【早霸王】男聽眾唔使表白就得手　森美： 點解要男仔追先馨香

話說今年5月有忠實女聽眾，提議追求者表白一定要經《早霸王》，男方雖然怕羞到極點，但都甘願為女神豁出去，並成功打動對方。而喺今個星期嘅《早霸王》「你知道唔知道有人掛住你」環節，又有男聽眾收order做嘢！似乎表白一定要有《早霸王》，已成為坊間其中一個指標。

男聽眾阿輝同女友拍拖十年，自覺係時候踏入人生另一階段，之但係點解遲遲未有行動呢？「佢要求過求婚100次，但真係無能為力 。」阿輝指當年「無問佢可唔可以做女朋友就喺埋一齊，但我懷疑女仔係好嚮往呢一方面。」森美聽到之後，認為呢啲就係男女不平等，更問「點解要男仔追先馨香？」不過佢都好醒咁話自己願意接受呢個不平等。
 

阿輝表示平日同女友一齊返工時，都有收聽《早霸王》，記得女友曾表示十分欣賞於大氣電波中表白的做法：「咁我前期做得唔好，都想做返比佢，不過佢應該唔會真係要求婚100次先得掛？」森美聽到之後，就話：「你算執到啦，佢話定比你聽。」並謂見過有男仔於大庭廣眾下求婚，結果女方因怕羞而拒絕，他更順勢提議電話接通後，負責幫阿輝數一百次「你嫁比我啦」。
 

電話接通後，女友Eva聽到呢個求婚大計之後，笑住咁話：「仲有3分鐘咋喎。」似乎係擔心男友於限時內，講唔晒一百次「你嫁比我啦」，結果阿輝真係喺12點新聞報導前完成呢個創舉，咁Eva係未say yes先?「呢個係未其中一次求婚 」森美聽到之後，幾乎笑到失控，而阿輝就即時補一句「希望你接受呢個有誠意但未有戒子嘅求婚。」但Eva仍然係唔收貨，並表示「我count住其中一次先」呢個101次求婚宣告失敗。