【網絡熱話】屯門茶記飯盒驚現爬蟲頭骨　網民阿媽嚇到嘔！

飯盒加料經常都有，但幫襯得茶記，通常都不會預計飯盒太乾淨，總之眼不見為淨就好。日前有網民在連登討論區開Post，指自己食飯盒時見到「不知名生物」，疑似是爬蟲類動物的頭顱，狀甚恐怖，網友紛紛揣測是蜥蜴、老鼠、蛤蚧或是壁虎等生物，究竟牠是甚麼？

網友日前在連登討論區求助，貼出數張飯盒內藏生物斷頭的圖片，驚呼：「有冇人知係咩嚟？睇落個皮似爬行動物，仲要錫咗佢一啖先見到。」他指自己幫襯屯門工業區某餐廳，買了一盒外賣咖喱牛腩飯作宵夜，卻在飯盒中發現非常硬身的「不知名生物」。從相中所見，該生物只剩頭部，嘴巴張開，還清晰見到鼻孔和牙齒等，讓樓主「安已不」。眾連登仔叫樓主將該「生物」沖水，但樓主卻指母親已嚇到嘔吐，全家人暫未敢作進一步處理，不過他已致電食物環境衛生署熱線求助，目前尚在等待答覆。

在仍未確認飯盒異物時，樓主曾致電餐廳查問，對方竟回答說是蜜棗，聽起來有點無稽，因為即使是咖喱汁也不應出現蜜棗。網友紛紛留言猜測究竟該頭部來自何種生物，有人發揮創意，開玩笑說是恐龍、鱷魚、神獸或數碼暴龍，但亦有人認真估計是蜥蜴、蛤蚧、蛇或壁虎等。

記者訪問了爬蟲類及兩棲類動物愛好者陳永尉（Bowie Chan），他詳細解釋：

香港好多呢啲檐蛇，我哋叫壁虎，再正確啲叫守宮，英文叫Gecko。呢啲守宮有啲識爬牆，有啲唔識，香港嗰啲全部都識向上爬，有時唔小心爬爬下爬咗落個鑊都唔出奇。

衛生固然是一大問題，但Bowie卻指以食用性來說，這類生物理論上是食得落肚，「我哋好多時喺賣中藥嘅地方都會買到『大守宮』，俗稱蛤蚧，曬乾咗插住兩支竹籤嚟賣。」

究竟為何會有檐蛇頭出現在飯盒中？按圖睇Bowie更詳細講解：

由Bowie的講法可推斷，餐廳有機會將咖喱牛腩飯的咖喱汁熬過夜，當檐蛇在夜間出來覓食時不慎掉進食物中，致令最終難逃一劫。總之對壁虎還是樓主來說，整件事純屬不幸。

另外，記者亦向「肥文標本館」負責人肥文查詢，他指由於該爬蟲已經煮熟，只能依稀辨別出是蜥蜴類，並謂：「如果真係要知係咩蜥蜴，最好喺佢未煮嗰陣睇到佢啲皮咩顏色，咁就大機會知係咩蜥蜴。」肥文亦熱心地向記者分享蛤蚧圖片，指兩者頭骨形狀相似，亦常見於藥材舖。