【早霸王】內向男暗戀2個月突然表白 森美都擔心：你機會唔大！
每逢一到星期五這個日子，就知道係《早霸王》表白環節《你知道唔知道有人掛住你》的時候，最期待嘅畫面終於出現，今次終於係表白㗎喇，男聽眾就叫做阿聲，佢話之前自己就又冇乜表示，就想借節目去表白，森美一聽就覺得唔對路：「如果你係鍾意一個人，點會一啲表示都冇？你突然之間佢會好大壓力， 好難應承你，你平時同佢相處係點㗎，佢吸引你果刻係點？」
阿聲一提起佢鍾意嘅人就好冧豬，「佢做嘢專注個樣囉，我哋一齊做嘢識嘅，有一晚做嘢大家做到好夜，咁我好攰，我望住佢對住電腦做嘢個樣好專注、好靚！」齋聽都幻想到個畫面好浪漫，但等陣先，阿聲話自己咩都冇表示過，點會咁淡定㗎？阿聲就心窒窒咁話：「唔太敢，我冇乜暗示啊，係留意多咗佢，傾多咗計，都係工作上嘅嘢，未試過一齊食Lunch。」
【早霸王】養貓有車仲娶埋老婆 森美：你擁有香港人最理想生活！
我估唔止森美，大家聽完都替阿聲擔心，識咗2個月咩都冇做過，咁突然表白失敗率相當高，正常應該試探吓口風，借啲意親近，平時睇《精裝追女仔》都有教啦，再唔係「MK活地阿倫」葉念琛嘅電影都總會學到幾招嘅，森美都唔放心問清楚阿聲：「你睇佢眉頭眼額睇佢鍾唔鍾意你啊，如果你行埋去佢又笑， 你同佢傾計又好雀躍，又會搵返你傾計，咁樣你機會真係好細喎，我想問點解你唔做啲嘢呢，打電話上嚟你都夠膽囉！」
阿聲就好努力咁諗起唯一一次觸電的一刻，「嗰日我做到好攰，咁我坐冷氣位， 我又凍縮埋咗一舊，佢過嚟見到我凍就借咗件衫俾我喇。」人哋都主動借衫畀你，阿聲一啲都唔識打蛇隨棍上嘅，森美就教佢一招：「有時啲野你要當講笑，好似佢借衫畀你咁，你竟話衫就唔使喇，如果有人攬住我呢就暖喇。」
聽到呢到，相信大家都覺得有啲不尋常之處，但森美就仲未踢爆住，佢反而就開始說服阿聲，叫佢唔好打電話去表白：「因為我覺得你個人比較內向，如果佢聽完厭惡你，你接唔接受到呢個打撃先？你接唔接受到佢唔接受你？你怕唔怕被身邊朋友知道，因為我覺得你唔得嘅機會大啊。」平時都係見森美去鼓勵大家表白，好熱血咁話有啲嘢唔做就會後悔，但今次居然咁消極，肯定係有啲嘢嘅！
好喇，大家準備花生2斤。
森美聽咗咁耐都覺得好唔對路，終於敵不住好奇問阿聲：「因為開頭你話鍾意佢專注，我都有啲疑惑嘅，因為好少男人會鍾意女人好專注做嘢，通常鍾意睇一個人專注做嘢都係男人嚟，我想問吓你暗戀嗰個叫咩名呢，男仔定女仔嚟？」我諗答案係咩大家都估到喇，電話一接通，係男聲嚟嘅喂，呢個阿楊就狂笑：「我平時有聽開㗎，不過係今日冇聽咋。」無謂曬時間，森美單刀直入問：「你依家本身有冇拍拖？你喺香港結婚有冇問題？結婚計劃生幾多個小朋友？」原來阿楊已經有個拍咗拖3年嘅女友，仲已經計畫緊結婚，聽落就應該唔係Hehe，所以為免令阿聲傷心，森美首次叫停表白環節：「你有拖拍就唔好搞咁多喇，費事破壞你同另一半，有啲嘢過咗去就由佢啦，個節目你都唔好聽返喇，怕你會心掛掛。」平時森美個人就最Mean最鍾意食花生㗎喇，估唔到今次咁貼心照顧住阿聲感受，唔緊要啦，反正冇咗棵樹仲有成個森林啊。