朱智賢黎振燁疑偷食　男方有家室曾表示虧欠太太

34歲有翻版古天樂之稱的黎振燁(Jackson)，最近在新劇《機場特警》戲份不少，是無綫力捧小生之一，今晚被傳媒爆出同謝東閔女友朱智賢同車纏綿，最初報導更是車震，晚上有採訪片傳出，二人原來不是車震，只是在車廂一齊切蛋糕，但被多個記者追訪及不停拍照，片中黎振燁神色驚張，而朱智賢就坐在後座，面色蒼白，而消息傳出後，大家對男主角黎振燁形象健康，當選港男冠軍後不是答謝太太不離不棄，當日接受《香港01》訪問時，亦經常將太太掛在口邊。

黎振燁（Jackson）在《是咁的，法官閣下》的表現，絕對不比其他前輩演員失色，好多觀眾都大讚他演出自然。當然，觀眾對他印象最深的，始終都是「港男冠軍」這個名銜。2016年無綫（TVB）好神奇地將「香港先生選舉」和「香港小姐競選」撈埋一齊來搞，先在星期六晚選出四強人馬，再在翌晚港姐決賽中公布港男冠亞季軍。雖然黎振燁是熱門人選，但並非由頭帶到尾，左邊有後生靚仔的丁子朗，右邊有多才多藝的鍾君揚，若要與以上最後分別奪得亞軍、季軍的兩位比較，黎振燁其實沒有特別明顯的優勢。他之所以贏得冠軍，演講環節中那番對太太講的愛的宣言絕對是致勝關鍵，而最精彩的，一定是主持問他最怕老婆做什麼時，他回答「最驚太太唔畀我錫」。

去到最結尾的部分，黎振燁才在台上公開自己的婚姻狀態，的確加了好多分數，又高大靚仔，又情深款款，好難輸。但事後諗卻好似充滿着計算，因為不遲不早時間剛剛好，講到這一點，他即笑說：「冇辦法，因為我淨係得呢招，其實我都好尷尬，擺老婆出嚟，或者將自己婚姻狀況、私人生活公開，但大會又說服咗我，話唔係要我去做啲咩，只係想我去同觀眾表達，黎振燁到底係咩人，我又覺得，好似都講得通。」

是節目效果，是秘密武器，但那番愛的宣言裏面的真心，並沒有因為得到了榮譽而變改。黎振燁一直覺得自己對老婆有所虧欠，結婚結得好隨意，有點「求其」：「我好想有一樣嘢係可以畀佢紀念，呢個方法又環保又實際，唔使搞好多嘢，但佢會一世都記得，太太陪咗我咁多年，真係捱㗎，我都係台上多謝佢一句，我做嘅嘢好少，但希望會令佢有最大嘅回憶。」

黎振燁與老婆在中學時期已經開始拍拖，去到2015年某一日，他突然向對方說︰「不如我哋今年結婚，都咁耐，差唔多啦。」而對方又肯應承，所以他們便好快簽紙，沒有到酒店、酒樓擺喜酒，亦沒有影結婚相：「淨係同屋企人食餐飯，乜都冇，所以真係欠咗佢。（點補償？）我已經報答緊佢喇，我出糧係直接入落佢戶口，冇經過自己手，我都唔怕同人講喇，由得佢分配啦，佢鍾意做咩就做咩，得閒有啲零用錢就得，等我可以坐車同食飯就夠。（唔擺酒？）其實我同太太都有共識，大搞嘅話會好複雜，唔會補擺喇，但係婚紗相，我係虧欠佢嘅，有拖冇欠啦，我哋係想有小朋友後一齊影，咁當然要睇緣份啦，睇睇幾時會有小朋友。」

如果沒有老婆的支持，黎振燁一定走不到今時今日的這一步，他可能是繼續做Model，或者會重返入行前的崗位，做一個時裝設計師。然而，原來老婆當初是非常反對他入讀TVB藝員訓練班做演員，覺得娛樂圈五光十色、紙醉金迷，有數之不盡的誘惑：「我讀書時已經想入㗎喇，但講真，人哋靚女關我咩事，我同佢一齊咪得囉，但佢就覺得好冇安全感，咁我唯有屈服，就做時裝設計囉，反正我都讀完。」

不過，從未死心的黎振燁在22歲時便毅然向TVB遞交了藝員訓練班申請表，並獲得取錄，令他和當時仍然是女友的太太產生了矛盾：「要解釋，死死地氣同佢講，TVB演員訓練班收咗我，佢一聽完，靜晒。嗰段時間都對我同佢嚟講，真係一個挑戰嚟，我同佢冷戰，係我入讀訓練班嘅頭一個月，大家好似會分開咁，因為佢唔明點解我要咁做，覺得我係咪貪慕虛榮。」原來時間真的會證明一切，當老婆知道他每日都放好多心機去研究電影、劇集，又會睇影評，又會睇演員訪問了解心得，便知道他是認真的。「佢知我唔係貪慕虛榮，係想做個演員，漸漸佢就接受同支持我，而我選香港先生，係佢幫我去填Form，問我︰『係唔係真係想選，我準備好晒，你去唔去馬？』」所以，我們才能夠在電視機裏面見到黎振燁，至於他的演藝經歷，以及他拍攝《是咁的，法官閣下》的一切，下一篇文章再述。