徐忠信逝世｜曾跟三大武打明星合作　讚李小龍好打過李連杰

香港武打演員及武術指導徐忠信，今午（02/11）便傳來離世消息，享年70歲。人稱「大師兄」的徐忠信，兒時到東方戲劇學校學北派功夫。1960年代入行，1966年拍《大醉俠》，笑面虎一角亦成為他另一外號。70年代開始主力在香港無線電視劇集和電影中，擔任武術指導工作。由於樣貌具霸氣，多演大賊、黑社會頭目及武林高手角色。

大師兄徐忠信曾經與國際巨星李小龍，李連杰，成龍合作，曾參與無數影視作品至今。大師兄早前出席《飛虎之雷霆極戰》記者會時，提到港產電影《黃飛鴻之鐵雞鬥蜈蚣》中角色雷一笑，與李連杰好戲連場，拳拳到肉打到飛，當時大師兄接受《香港01》訪問時憶述說：「當年李連杰係少林寺出身，功夫都好勁，而我就係京派出身，有時我哋兩個打起上嚟，大家都有誤打到對方，有時我中咗拳都要表現得冇事，仲要笑笑口咁，佢俾我嘅印象係一個工作好認真嘅人。」

（雙方有否打到出火，反面收場？）大師兄坦言未曾發生過：「因為袁和平佢係當時武術指導，一見唔對路就會叫Cut機，指導就會出聲叫停。」（覺得三位巨星李小龍、成龍及李連杰邊個好打？）大師直言：「一定係李小龍好打，我眼見到李小龍係一個出手就到位嘅人，一嘢就會中，而成龍就係一個動作演員，但身手就非常捷靈活，而李連杰動作方面都優勝，但講實打我都係覺得係李小龍。」