【早霸王】多年好友變拖友契機係乜？　悶男友：失戀時佢幫我好多

經歷過幾次的「失敗過案」，今個星期嘅《早霸王》「你知道唔知道有人掛住你」環節終於再次出現有緣人，男主角Kenji同女主角Elva相識8年，去年正式成為拖友，Kenji表示:「最初係同公司，之後大家轉公司分開工作，由於係同行，所以間中都有約食飯，直到去年我失戀好唔開心，佢陪我好多，幫我好多，慢慢開始有感覺。」
 

由多年好友變為拖友，娛樂圈都時有發生，之不過到底契機係乜呢，小儀同代班主持Marco都非常好奇，Kenji就話：「因為後來大家喺同一公司撞返，經常會成班朋友一齊食飯，多咗聯絡。」到底係緣份定係整定呢？why not both？連小儀都話：「好似有條路逼佢哋一齊咁。」但另一方面，二人拍拖一年就嗌結婚，到底係一時激情定早有共識呢？Kenji就大讚女友心地善良、又夠精明，並「識得管理我哋以後嘅生活、包括理財等等。」

【早霸王】23歲仔無句真連朋友都睇唔過眼　女方狠飛兼全面封鎖

【早霸王】速食男表白慘遭食檸檬　森美：女仔刁僑扭擰係應該

小儀聽到之後，就笑問Kenji其實係未想搵個Manager。 嗱！其實Kenji一開首就已經話女友嫌佢悶、又唔浪漫，所以佢先想打去《早霸王》搞少少驚喜，而佢亦有提到如果打唔通的話，都係打算在餐廳以鮮花同戒指求婚……聽到都覺得悶，之不過，呢種男人可能先係世上最可靠又穩陣，所以當電話接通後，Kenji講完︰「8年前識到你好感恩，拍拖日子好開心，你亦好善良、聰明，希望你可以同我一齊組織家庭，你係個好太太、好媽媽，請你嫁俾我。」聽落好似好簡單甚至有少少「旱」，但電話另一方嘅Elva好快以情深地「嗯」代替「好」，禮成！