【是咁的，法官閣下．專訪】麥明詩道出女性困局：做咩都俾人話！

麥明詩（Louisa），是「十優港姐」，是「劍橋高材生」，現在更是「美國執業律師」，但其實她只覺得自己是一個普通女孩子。演員，或者是她眼前最想做好的事，在《是咁的，法官閣下》中，飾演新人律師夏心寧的她，表現比起之前在《使徒行者2》（2017）和《誇世代》（2017）改善不少，當然還有許多進步空間，但至少算是自然、流暢，只是咬字、讀對白時聽落怪怪的。

「嗰時啱啱開始箍牙呀！」麥明詩坦言除此之外的確還有好多難關要衝破，又知道好多觀眾都好落力地罵她「戲屎」，她亦承認自己在演技上有不少不足之處：「有時係你想做到咁，一早諗定晒點做，但係出嚟唔係自己諗嘅一樣；你想做得自然，但係愈諗做得自然，就愈做得唔自然，好矛盾。（你自己覺得有冇進步過？）唔可以話每日都有進步嘅，都真係好睇狀態、有冇感覺、對手係邊位，好似《是咁的》咁，喺子恆身上都學到啲嘢，因為佢都係元老級嘅前輩，哈哈！」

最近，麥明詩與三屆視帝黎耀祥在新劇《殺手》中合作，更在戲中飾演父女，她終於見識到何謂「演技」：「佢全程個狀態都好放鬆，同佢對戲，真係會以為佢問緊我家常嘢，以為佢同緊我傾閒偈，諗諗下先覺得做乜句嘢咁熟，咦，原來係劇本嚟，真係好有功力，佢讀緊嘅係劇本，你睇到嘅係生活。」雖然麥明詩會考考獲10A又贏過港姐冠軍，看似從來沒有被任何事難倒，但她卻覺得自己未必達到上述的境界：「有啲嘢真係講天賦。」

從這一刻的表現去斷定麥明詩有否天賦，明顯是言之尚早，而她亦好清楚在這一點上執着，不會令自己帶來更多，努力去裝備自己，才是正事：「最近跟緊彭秀慧上堂，佢係比較唔係方法演技，佢係教你搵自己入面嘅感覺，即係你嘅情緒，係好似一種肌肉咁，好似跳高練得多，你都會跳得勁咗，之後你亦唔會咁痠痛。」練得多「不快」、「驚恐」，到需要運用這種情緒時，便能夠好精準「跳入去」，做完後又可以快速地「跳出嚟」，不影響演員本身的情緒：「當然跳得入去快唔係演技好嘅最重要因素，但係呢樣嘢喺TVB好非常緊要。」現階段最想衝破的關口？麥明詩坦言因為自己多數做配角，最想學識在有限篇幅內，讓觀眾看出她與對手的關係，比起畫面上呈現的個別事件更為豐富。

做演員，的確不是一件易事，而在香港做女演員，絕對是稱得上超級難，難在要面對各種流言蜚語、各種中傷負評，麥明詩指所有東西其實源於社會對女性的歧視：「我覺得喺香港做女仔係一件難事，最難嘅係社會對女性有歧視，唔係法律上講嘅歧視，而係作為女仔，做咩都會俾人話，就好似之前我轉述網友話我哋係妓女、係公廁咁，又好似我哋做呢行咁，如果你搵到個『碼頭』泊又話你貪錢，找唔到又話你要食自己。」麥明詩不明白為何女藝人婚後淡出，外界為何要讚該名藝人「相夫教子做個好媽媽」，這樣對選擇了其他生活方式的女性，製造了無形壓力：「咁樣係咪即係我應該要留喺屋企相夫教子？其實呢啲係個人選擇嚟，個風氣係有意無間，同你講點樣先至係，女性獲認可嘅行為。」

外國有好多女演員都會為此而發聲，爭取應該有的待遇，又勇於表達自己的政治立場，麥明詩在過去的一段時間亦是如此，但最近一兩年卻好像被「滅聲」，她指自己只是想法有變：「早兩年會覺得講出嚟，可以影響到個社會，但當你發覺有時講係冇用，就要去做。」「齋講唔做」是部分香港人的特性，但她絕對不是這類人，早前「偷偷地」到美國考律師牌照，已經引證到她如她所言，是個「埋頭苦幹；用時間和努力說服別人」的人：「一啲嘢講咗，只會令同意你嘅人更同意，而唔同意你嘅人更唔同意，咁樣係冇意思。」