【專訪】關智斌隻身返內地由零開始　心靈安慰全靠一部麵包機

歌手關智斌（Kenny）轉戰內地發展多年，雖然在香港不是常常聽到他的消息，但每次見到他的報導，都是以他在內地的收入作標題。上年就有報導指他收入超過5千萬人仔，今年又有報導指他收入達7千萬，而且更購入多層豪宅做「磚頭王」。眼看他風山水起，真的想講一句「搵咁多，俾我都唔返香港啦！」當大家一心以為他名成利就全靠公司的光環時，但這一切都要由當年他在內地擔任由三、四線演員開始。
攝影：黃永俊
場地：Vesper Bar
Make up: Elaw Wong assisted by Crystal@thelook-studio.com
Hair: Keith Wong & Alan Chan @Orient4
Wardrobe: 5 cm

對於很多香港歌手或藝人來說，能到內地發展絕對是事業上的大躍進及搵真銀的機會，如陳奕迅、陳偉霆（William）、鄧紫琪（G.E.M.）等。不過對昔日Boy'z成員關智斌（Kenny）來說，卻是重新開始。他當初在香港演藝事業發展未如理想，於是把心一橫，隻身到內地闖天下。

「大家可能唔知，其實當初上去係我自己意思，公司冇特別安排人手，而我自己一個就拖住個皮篋上去，咩人都唔識，咩都係自己做。我當時上到去拍戲都係做三、四線嘅角色，一般都係做嗰啲搶人女朋友、斯文敗類、強姦犯、道友嘅角色，其實錢係唔多，不過起碼有嘢做。雖然咩都係自己做，但我好感激有呢段經歷，因為我知道自己以前幾咁唔識珍惜身邊嘅機會。就係咁，我一直做，到後來有拍完套劇叫《追魚傳奇》，就係呢套劇令我到內地人真正認識我。」

「我以前以唱歌為先，不過去內地捱下拍下，培養咗演戲嘅興趣。呢樣係我都估唔到。我覺得拍戲係好釋放到自己感情嘅方法。以前嘅我對身邊事物冇乜感受，冇體驗，想喊都唔識喊。依家嘅我學識感受身邊事，我可能睇兩句對白都可以流幾行眼淚。」Kenny說。

Kenny自2013年主演古裝神話劇《追魚傳奇》後人氣急升，雖然未如師弟陳偉霆一般「上神檯」，但成績已是吐氣揚眉。

其後更劇接劇，過著充實的演員生活，工作如日方中的他也曾遇過想放棄的時候：「我記得有一次拍劇我係好想放棄，因為工作太冇系統。當時我每日都係靠飛紙仔工作，次次去到拍攝場地都冇得事前準備，只可以去到人哋俾咩對白我就跟住去讀，完全係冇前文後理，冇靈魂。」

Kenny續道：「我有時會諗，點解我要離鄉別井，每日一早化妝帶住個頭套，做一啲冇價值嘅嘢呢？當時除咗我有咁嘅諗法之外，同劇嘅另一台灣女演員都有同感。呢幾個月我哋可以用『相依為命』來形容，大家喺呢份工作上得到嘅樂趣，就係佢有一部麵包機，而我有一部咖啡機，每日佢整麵包我沖咖啡，日日如是。」

今日再回望，Kenny也學會釋懷：「嗰次係我第一次好想離開一個劇組嘅經歷。其實做嘢邊會次次都冇委屈，不過我係一個好善忘嘅人，好多時都會唔記得。每次完成一套劇返香港，我就會當發完一場夢咩都冇哂印象。」

Kenny回內地拍劇後學會釋懷，變得豁達，談到昔日被戲稱「小斌女」，現在卻因為鋼條身型被稱作「小斌佬」，他表示：「我當初係因為健康，同埋對自己嘅一個承諾所以走去地獄式訓練。初出道時公司已經叫我同Steven去做GYM，雖然係有去，但去到我最多都係舉兩嘢跟住玩手機再自拍交功課。直到兩三年前，我想改變，之後先決心去練。」

下定決心作改變，不單止令Kenny變「小斌佬」，還帶來更多工作機會：「不過講開健身，依家喺內地工作『大隻』已經變成一個基本需要。我發現好多劇本都需要有意無意除衫，無啦啦都又要加一幕出浴，甚至拍古裝嘅時候都會有一幕係講練功，但係又要練到爆衫。其實諗起雖然係幾搞笑，不過我認為大隻咗係好事，多咗工作機會，仲有多咗角色嘅選擇。」

談到現在的「小斌佬」在內地風山水起，他的工作收入常成為話題，Kenny坦言：「上年話我收入5千萬，今年收入7千萬，我當然冇啦，呢個數字太誇張，印銀紙都冇咁快啦！不過我有信心我將來有機會搵到，我會以呢個為目標。」

快將37歲的Kenny近年事業不錯，在內地劇接劇，奈何他公開表示自己是一名「單身狗」，問到他會否有成家的打算？他直言渴望有家庭：「我想有自己家庭，我好想結婚。只不過人大咗好似仲難搵合適嘅對象，因為真係冇時間去拍拖，去好好同一個人去相處。」

Kenny師弟陳偉霆比他上內地發展還要遲，但現在已達是「神檯級」，他大讚這位師弟是實至名歸：「William真係一個好勤力嘅人，只要佢下決心佢就會不停做，想做到最好。我記得佢之前學結他，因為佢想表演，佢真係日日練幾個鐘。就算出去做嘢佢都會拎住支結他，一有時間佢就會不停練。除咗勤力之外，佢仲好識得揀劇本，每次有劇本佢都會睇得好仔細，知道咩嘢先合適自己，所以佢成功真係有原因。」