【早霸王】男聽眾打麻雀無錢畀都識到女　森美：不如以身相許啦！

每逄星期五，又到《早霸王》的表白環節《你知道唔知道有人掛住你》，今日有位男聽眾「 阿南」打去節目，話自己明戀的對象Zoe是在打麻雀時認識的。「嗰次朋友唔夠腳叫我去，都幾靚女。」雖然成日都有人話打牌傷感情，但阿南就逆線而行，打出真感情，而且仲幾高招。「我輸咗錢，於是去撳機，但張提款卡無錢，所以就交換咗電話，打算之後再過數。」咁高明的抄牌技術，連森美聽到都話叻！更不停笑言「肉償同以身相許更快」
 

阿南之後同Zoe一直保持聯絡，有日更趁對方外遊時鼓起勇氣，透過WhatsApp發動攻擊：「點解好似有啲掛住你?」雖然對方以「唔通愚人節你玩我」做回覆令阿南不知如何是好，但終極一句「其實我都有啲掛住你」明晒啦！既然大家都畫公仔畫出腸，咁問題在哪呢？原來阿南「唔知係未」，所以令雙方關係依然係曖昧狀況。森美聽完之後，即時表示「得！你有機會」更鼓勵阿南暫時放下手頭上的工作，馬上打去表白。

電話接通後，Zoe聽到森美小儀把聲似乎已經知乜事，單身半年的她話自己身邊有幾個追求者，但自己就淨係對一個OK，不過因為怕表錯情所以死都唔肯開名，不過Zoe又點會鬥得贏森美呢？最終她亦說出了「阿南」，聽到阿南把聲之後，Zoe傻笑之餘，亦不忘提點對方「咁你講啦」，阿南一句「同我一齊建築我地未來」即時禮成。