曹永廉Po梁競徽撐國安法改圖相惹批評：我同佢事前有溝通！

早前曹永廉在其微博上載一張梁競徽手持一張文宣，上面寫有「支持立國安法，維持香港安定」的相片，事後被網民發現曹永廉上載的相片原來是P圖，其實梁競徽原圖是寫有：「向前線消防員致敬」，其後曹永廉遭到網民圍插企圖借梁競徽過橋表忠愛國。

昨晚（4/6）曹永廉出席活動時接受《香港01》訪問，就此事回應說：「其實嗰張相我以前都有影過，幾年前有個消防員過身，我哋大家都有寫咗一啲慰問字句喺張卡度，而佢因為辣着咗好多火頭，啲人就幫佢啲字改晒，咁樣我覺得好唔公平，佢都有同我講佢都有啲唔開心。」（Po佢啲相前佢喺知道？）阿廉續說：「佢係知道， 我係有同佢溝通，其實我都唔想有咁多仇恨。」（話你借佢過橋？）「其實我冇嘅，我自己都唔需要做到咁，我哋大家都係好朋友嚟㗎，我哋都有聯絡，如果大家話我借機抽水，唔緊要嘅，我都冇所謂。」