【是咁的，法官閣下．專訪】終於有位上？　黎振燁：監製話博一舖

雖然無綫（TVB）台慶劇《是咁的，法官閣下》收視不算高，第6集至10集的「7天跨平台總收視點」只有23.6，仍然未能撞破24點關口，但數字並不是一切，好多觀眾都大讚劇集好睇，除了能夠令人反思之外，又拍得出香港特有的都市感覺，而演員的表現亦恰到好處，當中飾演大狀鄧大志的黎振燁（Jackson）亦獲得不少掌聲。

黎振燁（Jackson）在《是咁的，法官閣下》裏面，因為想守住法治，所以離開本身的公務員崗位，毅然決定考牌做律師。而事實上，他亦多次轉工，本身是時裝設計師的他，2009年時便轉行入讀TVB藝訓班，拍了3年劇再轉到港視（HKTV），無奈HKTV始終拿不到廣播牌照，令他陷入「半失業」狀態，唯有轉行做模特兒，才能維持生計。好在2016年他參加香港先生選舉並得到冠軍，使他可以做回自己的理想職業──演員。

相關文章：

【是咁的，法官閣下．專訪】黎振燁認虧欠太太：當年結婚太求其！

上位要靠裝備好自己

重返TVB已經足足兩年，黎振燁參與過《溏心風暴3》、《棟仁的時光》和《再創世紀》的拍攝，但戲份不多，幸而《是咁的，法官閣下》監製陳耀全用他，令他能夠擔任重要角色，由入行差不多10年，才有機會嶄露頭角。問會否覺得TVB的劇集監製傾向不用新人令新演員好難上位，他坦言不能夠怪一班監製：「始終佢哋都想自己作品好，當然係做生不如做熟，點解要搵新人，人哋又唔熟你，用咗你之後影響成個劇嘅節奏、品質，咪自己攞嚟衰，真係冇理由要去博。當然有一班都肯用、敢用，因為拍出來嘅氣氛都想好新人咁，就好似呢度咁。」

要上位，演技始終是最重要的因素，黎振燁坦言雖然提供了足夠培訓，但演技能否進步，都要靠演員本身：「TVB有樣嘢好，唔係淨係畀個Course你，佢會畀你一路做，一路喺前輩身上學嘢，即係不停有個課程咁，比起學校學到嘅嘢更難得，因為所有嘢都係實戰。」