【新店速遞】黃宗澤再開蠔吧　親身示範炮製納豆藍芝士Pizza！

娛樂圈藝人踩過界絕不稀奇，演而優之後，很多人會在另一個領域建立自己事業王國，而飲食業是尤其受歡迎的「副業之選」。黃宗澤（Bosco）2013年升呢做老闆，在九龍城創立了自己的西餐廳，日前餐廳更搬到3千呎大舖，進駐尖沙咀中港城。究竟餐廳賣甚麼？廢話！怎少得生蠔、意粉、海鮮、牛扒、薄餅……？噢，答中一半啦，一向愛整古做怪的Bosco，就連做菜都要試新嘢，親自設計出他最愛的「野菌納豆藍芝士薄餅」，聽落好重口味！
攝影：龔嘉盛

靈感源自生活，講到為何會設計「臭味Pizza」，Bosco答得簡單：

因為兩樣嘢都係我鍾意食，臭鬥臭吖嘛！

到店當日桌上有很多食品，生蠔、三層下午茶、池魚……Bosco卻唯獨多番叮囑在場人士一定要試這個Pizza，「你真係要試呀！呢個我諗出嚟㗎！」他解釋說：「納豆就健康，Blue Cheese我由細到大都鍾意食，有日諗諗下，點解唔可以將兩樣嘢整埋一齊呢？不如研究下啦，初頭喺舊舖係做意粉，依家嚟咗新舖，我哋就變下啦，將佢變咗納豆Blue Cheese Pizza。」

嘩……你做老闆，當然可以全權話事，但真的不怕趕客嗎？Bosco從沒擔心過，還說：「冇問題㗎，好似臭豆腐同榴槤一樣，你只有鍾意同唔鍾意，冇中間。」本來對納豆避之則吉的記者，卒之也在Bosco大力游說下試了一塊（主人家叫到，禮貌上當然也不得不吃吧？）結果如何？按圖就知道了！

各位Bosco粉絲請睇埋落去，既然餐廳是蠔吧，除了這些玩味菜式，豈能缺少了主角生蠔的份兒？Bosco更即場展示他的開蠔英姿，腦中不禁響起一句：「黃宗澤，可能係世界上最靚仔嘅開蠔師傅！」

Bosco自言由細到大都熱愛下廚，中餐西餐都鍾意，於是幾年前開始經營Oystermine，那應該是搵到錢，所以生意能夠擴充吧？他笑笑口說：「唔係，做飲食搵唔到錢㗎，同埋辛苦啲，但我鍾意嘅。拍劇同開餐廳個滿足感好唔同，開餐廳，你見到啲人食到你嘅菜覺得開心，個滿足感會好大，因為好多菜式都係我同總廚一齊諗出嚟，或者我喺邊個國家食到啲新嘅嘢，又會飛返嚟同佢哋一齊分享、研究下。」

Bosco親自走訪西班牙、日本、台灣、歐洲、東南亞及馬來西亞等地，只要品嘗到任何特色美食，都會試著跟主廚研究製法，他特別透露：「有個又係用Blue Cheese，係青口嚟！我喺紐西蘭食到覺得好特別，返到嚟又叫總廚研究吓整唔整到，我仲好衰咁叫啲紐西蘭朋友幫我明查暗訪，究竟佢用咩Blue Cheese、大概有咩原材料呢？我哋返嚟又試試先！啲人食完又覺得，OK喎，唔臭喎！」

貴為邵氏兄弟國際影業小生，任你有三頭六臂都好，要長期中港兩邊飛，兼顧好演藝事業跟餐廳生意實在不易，因此Bosco言談間也多番感激身邊一班好員工，大讚他們非常幫到手，更謙稱：「冇咗佢哋真係搞唔掂！」比起做老闆，他認為自己更似是一個打雜，餐廳大小事務都一腳踢，並笑言：「同埋我係員工娛樂部嚟㗎，哈哈！安排活動呀，過時過節同佢哋一齊開Party，各樣啦，我同我啲員工都幾似朋友。」

為了讓新舖有個新開始，全新餐牌作出了不少改動，如新增了午市套餐及下午茶餐等，當中一定要提到這個精選下午茶，認真抵！眾所周知港女們假日最愛和閨蜜去High Tea，跟那些幾層的英式下午茶來數十張Selfie，然而酒店Tea Set動輒都幾百蚊一位，未必人人都負擔得來，反之Oystermine這款價格就親民得多，每位只需$98！

按圖即睇更多菜式及新店花絮！

Oystermine
地址：尖沙咀廣東道33號中港城第三座平台1A號舖
電話：2382 8234