【獨自音樂】鍾舒祺台灣出道受冷待：負責人話得閒寄罐頭畀我
當你見到鍾舒祺（Sukie）的名字，可能你會想起她的打扮有個性、很浮誇、古靈精怪。又會想起她是歌手鍾舒漫的妹妹，偶爾會與家姐一起出歌。但未必有人會把她與職業歌手聯想在一起。其實鍾舒祺是一位歌手，由選秀節目出身，在節目中贏得500萬人民幣及一紙歌手約。她在台灣出道，曾獲華語天后孫燕姿為她監製歌曲。雖然她做的音樂未必好多人接觸過，但她堅信只要無悔，就算無人認識也沒所謂。
歌手鍾舒祺於今集的《獨自音樂》中唱出自已的作品《免責條款》及翻唱Lady Gaga的《Million Reasons》。她能不能成為你心目中的歌手，由你定奪！
攝影：江智騫
鍾舒祺（Sukie）向來給人感覺「癲癲喪喪」，說話時大大聲，笑的時候更是如入無人之境。她不時與家姐鍾舒漫（Sherman）拍搞笑片放上網，究竟她是位KOL、YouTuber、還是一位「藝人」呢？如果你問她，她會肯定地告訴你她是一位歌手：「其實我當初唱歌係一件好白撞嘅事。初初喺美國讀書嘅時候並唔係打算讀聲樂，而係想讀音樂後製，但因為無位所以變咗讀聲樂。讀緊嘅過程先知道原來唱歌唔係叫出嚟就係唱歌，而係要好好利用身體唔同嘅部位。」
當她在美國完成音樂學位時，Sukie竟然去了一個她從沒有去過的地方追逐她的音樂夢，那個地方並不是香港，而是台灣：「讀完書之後認識咗陳珊妮經理人，當時佢問我你咁有自信，要唔要過台灣參加《超級偶像（第三屆）》？就係因為咁我就決定去台灣開始足足八個月嘅比賽，當時我以第9名畢業。完咗比賽後我經歷三個月無嘢做嘅低潮期。之後就參加內地另一個選秀節目叫做《咪咕明星學院》。我記得呢個比賽係由某大型電訊公司主辦，都算係內地初代嘅歌唱選秀節目。不過呢個節目比我想像中複雜。除咗我，入面嘅參賽者全部都已經簽哂唱片公司，呢個比賽已經唔係選手與選手之間嘅比賽，而係唱片公司與唱片公司之間嘅鬥爭。而我就只有贏咗先會有公司簽我。結果我贏咗5百萬人民幣獎金。當然嗰5百萬入咗落簽我嗰間公司到。而我有分到20幾萬，但七除八扣後，最後收咗７萬幾蚊。」
Sukie補充：「除了成為歌手，當年嘅唱片公司仲兩個月內幫我推出咗我第一張國語大碟《不一樣》。不過當時好奇怪，每次出活動做宣傳只可以唱cover歌而唔係自己歌。因為我當時個老闆係一個生意人，所有嘢佢都只係睇數字，佢認為做音樂係唔需要出錢，所以唱片監製一直未收到錢，我一直又無MMO所以無得唱。結果公司過咗好耐先找數。其實我都幾矛盾，我唔可以話自己唔幸運，我可以出碟，但我嘅待遇真係同其他歌手唔同。我只可以講世界現實，如果我皮膚白淨，有身型有外貌可能真係可以唔同啲。」
鍾舒祺在台灣出道的日子，雖然曾因找數問題未能以自己的歌曲為自己新碟宣傳，更因公司投放的資源不足而化妝整頭服裝自己包辦，不過那段時間她卻認識了不少伯樂及知己：「其實我好多謝舊公司同事，因為佢咃在公在私都幫咗我好多，又幫我手剪片。呢啲感情真係用錢都買唔到。」
雖然經過這段不順利的時間，但她的公司經歷人事變動，卻大大影響了她在台灣發展：「公司改組，搵咗一批新同事幫手，當時新嘅負責人係做金融嘅。其實佢做開金融又點會真係識做音樂。當時佢同我傾前路問題，又話初頭以為我係有錢囡發明星夢，接著又話我哋唔會再幫你，呢份合約如果你唔想解約唔緊要，但我哋（公司）唔會再幫你，你可以自己出去試下。之後佢交咗份合約俾我，我走出咗佢office，佢仲喺我面前同會計講『得閒寄罐頭同錢畀我』我跟住就同佢講唔駛啦，That’s not what I need。我就攞住份合約一路喊一路走。」
「雖然我喊住離開呢間唱片公司，但我最開心係識到王心凌嘅經理人。佢當時幫過我好多，除咗用盡人情卡幫我搵機會，又安排我拍攝《還珠格格》又幫我搵到孫燕姿幫我做歌曲《囂張》嘅監製。仲記得當時為咗做呢首歌，飛去新加坡搵燕姿。佢爸爸媽媽都對我好好。點知錄完呢首歌估唔到有阻滯，就係因為人事變動，佢哋話因為似孫燕姿嘅作品所以唔俾推出。孫燕姿係電話到鼓勵我要拎番首歌，結果我用咗5年時間佢哋先俾番我，直到上年《囂張》先推出到。」Sukie說。
鍾舒祺唱出自已的作品《免責條款》，並由結他手To Lee為她伴奏。歌曲內容都是以她的經歷出發。（點撃以下短片）
後來Sukie回港發展後一直自己專注做音樂，以她姐姐鍾舒漫在香港人脈，應該不愁沒有簽約唱片公司的渠道。不過Sukie似乎暫時未有這個打算：「返香港後同家姐合唱了《SS14》，成績算不錯。之後開始做自己音樂，所有嘢都係真金白銀自己出錢。自己暫時未有打算簽其他公司，鍾意做自己鍾意嘅音樂，我連自己MV都會坐係到睇住導演剪。呢兩年我做過幾首嘔心瀝血嘅作品，雖然並唔係好多人聽過，但我唔介意。我覺得質素係跟住自己一世，所以我覺得無悔。」
Sukie續說：「雖然暫時音樂上靠自己，但係好興幸之前因為拍電視台節目《今晚睇李》而識到一班Palwerful Band 成員。Palwerful Band之前又做過好多大大小小嘅騷，豹哥（單立文）又好照顧我哋，雖然佢好忙，但任何Palwerful Band成員生日佢都一定唔會錯過！」