【獨自音樂】最愛代表作《矛盾一生》　JW：令我信心由負數變正數

要數近年在香港成功的歌手，我深信JW王灝兒一定是其中一位。90後的她自初出道時已被認同其歌唱實力。到近年她更唱出多首共鳴情歌，成為網絡大熱，令她終於能在明年一嘗紅館美夢。JW熱愛唱歌程度要用非一般的熱愛來形容。JW在拍攝節目當日帶病在身，製作團隊亦擔心當日她的聲音狀態，不過敬業的她仍堅持唱出《矛盾一生》及《你帶著我們的青春離去》，希望所有收看節目的觀眾能夠感受JW對歌唱的熱誠。
攝影：謝浩然

90後的JW王灝兒年紀輕輕已在不少歌唱比賽中得到優異成績。自初出道首推其第一首作品《掛念好友》時已被肯定其唱功。其後更有不少人因合唱歌曲《男人信什麼》而把JW的聲線與當時的師姐衛蘭Janice相提並論。近年轉簽新公司（Sunny Idea）後，她的事業更上一層樓，唱出多首網絡大熱之作：《矛盾一生》、《小故事》、《多少年》及早前與坤哥（吳業坤）合唱的《原來只因深愛著》等，當中《矛盾一生》在Youtuber更錄得8位數點撃次數。苦等七年，她終於有登上紅館的機會。

談到作品《矛盾一生》，坦白說歌曲的威力不只在網上的點撃次數，其故事所產生的共鳴感，更常常成為網絡熱話。有人認為《矛盾一生》成為JW事業轉捩點，也有人認為《矛盾一生》為JW帶來紅館演唱會的機會:「唔只係一首歌咁簡單，我入咗新公司之後，改變咗好多，因為整個團隊都好用心幫我。不過我好多謝所有為《矛盾一生》而付出嘅人，包括作曲嘅林家謙、填詞嘅陳詠謙、編曲嘅黃兆銘仲有編曲加監製嘅周錫漢。因為呢首歌令我得到好多，佢令人認識邊個係JW，帶俾我喺歌唱事業嘅信心。呢首歌可能對好多人嚟講係一首情歌，但對我嚟講係一首成就我夢想嘅作品。所以 It’s not one song，it’s everything！」JW說。

「我覺得做歌手從來都唔係付出100%就會有相等嘅回報。歌手除咗要有實力，亦需要靠運氣，際遇。我覺得自己好好彩，入行7年遇過好多幫我嘅人，佢哋都好錫我，好支持我自己，所以我一直都好感激所有喺呢7年幫過我嘅人。」JW說。

JW續說：「緣份好重要。其實所有同我同期出道嘅歌手都好有才華，我自己都好欣賞佢哋。我相信不久嘅將來大家都會有同樣嘅成績。只不過我好彩，所以我先有呢個機會。我到現時為止都係覺得，開紅館演唱會，根本就係上天跌落嚟嘅禮物，呢份禮物唔係只係送俾我，而係全公司上下。有呢個機會喺眼前我會好好珍惜，我好想可以用呢個機會做一場好好嘅演出。唔會諗賺唔賺錢，其實開一場真係唔會點賺到錢。今次我同公司一心為音樂而做，真係好想做到一個好靚嘅performance畀大家睇。」

JW唱過多首代表作，究竟那一首才是她的最愛？

「可能會有好多人會覺得我最鍾意嘅歌一定係《矛盾一生》，Which is true！我自己都好鍾意《矛盾一生》因為佢令到更多人再次認識JW。呢首歌帶畀我好大好大嘅自信心。令到我由信心係負數變為正數。呢首歌對好多人嚟講係一首情歌，但對我嚟講係一首成就我夢想嘅作品。無呢首歌，我未必有機會上紅館。不過除咗呢首歌，我都好鍾意好《多少年》、《Stupid BOII》仲有新歌《你帶著我的青春離去》。其實我一直都好想做一啲Hip Hop、Rap曲風嘅歌，而《Stupid BOII》呢首歌終於俾我等到。至於《你帶著我的青春離去》係一首R&B嘅歌曲，其實我一直都好鍾意R&B嘅歌曲，而且我又好欣賞Cousin Fung（作曲人）嘅作品，今次可以同佢合作我真係好開心。」JW笑言。