【是咁的，法官閣下】林秀怡為母節衣縮食唔代表窮：我經濟狀況ok

大台新劇《是咁的，法官閣下》講述新晉律師嘅辛酸，不過其實做大台演員，情況都係差不多。劇中飾演黃智賢徒弟嘅林秀怡，入行快10年，曾在《怒火街頭2》半裸演出，雖然係受到關注，可惜後勁麻麻。於單親家庭長大嘅林秀怡，為養家向來身兼多職，不過，早前佢為救患癌母親，多年積蓄一鋪清袋，前境危危乎……

林秀怡接受電話訪問時，透露媽媽約三、四個月前證實患上子宮頸癌。「媽媽因為出血所以去睇醫生，佢打電話比我嗰陣，我仲喺餐廳返緊工，自己都呆咗，諗住做埋夜市返屋企再睇下點算，但結果都係頂唔順。」林秀怡指媽媽屬於2B級，只能接受電療。「我哋都好樂觀，聽醫生建議做電療，依家完成電療，媽媽身體比較虛弱，同埋要等一個月後去檢查，但因為醫生無講到情況係好係壞，所以都會有少少擔心。」為咗陪媽媽抗患，林秀怡過去幾個月幾乎零接job，幸得經理人公司欲及無綫體諒同配合。

「加埋都用咗超過40萬，已經係我全部積蓄，所以接下來真係要努力搵錢，我都有同公司講過咩job都做，唔除衫就得。」其實林秀怡除幕前工作外，兩年前她與友人合資開餐廳也是收入來源之一，但到底餐廳賺幾多，林秀怡就話其實一直都無認真計過，非常搞笑。「因為係小店，所以無特地請會計，平時都係我同拍檔同埋屋企人幫手打理，so far無蝕錢嘅。」林秀怡指自己十分男仔頭，化妝品、衫褲向來少買，花費較多在飲食方面，不過，佢口中嘅飲飲食食，原來都係十分平民化嘅譚仔米線同珍珠奶茶。「依家會買啲有機食物比媽媽，會貴少少，同埋以前會食隔夜飯餸，依家都唔會。」

林秀怡獨力養家早已不是秘聞，不過她坦然會因新聞報導已感到不快。「其實我經濟狀況ok，未去到咁慘，但成日比人寫到好窮咁，到底我要窮幾耐？」林秀怡家住天水圍，她指區內有不少人情況比她更差，加上自己有手有腳搵食，圈內朋友如蔚雨芯、孫慧雪亦不時介紹工作或者轉贈衣服給她，所以就算花盡積蓄幫媽媽醫病，她亦未有太擔心。