其實我哋仍然有做好多Rock歌，可能大家比較喜歡聽我哋嘅情歌多啲，所以少啲留意我哋嘅Rock歌。」Dear Jane說。其實要是沒有這些「MK情歌」，我們根本沒有機會評論Dear Jane，更沒有機會認識他們的音樂，網民應該要標籤的並不是Dear Jane，而是主打K歌市場的香港樂壇。
攝影：江智騫
髮型：Jamie Lee@HAiR
化妝：German Cheung
今季最後一集的《獨自音樂》找來樂隊Dear Jane擔任壓軸嘉賓。Dear Jane 2003年成立，2006年推出首張大碟。一向走punk rock路線的Dear Jane在出道時已有不少好歌，如《男兒當打交》、《一百萬人的故事》、《別說話》。轉投華納後更有《Rising Star》、《Yellow Fever》等熱血歌曲。直至重新演繹共鳴之作《到此為止》及《不許你註定一人》後，Dear Jane的網絡人氣點撃更推至高峰，而《不許你註定一人》更是近年婚禮中的熱門歌曲之選，上年推出的MV三部曲（《哪裡只得我共你》、《只知感覺失了蹤》及《經過一些秋與冬》）更是一時佳話，不少樂迷更搶飛到演唱會看他們的「隱藏結局」。縱使近年的Dear Jane的音樂與網民打成一片，卻有部分人在網上形容Dear Jane的曲風為「MK情歌」，缺少了搖滾味。
「網民形容我哋嘅歌係『MK情歌』，其實我哋一直都知，一直都有留意佢哋嘅comment（留言）。其實我覺得佢哋咁諗都幾好，夠貼地！掉轉頭睇，佢哋都有話我哋情歌好似佢哋嘅愛情故事。有一件事我哋好深刻，就係有一次我哋開完演唱會，有對情侶走過嚟喺我哋面前喊，我哋當時好愕然以為佢哋唔知發生咩事，之後哩對情侶同我哋講話我哋嘅情歌《不許你注定一人》成為佢哋一首好有紀念價值嘅歌曲。因為哩首歌令佢哋走埋一齊，之後仲結婚。其實我哋聽到之後真係感動同開心。由最初Dear Jane玩pop punk到依家，咁多年我哋都只係想同觀眾溝通，只要我哋嘅歌能夠做到哩一點我哋已經好開心。所以大家用『MK情歌』嚟形容我哋都只係一個名，唔會因為咁而動搖我哋創作嘅方向同埋對音樂嘅堅持。」Jackal說。
Howie續說：「無錯，我哋係有聽過有人話我哋以前玩好多punk rock，不過依家轉玩情歌，其實我哋唔係。我哋仍然有做好多唔同類型嘅rock歌，然後中間都有做好多情歌。最大問題係大家比較少去留意我哋嘅rock歌。如果以數字去統計，我哋自從《不許你注定一人》（2013年）之後，我哋出過4首情歌、8首rock歌或者唔係以愛情為主題嘅歌。我哋會繼續努力做搖滾曲風嘅歌，但係可能大家比較喜歡聽我哋嘅情歌多啲，所以少啲留意我哋嘅Rock歌。」
Tim則認為：「其實Dear Jane從來無諗過要超越《不許你注定一人》，我哋嘅創作亦無因為哩首歌而被框住，我哋每一首歌所放嘅時間同心血其實已經超越之前嘅作品。我哋Dear Jane想法好白簡單，就係想做一啲好聽，大家有共鳴嘅作品。」
談到Dear Jane最近推出的新歌《全也活過來》與早前推出的《也許我不會活多一歲》同是Howie作曲及林寶填詞，兩首歌曲原來也是上下集，有首尾呼應之意思：「新歌《全也活過來》其實係今年推出嘅《也許我不會活多一歲》嘅下集。當填詞人林寶收到哩兩首歌嘅時候佢已經諗到一個message（信息）用兩首歌去表達出嚟。《也許我不會活多一歲》其實係一首比較用態度去講哩個故事，好似歌名意思，當你只得一年壽命嘅話，你到底會點樣過呢？你會放棄等死？定係你只有一年命或者只係得一日命，你都會珍惜每一刻去做更多嘅事呢？《也許我不會活多一歲》就係要話畀你知，你做嘅每一件事都係有影響力，一個人最無影響力嘅時候就係你乜都唔做嘅時候。至於《全也活過來》反而想表達唔同階層嘅心聲，當你30歲嘅時候，你發現自己根本未活過20歲，你係唔會知道30歲嘅感受。好多時候啲人話玩音樂好辛苦，做人好辛苦，其實哩個世界無嘢係唔辛苦，講到尾係要睇下自己個心態，你係好艱辛去做，定係保持一個熱血嘅心去做。當你做完之後回望以前，你自然明白咩叫做《全也活過來》。」主音Tim謂。
Nice表示：「我哋喺《獨自音樂》唱2016年三部曲嘅《哪裡只得我共你》，係想話畀大家知，我哋上年將三首歌《哪裡只得我共你》、《只知感覺失了蹤》及《經過一些秋與冬》串連成為三部曲。其實當時我哋做呢3首歌真係好興奮。因為哩個係一個同樂迷、網民嘅互動。喺唱創作哩幾首歌嘅時候我哋一直有睇大家嘅留言，究竟佢哋想故事入面嘅情侶結局係點，結果故事入面嘅主角及結局成為一件大家非常深刻嘅事，所以嚟緊嘅Dear Jane想唱多啲與網民可以直接參與創作嘅歌曲。依家嘅我哋除咗會宣傳新歌《全也活過來》之外，我哋會玩好多內地tour（巡唱），我哋會喺2018年年頭做一啲好玩嘅project，會連續幾個月做一啲pop up活動。」