【專訪】周慧敏自認不是好老婆 工作太專注：冇時間做好妻子角色
90年代紅透整個亞洲的「玉女掌門人」周慧敏，自婚後少有在訪問提及倪震的她，在是次交談中罕有提起她與老公的生活細節。單從他們的共同嗜好（美式桌球）就知道他們對周邊事物的看法和處事態度。「每次有人見到氣氛好嚴肅以為我哋嗌交，其實我哋唔係。我哋平時打波為咗保持集中力，所以我哋唔會喺波場上嬉戲，但係一打完我哋就會變回正常。」周慧敏說。
攝影：梁碧玲
場地：都會海逸酒店
將於2018年開紅館演唱會的50歲「凍齡女神」周慧敏（Vivian），向來做事絕不馬虎。她曾在訪問中形容自己是一位「緊張大師」，不論是開演唱會，或是一場桌球遊戲，她都會認真看待。
Vivian笑言：「我雖然同人講我係一位緊張大師，其實我係個好玩得、好傻氣、好神經質嘅人。至於我平時所講嘅緊張大師，係指自己處事態度。例如你要我玩一個遊戲，我會做好多功課去鑽研呢個遊戲。就算我同我先生（倪震）打桌球都係一樣。」
提到與老公的共同嗜好，Vivian言談間透露與老公之間的互相角力：「我當年喺Vancouver（溫哥華）住嘅時候先去學美式桌球。當時我只不過係beginner（初學者），我先生已經開始set我『士碌架』。我心諗，我連cue（球杆）都未揸好，佢已經唔讓我。但係我唔會嬲，因為打桌球就係一個心理訓練，心理質素係好緊要。自從嗰次之後我就好唔忿氣，於是我學打波第一件事就係要『救波』。之後我每次打波嘅時候我就會自己開張枱自己練習，每次練習幾個鐘。就係一個咁簡單嘅一個嗜好，我都會咁認真，呢個就係我做人嘅態度。」
Vivian越講越起勁，她續說：「當我開始學識打波嘅時候，我發現原來桌球比賽係好好玩。其實佢一直有同朋友組桌球隊打當地聯賽，剛好有一次我去Vancouver探老公，佢就同講話『今日我哋隊波嘅女成員無出現，你有冇興趣同我哋一齊比賽？如果有，你只有5分鐘準備，我5分鐘後過嚟接你。』我聽到之後真係好開心，即刻準備，我成世人都未試過5分鐘就可以出到街。點知嗰次比賽我哋贏咗，我真係好開心可以第一次比賽就有咁鼓舞嘅成績。自從嗰次之後，我就求佢再俾我比賽，點知佢話好。最後我成為一位替補球手，只要邊一隊唔夠女球手我就可以玩。其實做替補球手都幾開心，因為可以同唔同嘅隊對戰，有時又可以對我老公隊波。其實對佢隊波係最開心，因為我清楚佢嘅打法，識得點樣去防守佢。」
桌球除了是一項鬥技術的運動，也是一場心理遊戲，心理素質更是決定成敗的重要一環：「每次有人經過見到氣氛好嚴肅都以為我哋嗌交，其實唔係，我哋平時打波為咗保持集中力，所以我哋唔會喺球枱上嬉戲，會好認真，但係一打完我哋就會回復正常。」
從交談中感覺到這位女神事事認真之態度比想像中驚人，問到會否令身邊人有壓力，Vivian坦言：「其實除咗我做嘢認真，我先生都係一樣，所以我哋相處都幾好。我認為，如果另一半性格唔係認真派嘅話，我會為佢而調節。我04年復出之後一直好少理家庭，我發覺我工作嘅時候係專注唔到家庭。我無一個時間同空間做好妻子角色。」言語間明白到這位不老女神也是一個戀愛大過天的人。
她話雖如此，但Vivian近年鮮有在活動中出現，究竟有什麼令她成為口中的忙？
「我依家嘅生活係永遠都有功課要做。例如一個去印度探訪嘅活動，我都會花好多時間去了解當地文化，又會了解一下我代表嘅組織喺當地嘅工作，我所有嘢都一定要好清楚。我明白有啲人可能唔會做呢啲嘢，但係我會要求自己做哂呢啲嘢，因為呢個係我嘅責任。將來我接受訪問嘅時候都可以為佢哋發聲。人哋用一日時間做嘅功課，我會花5日去做。除咗呢啲之外，我又會持續上聲樂課程，仲有學電子琴等等。」
「雖然我喺屋企有helper（工人）咩都唔駛做，先生都唔駛我做任何嘢，最緊要relax（放鬆），有時連煮嘢食，佢都都會快過我衝入廚房煮。但係我真係想做下家務，仲有多啲時間服侍我養嘅貓。」誠然，「好妻子」在不同的女士心目的定義也不同，但在Vivian眼中，能真真正正做一位她口中的好妻子，就是零工作，心無雜念，全心全意待在家中便足夠了。