森美為港鐵故障《塞爆列車》配音　對白超正：不停輪迴幾世都未到

港鐵信號系統故障令港鐵荃灣綫、觀塘綫及港島綫需要慢駛，大批返工、上學族塞在港鐵站無法上車，森美今早於電台節目開咪時，指女兒返學花了約45分鐘由九龍塘去太子站，他最後親自駕車接載女兒到中環上學。或者係因為太過身同感受，故繼《返工》之後，森美又一力作－－《塞爆列車》！

森美雖然只係負責獻聲，但一字一句都絕對係香港市民今早的心聲：
「繼返工之後，香港市民又一巨獻－－塞爆列車！究竟你有幾想返工？比你一試就知道，一次普通嘅路程，點樣可以攞你命，去到車站入唔到閘，入咗閘上唔到車，上到車車唔閂門，閂咗門架車唔開，車開咗佢又停，停咗佢唔唔開，開咗佢又停，停咗佢又唔開，開咗佢又埋站，埋站佢又唔開門，開門佢又唔閂，不停輪迴幾世都未到，老闆一早返到所有員工失晒蹤，大叫搞錯減人工，全港市民翻眼演出，大人細路傾力擠迫，返工返學好容易？等你試下塞到懵，塞爆列車！十月十六全城失蹤，本片青少年及兒童終於到你。」
 

最正嘅係上次《返工》曾以「本片青少年及兒童遲啲到你!」結尾，今次《塞爆列車》以「本片青少年及兒童終於到你！」真係接得天衣無縫。