森美為《返工》自度入肉旁白　獲網民激讚：想為香港市民舒緩吓

香港經歷過颶風「山竹」後，市面滿目瘡痍，不過由於政府未有宣佈停工，令唔少打工仔都要千方百計趕上班。尋日網上瘋傳一張打工仔站在塌樹前的照片，其後有網民將照片改成電影海報，戲名叫《返工》，英文為《Working after hurricane》，主演為「香港打工仔」，宣傳字句為「9.17 全城返工」，而「電影導演」則是「香港政府」，「聯合製作人」為「港鐵公司」。

而今日森美小儀主持的《早霸王》，其fb專頁亦上載了一氣名為「返工」的trailer，內容盡是香港市民為返工而於港鐵站大排長龍、爭的士的畫面，片段上載之後短短兩小時已有15萬多觀看人次，之所以咁好view，旁白絕對功不可沒！「打風你好驚，打完仲恐怖，返工！香港史上最血肉嘅史實，七百萬市民打造七小時擠擁奇景……」寫出如此有血有淚的旁白，原來係森美大哥，他接受電話訪問時表示：「因為見到張《返工》海報，令我諗到如果有埋畫面會點呢？其實都係想為香港市民舒緩一吓，所以就寫咗呢個旁白，但畫面就係商台同事負責嘅，其實商台成日都有類似的電影廣告。」提到trailer公開後，唔少網民都讚好，森美表示香港人經歷「山竹」後，都堅守自己的工作岡位，雖然有不少怨氣，但都值得一讚，希望以trailer輕鬆一番。